– بۇل باعدارلامانىڭ ءمانى – قازاقستاننىڭ رۋحاني وركەندەۋى, الەمدەگى توقتاۋسىز وزگەرىستەر, قۇبىلىستار ۇدەرىسىندە, جاھاندانۋ جاعدايىندا ءوزىنىڭ ۇلتتىق ەرەكشەلىگىن, رۋحاني الەۋەتىن جوعالتپايتىن ەل رەتىندە دامۋىندا, تاۋەلسىز ەل حالقىنىڭ تاۋەلسىز قوعامدىق ساناسىن قالىپتاستىرۋدا. مەملەكەت باسشىسى وسىنداي اۋقىمدى ماقساتتى جۇزەگە اسىرۋدىڭ باسىم باعىتتارىن انىقتاپ بەردى, – دەدى وبلىس اكىمى نۇرلان نوعاەۆ.
«ەلباسى ماقالاسىندا كورسەتىلگەن باستى باعىتتاردى جۇزەگە اسىرۋ ءۇشىن مۇنايلى ايماقتا مۇمكىندىك مول. اتىراۋدىڭ باستى بايلىعى – مۇناي مەن گاز ەمەس, جەرگىلىكتى حالقى, ادامدارى. سولاردىڭ ارقايسىسى ءوز ءىسىنىڭ شەبەرى بولۋى ءتيىس. جاڭا تەحنولوگيالار, كومپيۋتەرلىك ساۋاتتىلىق, شەت تىلدەرىن ءبىلۋ – وسىعان قول جەتكىزۋدىڭ قۇرالى. بۇل – تەك كاسىبي تالاپ ەمەس, ازاماتتىق پارىز. ءاربىر ازامات ءوزىنىڭ ىسىنە, وتباسىلىق جاعدايىنا الدىمەن ءوزى جاۋاپتى. وسىنى حالىق ساناسىنا ءسىڭىرۋىمىز قاجەت. قولدا بار مۇمكىندىكتەردى پايدالانا وتىرىپ, باسىمدىقتارىمىزدى ايقىنداپ, جۇمىستانۋىمىز كەرەك. بۇل – جالپى قوعام ەمەس, ءاربىر ادامعا قاتىستى ماسەلە. بارلىعىنا بىردەي عالىم بولۋ نەمەسە شەتەلدىك كومپانيادا مەنەدجەر بولۋ مىندەت ەمەس. اركىم قولىنان نە كەلەدى, سونىمەن شۇعىلدانۋى كەرەك. فەرمەر دە, ينجەنەر دە, دارىگەر دە, دانەكەرلەۋشى دە جاقسى مامان بولسا عانا جۇرتقا قادىرلى – وسىنى, الدىمەن, جاستاردىڭ ساناسىنا قۇيايىق», دەپ اتاپ ءوتتى ايماق باسشىسى.
قاي زاماندا دا ادامزاتتىڭ باستى قارۋى – ءبىلىم. «بولاشاق» باعدارلاماسى بويىنشا 300-دەن استام اتىراۋلىق جاس شەت ەلدەردە ءبىلىم الدى. قازىر ولار ەلىمىزدىڭ تۇكپىر-تۇكپىرىندە تابىستى ەڭبەك ەتىپ ءجۇر. وبلىس اكىمى وقۋ ورىندارىندا ماماندىق تاڭداۋدا جاستاردىڭ, اتا-انالاردىڭ ساناسىندا «پرەستيج» دەگەن ۇعىمدى «ءتيىمدى», «بولاشاعى بار» دەگەن ۇعىمدار الماستىرۋى قاجەت ەكەنىن دە ايتتى.
– نەگە كەڭەس كەزىندە بىزدەن وزىق بولعان رەسپۋبليكالاردى بۇگىن ارتتا قالدىردىق؟ ارينە, الدىمەن بۇل – ەلباسىنىڭ كورەگەن ساياساتىنىڭ, حالىقتىڭ ەڭبەگىنىڭ ناتيجەسى. سونىمەن قاتار, الەمگە اشىق بولۋىمىزدىڭ, ءارتۇرلى ۇردىستەرگە بەيىم بولۋىمىزدىڭ ماڭىزى زور. وبلىسىمىزدا وسى باعىتتا ءجۇيەلى جۇمىستار بار. وتكەن جىلى وبلىس اكىمى اپپاراتىنىڭ مەملەكەتتىك قىزمەتشىلەردىڭ بىلىكتىلىگىن ارتتىرۋ, قايتا دايارلاۋ جانە تىلدەردى وقىتۋ وڭىرلىك ورتالىعىندا 271 ادام – قازاق, 37 ادام – ورىس, 83 ادام اعىلشىن تىلدەرىنىڭ كۋرستارىنان ءوتتى. اتىراۋدا حالىقتىڭ قازاق ءتىلىن مەڭگەرۋ دەڭگەيى جوعارى: الەۋمەتتىك زەرتتەۋلەر قورىتىندىسىمەن 96,9 پايىز دەگەن مالىمەت الىنىپ وتىر. اعىلشىن ءتىلىن مەڭگەرگەندەردىڭ ۇلەسى – 12,5 پايىز, ال ورىس ءتىلىن مەڭگەرگەندەردىڭ ۇلەسى 90,1 پايىز, – دەپ وبلىس اكىمى نۇرلان نوعاەۆ ناقتى دەرەكتەر كەلتىردى.
