جيىندى اشىپ, ءسوز سويلەگەن استانا قارجى ورتالىعىنىڭ باسقارۋشىسى قايرات كەلىمبەتوۆ «استانا» حقو ءۇشىن اعىلشىندىق جالپى قۇقىق ونىڭ بارىنشا يكەمدىلىگى ءۇشىن تاڭداپ الىنعانىن ايتتى. «الەمدىك تاجىريبە ەڭ ۇلكەن, تابىستى جاھاندىق جانە وڭىرلىك قارجى ورتالىقتارىنىڭ بارلىعىنىڭ 85 پايىزى اعىلشىندىق جالپى قۇقىقتىڭ زاڭگەرلىك مازمۇن مودەلىندە جۇمىس ىستەيتىندىگىن كورسەتتى. اعىلشىندىق قۇقىق نەمەسە قۇرلىقتىق زاڭناما ۇزدىك دەپ داۋلاسۋعا دا بولادى. دەگەنمەن, ءبىز قارجىلىق مودەلدەر, قارجىلىق رەتتەۋ نەگىزىنەن اعىلشىندىق جالپى قۇقىققا باعدارلانعاندىعىن كورىپ وتىرمىز. مۇنىڭ ەڭ قاراپايىم نەگىزدەمەسى اعىلشىندىق جالپى قۇقىقتىق ۇلگى بولارلىق جانە شىندىعىندا ول بارىنشا يكەمدى», دەدى ول. قايرات كەلىمبەتوۆتىڭ سوزىنە قاراعاندا, اعىلشىندىق جالپى قۇقىق نارىق تالاپتارىنا تەز ارادا بەيىمدەلە الادى. بۇل مەملەكەتكە نارىق قۇلدىراعاندا نەمەسە كەرىسىنشە مەملەكەتتىك رەتتەۋ ساتسىزدىككە ۇشىراعاندا قاجەت.
وتىرىستا «استانا» حقو-نىڭ ەل ەكونوميكاسىنا قارجى تارتۋعا نەگىزدەلگەن ستراتەگيالىق باعىتتارى, كاپيتال نارىعى, اكتيۆتەردى باسقارۋ, جەكە تۇلعالاردىڭ ءال-اۋقاتىن جاقسارتۋ, يسلام قارجىلاندىرۋى جانە وزىق قارجىلىق تەحنولوگيا جونىندە كەڭىنەن اڭگىمە بولدى. سونداي-اق, «Financial Times» باسىلىمىنىڭ دامۋشى نارىقتار بويىنشا رەداكتورى دجەيمس كينجدىڭ جەكەشەلەندىرۋ ستراتەگياسى تاقىرىبىنداعى بايانداماسى تىڭدالدى.
باسقوسۋ بارىسىندا ينۆەستيتسيا مەن قور نارىعىن دامىتۋ سالاسىنداعى بەلگىلى ساراپشىلار مەن اناليتيكتەر وي-پىكىرلەرىن ورتاعا سالىپ, ۇسىنىستارىن جەتكىزدى. سونىمەن قاتار, شەتەلدىك ينۆەستورلارعا جاڭا قور بيرجاسىنىڭ الاڭقايى – «Astana International Exchang» بيرجاسى تۋرالى مالىمەتتەر ۇسىنىلدى. قور بيرجاسى اعىمداعى جىلى كۇزدە ىسكە قوسىلماق. وندا «سامۇرىق-قازىنا» ۇاق-نىڭ ەڭ تارتىمدى كومپانيالارىنىڭ اكتسيالارى ورنالاستىرىلادى.
اسحات رايقۇل,
«ەگەمەن قازاقستان»