وبلىس اكىمى جانسەيىت تۇيمەباەۆ جۇرگىزىپ وتىرعان ماجىلىستە ءوڭىردىڭ ەنەرگەتيكالىق ينفراقۇرىلىمىن دامىتۋ, ەنەرگورەسۋرستارمەن قامتاماسىز ەتۋ, ەلەكتر ەنەرگياسى مەن تابيعي گاز تاريفتەرى ماسەلەلەرى قارالدى. ماجىلىستە ءسوز العان مينيستر وبلىستىڭ اسا ماڭىزدى مينەرالدى-شيكىزاتتىق الەۋەتى مول ەكەنىن اتاپ ءوتىپ, الداعى جوسپارلارعا توقتالدى.
«وڭتۇستىك قازاقستان وبلىسى ۋران ءوندىرۋ كولەمى بويىنشا كوشباسشى بولىپ تابىلادى. وبلىستا 8 ۋران ءوندىرۋشى كاسىپورىن جۇمىس ىستەيدى. بىلتىرعى جىلى رەسپۋبليكا بويىنشا جالپى 24,6 مىڭ توننا ۋران, ونىڭ ىشىندە وڭتۇستىك قازاقستان وبلىسىندا شامامەن 19 مىڭ توننا ۋران ءوندىرىلدى. ال ەلىمىزدىڭ وڭدەۋ ونەركاسىبىنىڭ نەگىزگى كومپونەنتتەرىنىڭ ءبىرى ءۇش مۇناي وڭدەۋ زاۋىتى بولىپ تابىلادى. ولاردىڭ ىشىندە, شىمكەنت مۇناي وڭدەۋ زاۋىتى ءوڭىر ەكونوميكاسىنا ءوز ۇلەسىن قوسۋدا»,-دەدى مينيستر.
ايتا كەتەيىك, بىلتىرعى جىلى رەسپۋبليكادا 14,5 ملن. توننا مۇناي وڭدەلسە, ونىڭ ىشىندە شىمكەنت زاۋىتى 4,5 ملن. توننا مۇناي وڭدەگەن. ونەركاسىپتى دامىتۋ ءۇشىن قاجەتتى ينفراقۇرىلىممەن قامتاماسىز ەتىپ, ساپاسىن جاقسارتۋدى ايتقان ايماق باسشىسى جانسەيىت تۇيمەباەۆ ەلەكتر ەنەرگياسى مەن تابيعي گازدىڭ تاريفتەرى تۋرالى ءسوز قوزعادى.
«وڭتۇستىك قازاقستان وبلىسى بويىنشا ەلەكتر قۋاتىنا جالپى قاجەتتىلىك ورتاشا ەسەپپەن ساعاتىنا 400 مۆت قۇرايدى. ونىڭ 30 پايىزى ىشكى كوزدەر ەسەبىنەن الىنسا, 70 پايىزدان استام بولىگى ەلىمىزدىڭ سولتۇستىك وڭىرلەرىنەن تاسىمالدانادى. وڭتۇستىك قازاقستان وبلىسىندا زاڭدى تۇلعالارعا ارنالعان ەلەكتر ەنەرگيانىڭ تاريفتەرى ەلىمىزدىڭ باسقا وڭىرلەرىمەن سالىستىرعاندا ەڭ جوعارى دەڭگەيدە. بۇل ءوز كەزەگىندە وبلىستا وندىرىلگەن تاۋارلاردىڭ وزىندىك قۇنىنىڭ جوعارى بولۋىنا, باسەكەگە قابىلەتتىلىگىنىڭ تومەندەۋىنە, حالىقتى جۇمىسپەن قامتۋعا, ءوڭىردىڭ ينۆەستيتسيالىق تارتىمدىلىعىن تومەندەۋىنە اكەلىپ وتىر»,-دەدى جانسەيىت قانسەيىت ۇلى.
