«قازمۇنايگاز» اق-نىڭ باسشىلىعى مينيسترگە جوبانىڭ ءبىرىنشى كەزەڭى بويىنشا اتقارىلعان مەحانيكالىق جۇمىستاردىڭ اياقتالىپ, ەكىنشى كەزەڭ نىساندارىندا قۇرىلىس-مونتاجداۋ جۇمىستارىن جۇرگىزۋ كەستەسى تۋرالى باياندادى. بۇگىندە «پەتروقازاقستان» مۇناي وڭدەۋ زاۋىتىنداعى قۇرىلىس جۇمىستارىنا 4 مىڭعا جۋىق مامان تارتىلعان. ونىڭ ءبىر مىڭدايى قازاقستاندىق ماماندار.
ەستەرىڭىزگە سالا كەتەيىك, بۇگىندە ەلىمىزدەگى ءۇش بىردەي مۇناي وڭدەۋ زاۋىتىندا جاڭعىرتۋ جۇمىستارى جالعاسىپ جاتىر. اعىمداعى جىلدىڭ ەكىنشى جارتىجىلدىعىندا پاۆلودار مۇناي-حيميا جانە اتىراۋ مۇناي وڭدەۋ زاۋىتتارىن جاڭعىرتۋ جۇمىستارى اياقتالادى دەپ كۇتىلۋدە. ال شىمكەنت مۇناي وڭدەۋ زاۋىتىن جاڭعىرتۋ جۇمىستارىنىڭ اياقتالۋ مەرزىمى 2018 جىلدىڭ ءبىرىنشى جارتجىلدىعىنا جوسپارلانىپ وتىر.
«ارينە, ءۇش زاۋىتتى جاڭعىرتۋ جۇمىستارىنا قىرۋار قارجى ءبولىنىپ وتىر. ياعني, جاڭعىرتۋ نەسيە رەسۋرستارىن تارتۋ جانە اتالعان زاۋىتتاردىڭ ءوز قارجىسى ەسەبىنەن جۇرگىزىلۋدە. جالپى جاڭعىرتۋ جۇمىستارى تولىعىمەن اياقتالسا, ەلىمىزدەگى بەنزين ساپاسى جاقسارىپ, ديزەل جانە كەروسين ونىمدەرىنىڭ باعاسى تۇراقتاناتىن بولادى. ەڭ باستىسى - 2019 جىلى قازاقستان رەسەي بەنزينىنە تاۋەلدىلىكتەن ارىلىپ, ەۋرازيالىق وداقتىڭ تالاپتارىنا ساي ءونىم وندىرە باستايمىز», - دەدى ەنەرگەتيكا ءمينيسترى قانات بوزىمباەۆ.
ايتا كەتەيىك, بۇگىندە رەسەي فەدەراتسياسىنان ىشكى نارىققا تاسىمالدىڭ 30 پايىزدىق تاۋەلدىلىگى بار. ەگەر 70 پايىزدىق تۇتىنۋشىلىق ءبىزدىڭ ءۇش مۇناي وڭدەۋ زاۋىتتارىنىڭ ەسەبىنەن قامتامسىز ەتىلسە, 30 پايىز وتىن سىرتتان اكەلىنەدى.
ءمينيستردىڭ قاتىسۋمەن وتكەن ارنايى جيىندا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ كəسىپورىن باسشىلىعىنداعى قىتايلىق ينۆەستورلارعا ەڭ وزەكتى ەكى ماسەلەگە نازار اۋدارۋدى ەسكەرتتى.
«پەتروقازاقستان» مۇناي وڭدەۋ زاۋىتى وبلىسىمىزداعى ەڭ ءىرى سالىق تولەۋشى كاسىپورىننىڭ بىرىنە اينالىپ وتىر. اتالعان كاسىپورىندا جەرگىلىكتى جۇمىسشىلاردىڭ ۇلەسى كوبىرەك بولۋى كەرەك. ياعني جەرگىلىكتى مامانداردى جۇمىسپەن قامتۋ ماقساتىندا قاجەتتى كاسىپتىك-تەحنيكالىق مامانداردى دايارلاۋ ماسەلەسىنە كوڭىل بولۋگە كەڭەس بەرەر ەدىم. ول ءۇشىن وبلىس ورتالىعىنداعى كاسىپتىك تەحنيكالىق مامانداندىرىلعان كوللەدجدى ءوز قامقورلىقتارىڭىزعا الىپ, جۇمىس جاساعاندارىڭىز دۇرىس. سونداي-اق جەرگىلىكتى جۇمىسشىلاردى تاجىريبە الماسۋ ماقساتىندا شەتەلگە جىبەرۋ ءىسىن جولعا قويعان ابزال», - دەدى جانسەيىت قانسەيىت ۇلى.
بيىل ەكىنشى جارتىجىلدىقتا شىمكەنت مۇناي وڭدەۋ زاۋىتىن جاڭعىرتۋدىڭ ءبىرىنشى كەزەڭى اياقتالادى. سودان كەيىن ەلىمىزدە ەۋرو-4, ەۋرو-5 ستاندارتتارىنا ساي جانارماي مەن ديزەل وتىنى شىعارىلا باستايدى.
مۇنان سوڭ ەنەرگەتيكا ءمينيسترى قانات بوزىمباەۆ باستاعان جۇمىسشى توپ «نۇرلى جول» باعدارلاماسى اياسىندا 2015 جىلى پايدالانۋعا بەرىلگەن شىمكەنت قالاسىنداعى 160 گكال/ساع. بولاتىن قازاندىقتى ارالاپ كوردى. قازاندىق بۇگىندە اكىمشىلىك ىسكەرلىك ورتالىعىنداعى 38 كوپقاباتتى تۇرعىن ءۇيدى جانە 6 اكىمشىلىك عيماراتتى جىلۋمەن قامتاماسىز ەتىپ وتىر. 2015 جىلى پايدالانۋعا بەرىلگەن قازاندىق گازبەن جىلىتىلادى. نىساننىڭ قۇرىلىسىنا 3,4 ملرد تەڭگە جۇمسالعان.