استانادا وتكەن جىلعى قازان ايىندا باستالعان 2010-2011 جىلدارعا ارنالعان جىلۋ بەرۋ ماۋسىمى اياقتالدى. كۇزگى-قىسقى ماۋسىمنىڭ قورىتىندىسى بويىنشا كەشە استانا اكىمدىگىندە ەلوردا اكىمى يمانعالي تاسماعامبەتوۆتىڭ توراعالىعىمەن وتكەن جينالىستا جىلۋ بەرۋ ماۋسىمىنا دايىندىق جانە ونى وتكىزۋ جونىندەگى قالالىق شتابتىڭ جەتەكشىسى, اكىمنىڭ ورىنباسارى ۆاسيلي كرىلوۆتىڭ جانە قالانىڭ ءبىرقاتار باسقارمالارى مەن كوممۋنالدىق كاسىپورىندارى جەتەكشىلەرىنىڭ ەسەبى تىڭدالدى.
شتابتىڭ مالىمەتتەرىنە ءسايكەس, 2010-2011 جىلعى جىلۋ بەرۋ ماۋسىمىنىڭ باسىنا تۇرعىن ءۇيلەر ءجۇز پايىزعا دايىن بولسا, 1836 تۇرعىن ءۇيدىڭ 63-ىنە ەسكەرتۋلەر جاسالعان دايىندىق پاسپورتى تابىس ەتىلگەن. سونداي-اق جىلۋ بەرۋ ماۋسىمى باستالعان سوڭ 52 جاڭا كوپ قاباتتى تۇرعىن ءۇي كەشەنى پايدالانۋعا بەرىلگەن.
ەسەپتى كەزەڭدە «051 قىزمەتىنە» ورتالىقتانعان جانە ورتالىقتانباعان جىلۋ بەرۋ جۇيەسىنە قوسىلعان ۇيلەردە تۇراتىن حالىقتان نەگىزىنەن پاتەردە جىلۋ بولماۋ, جىلۋ بەرۋدىڭ تومەن پارامەترلەرىنە قاتىستى 863 ءوتىنىش پەن شاعىمدار كەلىپ تۇسكەن. ولار بويىنشا ءتيىستى شارالار قابىلدانىپ, 2009-2010 جىلدارعى جىلۋ بەرۋ ماۋسىمىندا بۇل كورسەتكىش 738 بولعان-تىن. ءبىلىم, مادەنيەت, دەنساۋلىق ساقتاۋ نىساندارىنىڭ 2010-2011 جىلدارداعى جىلۋ بەرۋ ماۋسىمىنا دايىندىعى اسا جوعارى دەڭگەيدە بولعان. وسى كەزەڭدە مەملەكەتتىك سانيتارلىق-ەپيدەميولوگيالىق قاداعالاۋ دەپارتامەنتى ءبىلىم باسقارماسىمەن بىرلەسىپ 2007-2009 جىلداردا پايدالانۋعا بەرىلگەن جالپى ءبىلىم بەرەتىن مەكتەپتەردەگى سانيتارلىق نورمالار مەن تەمپەراتۋرالىق رەجىمگە سايكەستىگىن تەكسەرىپ, مونيتورينگ جۇرگىزگەن.
ەلوردانىڭ ورتالىقتانباعان جىلۋ بەرۋ جۇيەسى ايماعىندا 529 قازانى بار 306 اۆتونومدى قازاندىق جىلۋ تاراتسا, ونىڭ ىشىندە 239 (400 قازان) سۇيىق وتىنمەن جانە 67 (129 قازان) قاتتى وتىنمەن جۇمىس جاسايدى. جىلۋمەن قامتۋدىڭ تاۋەلسىز كەستەسىنە ساي جۇمىس ىستەيتىن كوپ قاباتتى تۇرعىن ءۇي كەشەندەرىنىڭ 251-دەن 303-كە كوبەيۋىنە بايلانىستى 2010 جىلعى 16 ساۋىردەن باستاپ «استانا جىلۋترانزيت» اق بازاسىندا پيك توراعالارى مەن قىزمەت كورسەتەتىن وزگە دە مەكەمەلەر ءۇشىن جىلۋ بەرۋدى باسقارۋدىڭ اۆتوماتتى ءجۇيەسى مەن ەسەپتەۋ قۇرالدارىن پايدالانۋ بويىنشا ارنايى كۋرستار ۇيىمداستىرىلىپ, ول جەردە 121 مامان دايارلانعان.
جەكە تۇرعىن ءۇي سەكتورىن سۋمەن قامتۋ ءۇشىن 593 سۋ كولونكاسى ورناتىلىپ, 411 كولونكا اۋىستىرىلعان. كارىز كوللەكتورلارىنىڭ جۇمىسىن جاقسارتۋ مەن ولاردىڭ ءوتكىزۋ مۇمكىندىكتەرىن قايتا قالپىنا كەلتىرۋ ماقساتىندا اي سايىن ماگيسترالدى كوللەكتورلارعا گيدروديناميكالىق تازارتىلۋ جاسالىپ وتىرسا, وسى جىلۋ بەرۋ ماۋسىمىندا 154 شاقىرىم كوللەكتور تازارتىلعان.
قازىرگى تاڭدا قالانىڭ بارلىق كوممۋنالدىق قىزمەتتەرى مەن ەنەرگەتيكالىق كەشەن كاسىپورىندارى 2011-2012 جىلدارداعى جىلۋ بەرۋ ماۋسىمىنا دايىندىق شەڭبەرىندە جوندەۋ باعدارلامالارىن بەكىتىپ, ونى جۇزەگە اسىرۋدى باستادى.
ءابدىراحمان قىدىربەك.