حالىقارالىق كورمەنىڭ اشىلۋىنا دا از ۋاقىت قالدى. قازىرگى تاڭدا دايىندىق جۇمىستارى سوڭعى شيرەگىنە جاقىنداپ, قۇرىلىستى اياقتاپ قالدىق. باسقارما توراعاسى كەشەگى جيىندا دا اتقارىلعان جۇمىستاردىڭ جايىن بايانداپ, جۇمىس جۇيەلى ءجۇرىپ جاتقانىن جەتكىزدى.
«قاتىسۋعا ءوتىنىش بىلدىرگەن 115 مەملەكەتتىڭ قازىر 90-عا جۋىعى ءوز پاۆيلوندارىن جاب-
دىقتاۋعا كىرىسىپ كەتتى. ال قالعاندارى جۋىق ارادا جۇمىستى قولعا الادى دەگەن سەنىمدەمىز. سونىمەن قاتار, ءبىزدىڭ ءوز پاۆيلونىمىزدا دا قىزۋ جۇمىس ءجۇرىپ جاتىر. ونى جاڭا وزدەرىڭىز ارالاپ شىققان ساتتە دە كوردىڭىزدەر», دەدى ا.ەسىموۆ.
باسقارما توراعاسىنىڭ ايتۋىنشا, ەكى ايدان سوڭ الەم جۇرتشىلىعىنا ەسىگىن ايقارا اشقالى وتىرعان ەرەكشە شارانىڭ ارتىقشىلىعىن وبلىس اكىمدەرىنىڭ ءتيىستى سالاعا جاۋاپتى ورىنباسارلارىنىڭ نازارىنا ۇسىنىپ, بىرلەسىپ اتقارار جۇمىستاردى تاعى ءبىر پىسىقتاۋدىڭ ماڭىزى زور. سەبەبى, اتالعان حالىقارالىق كورمەنىڭ ەلگە تيگىزەر پايداسى, ەكونوميكالىق تابىسى, جالپى, ءبىز ءۇشىن بەرەرى جايىندا حالىققا دۇرىس اقپارات جەتكىزۋ, دۇرىس تۇسىندىرۋدە وبلىس باسشىلىعىنىڭ ورنى بولەك. وسى ورايدا ا.ەسىموۆ وبلىستار كورمەگە بيلەت ساتۋمەن عانا اينالىسپاي, شارانىڭ شىن مانىندە ەلگە قاجەتتىلىگىن ناقتى مىسالدارمەن ءدالەلدەپ, جۇرتتىڭ شىنايى قىزىعۋشىلىعىن تۋدىرۋ كەرەكتىگىن ەسكەرتتى. باسقارما توراعاسى بۇل ءۇشىن اكىم ورىنباسارلارى الدىمەن وزدەرى كوز جەتكىزىپ, تولىق مانىندەگى اقپاراتپەن قامتىلىپ, اتقارىلىپ جاتقان جۇمىستاردى ءوز كوزدەرىمەن كورۋلەرى قاجەت دەپ شەشسە كەرەك. سول سەبەپتى, وبلىس اكىمدەرىنىڭ ورىنباسارلارىنىڭ باسىن قوسقان «استانا ەكسپو-2017» ۇك» اق باسقارما توراعاسى كورمەگە دايىندىق جۇمىستارىن ەگجەي-تەگجەيلى بايانداپ, قاتىسۋشىلاردىڭ نازارىنا سلايدقا قۇرىلعان ارنايى تانىستىرىلىمدا ۇسىندى.
«وسىنىڭ ءبارىن جەرگىلىكتى حالىققا ءتۇسىندىرىپ ايتۋ كەرەك. مۇنداي مۇمكىنشىلىك تمد مەملەكەتتەرىنىڭ تاريحىندا ءبىزدىڭ ەلدە ء بىرىنشى رەت بولىپ وتىر. ەلباسىنىڭ بۇل جوباسىن ءبىز حالىققا جەتكىزۋگە ءتيىسپىز. حالىق كورمەنى تاماشالاۋعا ءوز ەركىمەن كەلەتىندەي جاعداي جاسالادى. بۇل كورمەگە, اسىرەسە, جاستاردىڭ قۇشتارلىعىن وياتۋ ماڭىزدى. «بولاشاقتىڭ ەنەرگياسى» تاقىرىبىندا الەمنىڭ قانداي جەتىستىگى بارىن, نە جاسالىپ جاتقانىن كورۋى كەرەك», دەگەن ا.ەسىموۆ ەلىمىزدە وتەتىن ەكسپو كورمەسىنىڭ شىن ءمانىندەگى ماڭىزدىلىعى ءالى دە بولسا جەرگىلىكتى حالىققا جەتكىلىكتى دەڭگەيدە ناسيحاتتالماي وتىرعانىن دا اتاپ ءوتتى.
دينارا بىتىكوۆا,
«ەگەمەن قازاقستان»