وبلىستىق ءبىلىم بەرۋ باسقارماسى ءادىستەمەلىك كابينەتىنىڭ ديرەكتورى, PhD دوكتورى عابيت قابەكەنوۆ اعىلشىن ءتىلىن مەڭگەرۋ باسەكەلىك قابىلەتتىڭ العىشارتتارىنىڭ بىرىنە اينالىپ وتىرعانىنا توقتالدى. 2019 جىلدان باستاپ 10-11 سىنىپتاردا فيزيكا, حيميا, بيولوگيا, ينفورماتيكا ءپاندەرى اعىلشىن تىلىندە وقىتىلۋىنا بايلانىستى, وسى پاندەردەن ساباق بەرەتىن 102 پەداگوگ اعىلشىن تىلىندە وقىتۋ كۋرسىندا بىلىكتىلىكتەرىن ارتتىرعان. بيىل اتالعان كۋرستان 214 مۇعالىمدى وتكىزۋ جوسپارلانىپ وتىر.
ەلباسى بارشا قازاقستاندىقتاردى ءححى عاسىردىڭ تالاپتارىنا ساي دايارلاۋدا «تسيفرلى قازاقستان» باعدارلاماسىنىڭ ماڭىزدىلىعىنا ەرەكشە توقتالعان. اقپاراتتىق تەحنولوگيالار سالاسىنداعى جەدەلدەتىلگەن جاڭعىرتۋلاردى پايدالانۋدا وبلىستىڭ 178 مەكتەبى «Bilimland.kz» يننوۆاتسيالىق ءبىلىم بەرۋدىڭ ونلاين رەسۋرسىنا قوسىلسا, 134 مەكتەپتىڭ نەگىزگى سۋبەكتىلەرى اراسىنداعى بايلانىستى نىعايتۋ ماقساتىندا «كۇندەلىك» قاناتقاقتى جوباسى ەنگىزىلدى. بۇل مەكتەپ باعدارلاماسى بويىنشا جاسالعان ون مىڭعا جۋىق ينتەراكتيۆتى ساباققا جول اشادى. مىڭداعان كورنەكى قۇرال ۇسىنادى, جاراتىلىستانۋ پاندەرى بويىنشا الەمدەگى ەڭ ۇزدىك ۆيرتۋالدى زەرتحانانى پايدالانۋعا مۇمكىندىك بەرەدى.
وبلىستىق تاريحي-ولكەتانۋ مۇراجايىنىڭ باسشىسى راشيدا حاريپوۆا مادەني مۇرالارىمىزدىڭ جاڭا عاسىرمەن بىرگە جاڭعىرۋىنا ەلباسى ەرەكشە كوڭىل ءبولىپ كەلە جاتقانىن ايتتى. «سارايشىق, اقتوبە-لاەتي سەكىلدى كونە شاھارلار, تاسكەشۋ كەرۋەن سارايى زەرتتەلىپ جاتىر. سارايشىق ىرگەسىن بەكىتۋ جۇمىستارى مەن قالا ورنىندا قازبا جۇمىستارىن ءجۇرگىزۋ, تابىلعان قۇندى جادىگەرلەر نەگىزىندە مۋزەي عيماراتىن كەڭەيتۋ, اسپان استى مۋزەيىن اشۋ – ەلباسى ماقالاسىنداعى ەل يگىلىگى ءۇشىن ىستەلەتىن باستى شارالاردىڭ باستاماسى. ەلباسى ماقالاسىنداعى ەل ءۇشىن ەڭبەك ەتكەن تاريحي تۇلعالارىمىزدىڭ ەسىمدەرىن ەل جادىندا جاڭعىرتۋ, كەيىنگى ۇرپاق جادىندا ماڭگى قالدىرۋ يدەياسى ءبىزدىڭ وڭىردە ءداستۇرلى تۇردە اتقارىلىپ كەلەدى», دەدى ول.
اكتيۆ جيىنىن قورىتىندىلاعان وبلىس اكىمى پرەزيدەنت ماقالاسىندا جۇكتەلگەن ءمىندەتتەردى ىسكە اسىرۋ ءۇشىن جەرگىلىكتى مەملەكەتتىك ورگاندارعا ناقتى تاپسىرمالار بەردى.
باقىتگۇل باباش,
«ەگەمەن قازاقستان»
اتىراۋ