كەزدەسۋ بارىسىندا مەملەكەت باسشىسى ادىلەت مينيسترلىگىنىڭ 2016 جىلعى قىزمەتى تۋرالى ەسەبىن تىڭداپ, الداعى جۇمىس جوسپارلارىمەن تانىستى.
قازاقستان پرەزيدەنتىنە زاڭ جوباسىن جاساۋ جۇمىستارى جوسپارىنىڭ ورىندالۋى جونىندە مالىمەت بەرىلدى. بۇل رەتتە ەل پارلامەنتىنىڭ قاراۋىنا 18 زاڭ جوباسى ەنگىزىلگەن. م.بەكەتاەۆتىڭ مالىمەتى بويىنشا, بيىلعى ەكىنشى توقساننان باستاپ 28 زاڭ جوباسىن ۇسىنۋ جوسپارلانۋدا.
ەلباسى مەملەكەتتىك ورگان قىزمەتىنىڭ ناتيجەلەرىنە وڭ باعا بەردى.
وسى ورايدا نۇرسۇلتان نازارباەۆ ادىلەت مينيسترلىگى الدىندا تۇرعان, ۇلتتىق زاڭنامانى قالىپتاستىرۋعا بەلسەنە اتسالىسۋ, زاڭنامالىق جانە وزگە دە نورماتيۆتىك قۇقىقتىق اكتىلەرگە قۇقىقتىق ساراپتاما مەن تالداۋ جۇرگىزۋ, ەلىمىزدىڭ حالىقارالىق ارەناداعى قىزمەتىن قۇقىقتىق تۇرعىدان قامتاماسىز ەتۋ جانە زياتكەرلىك مەنشىك قۇقىعىن قورعاۋ سياقتى بىرقاتار ماڭىزدى مىندەتتەردى ايقىندادى.
ادىلەت ءمينيسترى مەملەكەت باسشىسىنا زاڭ شىعارۋ جانە ۇيلەستىرۋ جۇمىسى, اشىق فورماتتاعى زاڭ شىعارۋ جۇمىستارى جونىندەگى ۆەدومستۆوارالىق كوميسسيا قىزمەتى تۋرالى باياندادى. اتاپ ايتقاندا, بۇل ۆەدومستۆوارالىق كوميسسيا جۇمىسىنىڭ ۇدەرىسىن جۋرناليستەرگە ونلاين رەجىمىندە باقىلاۋعا, سونداي-اق وتىرىستاردىڭ قورىتىندىسى بويىنشا باق ءۇشىن بريفينگ ۇيىمداستىرۋعا مۇمكىندىك بەرەدى.
كەزدەسۋ قورىتىندىسى بويىنشا قازاقستان پرەزيدەنتى بىرقاتار ناقتى تاپسىرما بەردى.