ءماجىلىس دەپۋتاتى ساكەن وتەباەۆ پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, يسپانيانىڭ «Patents Talgo» كومپانياسىمەن بىرلەسىپ, زاماناۋي تالاپتارعا ساي جولاۋشىلار ۆاگوندارىن شىعاراتىن وتاندىق «تۇلپار-Talgo» زاۋىتى جىل سايىن 400-دەن استام جولاۋشى ۆاگوندارىن شىعارىپ جاتقانىن ايتا كەلىپ, الايدا, استانا مەن الماتىدان ورال جانە اقتاۋ قالالارىنا قاتىنايتىن «تۇلپار-Talgo» پويىزدارى ءالى كۇنگە بولماي وتىرعانىنا وكىنىش بىلدىرگەن.
سونداي-اق, دەپۋتات الماتى – سەمەي – پاۆلودار, استانا – ارقالىق, الماتى – سارىاعاش جولاۋشىلار پويىزدارىنىڭ دا ەسكى ەكەندىگىن تىلگە تيەك ەتكەن. باسقا وڭىرلەردە دە وسىنداي جاعدايدىڭ بار ەكەنىن ايتا كەلىپ, «قازاقستان تەمىر جولى» ۇلتتىق كومپانياسى» اق-تىڭ جالپى وڭىرلەر باعدارلاماسىن قايتا قاراپ, ەسكى جولاۋشىلار ۆاگوندارىن جاڭا ۆاگوندارعا اۋىستىرۋ ماسەلەسىن قاراستىرۋدى سۇرايتىنىن ايتقان.
ساۋالعا پرەمەر-مينيستر باقىتجان ساعىنتاەۆتان مىناداي جاۋاپ كەلدى: «قازىرگى ۋاقىتتا قىزمەت كورسەتۋ ساپاسىن جاقسارتۋ جانە جولاۋشىلاردىڭ جولدا بولۋ ۋاقىتىن قىسقارتۋ ماقساتىندا 13 باعىت بويىنشا, ونىڭ ىشىندە 2016 جىلعى 11 جەلتوقساننان باستاپ الماتى–استانا باعىتى بويىنشا جانە 2017 جىلعى 1 قاڭتاردان باستاپ الماتى – شىمكەنت باعىتى بويىنشا «تۇلپار-تالگو» جشس ۆاگوندارىنان جۇردەك جولاۋشىلار پويىزدارىنىڭ قاتىناۋى ۇيىمداستىرىلىپ وتىر. سونداي-اق, 2017 جىلدىڭ ءبىرىنشى جارتى جىلدىعىندا جوعارىدا كورسەتىلگەن ۆاگونداردان استانا – ورال جانە الماتى – ورال باعىتتارىنا پويىزداردىڭ قاتىناۋىن ۇيىمداستىرۋ جوسپارلانعان. بۇدان باسقا, ەكسپو-2017 حالىقارالىق كورمەسىن وتكىزۋ كەزىندە الماتى – قوستاناي, استانا – اقتاۋ, استانا – اتىراۋ, استانا – شىمكەنت جانە استانا – التىنكول باعىتتارى بويىنشا قوسىمشا پويىزداردى ىسكە قوسۋ جوسپارلانۋدا.
ءسىزدىڭ جازعاندارىڭىزدى ەسكەرە وتىرىپ, جولاۋشىلار ۆاگوندارىن جاڭارتۋ بويىنشا, ونىڭ ىشىندە وتاندىق ءوندىرىستىڭ ۆاگوندارىنان جۇردەك پويىزداردىڭ سانىن ارتتىرۋ جونىندە جوسپارلى جۇمىستار جۇرگىزىلۋدە», دەلىنگەن جاۋاپتا.
