ەڭبەكتە پرەزيدەنت كوپتەگەن كوكەيكەستى ماسەلەلەردى قوپارا قوزعاعان. اتاپ ايتقاندا, مىقتى ءارى جاۋاپكەرشىلىگى جوعارى ءبىرتۇتاس ۇلت بولۋ ءۇشىن بولاشاققا قالاي قادام باساتىنىمىز جانە بۇقارالىق سانانى قالاي وزگەرتەتىنىمىز تۋرالى ويلارىمەن بولىسكەن.
پرەزيدەنت ءوز ەڭبەگىندە تاپتاۋرىن قاعيدالاردان ارىلماساق كوش باسىنداعى ەلدەرمەن تەرەزەمىزدى تەڭەپ, يىق تىرەستىرە المايتىنىمىزدى ەسكەرتەدى. نۇرسۇلتان نازارباەۆ ءۇش نارسەنىڭ – تارلان تاريحتىڭ, جاسامپاز بۇگىنگى كۇن مەن جارقىن بولاشاقتىڭ ۇيلەسىمىنە قول جەتكىزۋگە ۇندەيدى حالىقتى. ەڭ الدىمەن, باسەكەلىك قابىلەتتى كۇشەيتۋىمىز كەرەكتىگىن ايتادى. اباي ءوزىنىڭ قارا سوزدەرىندە بۇرىنعى ءوتكەن بابالارىمىزدىڭ ونەگە تۇتاتىن قاسيەتتەرىنىڭ اراسىندا نامىسشىلدىعىن بولە اتاعان ەدى. باسەكەگە قابىلەتتىلىك دەگەندى ابدەن وڭايلاتىپ تۇسىندىرەتىن بولساق, وزگەلەر جاساعاندى ءبىز نەگە جاساي المايمىز, وزگەلەر يگەرگەندى ءبىز نەگە يگەرە المايمىز دەگەن نامىسشىلدىقتى بارىنەن بۇرىن اتاعانىمىز ءجون. قانىمىزعا سىڭگەن كوپتەگەن داعدىلار مەن قاساڭ قاعيدالاردى وزگەرتپەيىنشە, ءبىزدىڭ تولىققاندى جاڭعىرۋىمىز مۇمكىن ەمەس. ءار ءنارسەنى ۇتىمدى پايدالانۋدى ەلباسىمىز مىنەز-قۇلىقتىڭ پراگماتيزمى دەپ اتاعان. بولاشاعىڭدى جوسپارلاۋ, ىسىراپشىلدىق پەن استامشىلىققا, داڭعويلىق پەن كەردەڭدىككە جول بەرمەۋ دە وسى زامانعى پراگماتيزمنىڭ ناقتى كورىنىسى بولۋعا ءتيىس دەگەندى ايتادى ەلباسىمىز. جاڭعىرۋدىڭ ءوزى جاھاندىق الەممەن قابىسپايتىن داعدىلار مەن ادەتتەردەن ارىلۋدى بىلدىرەدى. سونىمەن ءبىرگە, ەڭبەكتە جانتالاسقا تولى مىنا زاماندا ءوزىمىزدىڭ ءتول ءبىتىمىمىزدى ساقتاي الۋدىڭ قانشىلىقتى ماڭىزدىلىعى دا ايتىلادى. ۇلتتىق سالت-داستۇرلەرىمىزدىڭ, ءتىلىمىز بەن مۋزىكامىزدىڭ, ادەبيەتىمىزدىڭ, جورالعىلارىمىزدىڭ قادىر-قاسيەتى اسپانداتا كورسەتىلگەن. «ۇلتتىق رۋحىمىز بويىمىزدا ماڭگى قالۋعا ءتيىس» – ەلباسىمىزدىڭ بۇل ءسوزى ءار قازاقتىڭ, ءار قازاقستاندىقتىڭ جۇرەگىندە جاتتالسا دەيمىز.
جاڭعىرۋدىڭ جارقىن جولىن دا وسى ەڭبەكتەن تابامىز: «ءبىز جاڭعىرۋ جولىندا بابالاردان ميراس بولىپ, قانىمىزعا سىڭگەن, بۇگىندە تامىرىمىزدا بۇلكىلدەپ جاتقان ىزگى قاسيەتتەردى قايتا تۇلەتۋىمىز كەرەك». ول قاسيەتتەر تامىرىمىزدا بار. تامىرىمىزدا بۇلكىلدەپ جاتقان سول قاسيەتتەردى قايتا تۇلەتسەك, جەرىمىز دە, ەلىمىز دە وزگەرەدى. ول ءۇشىن ءوزىمىز وزگەرۋگە ءتيىسپىز. ال وسى وڭاي ما؟ ءتىپتى دە وڭاي ەمەس. ەڭبەكتە ەلباسى ساياسي رەفورما مەن ەكونوميكالىق جاڭعىرۋدى قايتا تۇلەۋدىڭ ايرىقشا ماڭىزدى ەكى پروتسەسى دەي كەلەدى دە: «ەندى وسىنىڭ ءبارىنەن دە اۋقىمدى جانە ىرگەلى جۇمىستاردى باستاعالى وتىرمىز», دەپ قاداپ كورسەتەدى. ءيا, كەلىسپەسكە امالىڭىز جوق: ساياساتتى وزگەرتۋ دە قيىن, ەكونوميكانى وزگەرتۋ دە قيىن, بىراق سانانى وزگەرتۋ بارىنەن دە قيىن. ءبارى دە ويدان باستالادى. ويلاۋدان باستالادى. پرەزيدەنت ءبىزدىڭ بارشامىزدى جاڭاشا ويلاۋعا شاقىرىپ وتىر. جاڭاشا ويلاۋدىڭ ۇلگىسىن ءوزى كورسەتىپ وتىر.
ساۋىتبەك ابدراحمانوۆ,
پارلامەنت ءماجىلىسىنىڭ دەپۋتاتى