وسىعان بايلانىستى, سولتۇستىك ەنەرگيا كوزدەرىنەن الىناتىن ەلەكترەنەرگيانىڭ قۇنىن تومەندەتۋ, ەلەكتر قۋاتىنىڭ نارىعىن 2018 جىلدان باستاپ ەنگىزۋدى قاراستىرۋ, جاڭارتىلاتىن ەنەرگيا كوزدەرىن وندىرەتىن جوبالاردى جۇزەگە اسىرۋ ءۇشىن ەلەكتر ەنەرگياسىنا تىركەلگەن تاريفتەرگە وزگەرىستەر ەنگىزۋدى جەدەلدەتۋ ۇسىنىلدى.
ماجىلىستە وبلىس اكىمىنىڭ ورىنباسارى جاقىپ بوكەنباەۆ ايماقتاعى ەلدى مەكەندەردىڭ ەلەكتر ەنەرگياسى مەن تابيعي گازبەن قامتىلۋى بويىنشا 2017-2020 جىلدار ارالىعىندا اتقارىلاتىن جۇمىستار تۋرالى بايانداما جاسادى.
ونىڭ ايتۋىنشا, وبلىس تۇتىنۋشىلارىن ساپالى جانە قاجەتتى كولەمدە ەلەكتر ەنەرگياسىمەن قامتاماسىز ەتۋ ءۇشىن شىمكەنت قالاسىندا «بوزارىق», «استانا 1,2» قوسالقى ستانتسيالارىنىڭ قۇرىلىسى جۇرگىزىلىپ جاتىر. وسىنىڭ ناتيجەسىندە قالاداعى ونەركاسىپ ورىندارى مەن 430 مىڭ تۇرعىن ساپالى ەلەكتر قۋاتىمەن قامتاماسىز ەتىلەتىن بولادى.
بۇدان بولەك, وڭىردە 7 قوسالقى ەلەكتر ستانتسيانىڭ قۇرىلىسىن جۇرگىزۋ جوسپارلانىپ وتىر.
وڭتۇستىك ءوڭىرىنىڭ تابيعي گازعا دەگەن جىلدىق قاجەتتىلىگى ورتاشا ەسەپپەن 1 ملرد. م3 قۇرايدى. ال گازداندىرۋ دەڭگەيى قازىرگى تاڭدا 62 پايىزعا جەتىپ وتىر.
جالپى 2021 جىلعا دەيىن تابيعي گازبەن قامتىلعان ەلدىمەكەندەر سانى 683-كە جەتىپ, 81 پايىزدى نەمەسە 2 ملن. 720 مىڭ تۇرعىندى قۇراۋى ءتيىس.
ونىڭ ىشىندە 2020 جىلعا قاراي تۇركىستان قالاسى 100 پايىزعا گازداندىرىلاتىن بولادى.
وبلىستا تابيعي گازدىڭ ءتاريفى ەلىمىزدىڭ باسقا وڭىرلەرىمەن سالىستىرعاندا جوعارى. بۇل ءوڭىر ينۆەستيتسيالىق تارتىمدىلىعىن تومەندەتىپ, ەكونوميكالىق وسىمگە كەرى اسەرىن تيگىزىپ وتىر. سوندىقتان تابيعي گاز ءتاريفىن ارزانداتۋ ماقساتىندا, ساتىپ الۋ مەن تاسىمالداۋ قۇنىن تومەندەتۋ نەمەسە رەسپۋبليكا بويىنشا ورتاق بىرىڭعاي تاريف ەنگىزۋدى قاراستىرۋ ۇسىنىلدى.
وسى رەتتە مينيستر قانات بوزىمباەۆ 2017 جىلعا ۇلتتىق قور قاراجاتىنان 734 ملن. تەڭگە كولەمىندە سارىاعاش اۋدانىنداعى بىرقاتار ەلدى مەكەندەرگە گاز قۇبىرلارىن سالۋ ءۇشىن قاراجات قاراستىرىلعانىن مالىمدەدى.
سونداي-اق ول ەلەكتر جانە گاز تاريفىنە بايلانىستى ۇسىنىسقا وراي ارنايى جۇمىسشى توبىن قۇرىپ, زەرتتەۋ-زەردەلەۋ جۇمىستارىن باستاۋعا كەڭەس بەردى.