تەمىر جول قاتىناسى ماسەلەسىنە بايلانىستى تاعى ءبىر ساۋالدى دەپۋتات كارىباي مۇسىرمان دا جاساعان ەدى. ول ينۆەستيتسيالار جانە دامۋ ءمينيسترى جەڭىس قاسىمبەككە ساۋال جولداپ, قىزىلوردا – كوكشەتاۋ باعىتىندا قاتىنايتىن پويىزدىڭ باعىتىن كوكشەتاۋدان پەتروپاۆلعا دەيىن ۇزارتۋ قاجەتتىگىن ايتقان بولاتىن. دەپۋتاتتىق ساۋالدا:
«ەلباسىمىزدىڭ باستاماسىمەن 2014 جىلدان بەرى جۇزەگە اسىرىلىپ كەلە جاتقان «ءماڭگىلىك ەل جاستارى – يندۋسترياعا», «سەرپىن-2050» الەۋمەتتىك جوبالارى بويىنشا بۇگىنگى تاڭدا پەتروپاۆل قالاسىنىڭ جوعارى جانە ورتا ارناۋلى وقۋ ورىندارىندا ەلىمىزدىڭ جۇمىس كۇشى ارتىق وڭىرلەرىنەن كەلگەن 1036 ستۋدەنت تەگىن ءبىلىم الىپ ءجۇر. ولاردىڭ كوپشىلىگى وڭتۇستىك قازاقستان, جامبىل جانە قىزىلوردا وبلىستارىنان. سەرپىندىكتەردىڭ وكىلدەرى جۋىردا بىزگە كەلىپ, ءوزدەرىنىڭ ءارتۇرلى تۇرمىستىق سەبەپتەرمەن, سونداي-اق, قىسقى جانە جازعى كانيكۋلدار كەزىندە تۋعان وڭىرلەرىنە بارىپ-قايتۋى قيىنعا سوعىپ تۇرعاندىعىنا شاعىمداندى. ءويتكەنى, قازىر ەلىمىزدىڭ وڭتۇستىك جانە سولتۇستىك ايماقتارى اراسىندا تۋرا قاتىنايتىن جالعىز-اق قىزىلوردا – كوكشەتاۋ پويىزى بار. بۇل پويىز ءبىر كەزدە قىزىلوردا – پەتروپاۆل پويىزى دەپ اتالىپ, پەتروپاۆل قالاسىنا دەيىن قاتىناعان بولاتىن. الايدا, كەيىن «پەتروپاۆلعا دەيىن قاتىنايتىن جولاۋشىلار جەتكىلىكسىز بولعاندىقتان, ءوزىن ءوزى ەكونوميكالىق جاعىنان اقتامادى» دەگەن سەبەپپەن ونىڭ باعىتى قىسقارتىلعان ەدى.
ەندى جوعارىدا اتالعان الەۋمەتتىك باعدارلامالار الداعى ۋاقىتتا جالعاسىن تاباتىندىعىن ەسكەرسەك, سولتۇستىك جانە باسقا وڭىرلەر اراسىندا پويىزبەن قاتىنايتىن جولاۋشىلار اعىنى جىلدان-جىلعا ۇلعايا تۇسەتىندىگى ايقىن. سوندىقتان دا «سەرپىن-2050» الەۋمەتتىك جوباسى مەن «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسىنىڭ تيىمدىلىگىن ارتتىرۋ ماقساتىندا قىزىلوردا – كوكشەتاۋ پويىزىنىڭ باعىتىن پەتروپاۆل قالاسىنىڭ تەمىر جول ستانساسىنا دەيىن قايتادان ۇزارتۋدى وتىنەمىن», دەلىنگەن.
سول ساۋالعا مينيستر ج.قاسىمبەكتىڭ اتىنان مىناداي جاۋاپ كەلدى: «ينۆەستيتسيالار جانە دامۋ مينيسترلىگى ءسىزدىڭ دەپۋتاتتىق ساۋالىڭىزدى قاراستىرىپ, كەلەسىنى حابارلايدى: وڭتۇستىك وڭىرلەردەن ءسولتۇستىك وڭىرگە تىكەلەي جەتۋ ءۇشىن تەمىر جول كولىگىنە دەگەن حالىقتىڭ سۇرانىسىن قاناعاتتاندىرۋ ماقساتىندا كۇنارا قاتىنايتىن قىزىلوردا – استانا باعىتىنداعى №75/76 جولاۋشىلار پويىزىنىڭ جولىن پەتروپاۆل قالاسىنا دەيىن ۇزارتۋ بويىنشا جۇمىستار جۇرگىزىلۋدە. بۇل, ءوز كەزەگىندە جول ءجۇرۋ كەستەسىن رەسەي تارابىمەن قىسقا مەرزىمدە كەلىسۋ جانە 2017 جىلعا بولىنگەن رەسپۋبليكالىق بيۋدجەت قاراجاتى ەسەبىنەن قوسىمشا قارجى قاراستىرۋ سەكىلدى شارالاردى قامتيدى. اتالعان جۇمىستار وڭ شەشىمىن تاپقان جاعدايدا, قىزىلوردا – استانا باعىتىنداعى №75/76 جولاۋشىلار پويىزىنىڭ جولىن پەتروپاۆل قالاسىنا دەيىن ۇزارتۋ جوسپارلانىپ وتىر», دەلىنگەن جاۋاپتا.
ءبىر قۋانارلىعى, بۇگىندە اتالعان پويىز پەتروپاۆلعا دەيىن جۇرە باستادى. ءسويتىپ, دەپۋتاتتاردىڭ ارالاسۋىمەن تەمىر جول سالاسىنداعى كەيبىر حالىق قاجەتىن وتەيتىن شارالار جۇزەگە اسۋدا.
ازىرلەگەن
جاقسىباي سامرات,
«ەگەمەن قازاقستان»