پارلامەنت ءماجىلىسىنىڭ توراعاسى نۇرلان نىعماتۋلين يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مودجتابۋ داميرچيلۋدى قابىلدادى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋدە ەكىجاقتى قارىم-قاتىناسپەن قاتار, پارلامەنتارالىق ۇنقاتىسۋدى نىعايتۋدىڭ ماڭىزدى ماسەلەلەرى تالقىلاندى.
ءماجىلىس سپيكەرى ەلشىنى اتالعان مەملەكەتتىڭ ۇلتتىق كۇنى – يسلام رەۆوليۋتسياسىنىڭ 38 جىلدىعىمەن جانە ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولۋىمەن قۇتتىقتادى. ءماجىلىس سپيكەرىنىڭ ايتۋىنشا, قازاقستان پرەزيدەنتى نۇرسۇلتان نازارباەۆتىڭ يرانعا جانە يران پرەزيدەنتى حاسان ءرۋحانيدىڭ قازاقستانعا وتكەن جىلعى رەسمي ساپارلارى ەكى ەل بايلانىسىنىڭ نىعايۋىنا ايرىقشا سەرپىن بەردى.
يران ەلشىسىمەن حالىقارالىق ماسەلەلەردى تالقىلاۋ بارىسىندا ن.نىعماتۋلين يرانمەن تاتۋ كورشىلىك قاتىناستاردى دامىتۋ ءبىزدىڭ ەلىمىزدىڭ ەڭ ماڭىزدى سىرتقى ساياسي باسىمدىقتارىنىڭ ءبىرى ەكەنىن اتاپ ءوتتى. سونىمەن قاتار, قازاقستاننىڭ حالىقارالىق جانە ايماقتىق وزەكتى ماسەلەلەر توڭىرەگىندەگى بەلسەندى جانە سىندارلى ۇستانىمىنا توقتالدى. ناقتىلاي كەتەتىن بولساق, ەلباسىنىڭ باستاماسىمەن قازاقستاننىڭ يران يادرولىق باعدارلاماسى اياسىندا كەلىسسوز الاڭىن ۇسىنۋى اڭگىمە وزەگىنە اينالدى.
ءماجىلىس سپيكەرى, سونداي-اق قازاقستاننىڭ باستاماسىمەن استانا قالاسىندا ازىق-ت ۇلىك قاۋىپسىزدىگى جونىندەگى يسلام ۇيىمىنىڭ قۇرىلۋىن قولداعانى ءۇشىن يران مەملەكەتىنە العىسىن ءبىلدىردى. «قازاقستان پرەزيدەنتى 2017 جىلعى 10-11 قىركۇيەكتە استانادا عىلىم جانە تەحنولوگيا بويىنشا يىۇ ءسامميتىن شاقىرۋ تۋرالى باستاما كوتەردى. ءبىز وسى جوعارى دەڭگەيدەگى ماڭىزدى ءىس-شاراعا تەگەران بەلسەندى تۇردە قاتىسادى دەپ ۇمىتتەنەمىز», دەدى ن.نىعماتۋلين.
سيرياداعى جاعداي تۋرالى ايتا كەلىپ, ءماجىلىس توراعاسى ونىڭ ايماقتىق پروبلەمالار شەڭبەرىنە سىيمايتىن, الەمدىك دەڭگەيدەگى كۇردەلى داعدارىستاردىڭ ءبىرى ەكەنىن ايتتى. «قازاقستان بۇل جانجالدى رەتتەۋگە باعىتتالعان حالىقارالىق قوعامداستىق قابىلداعان شارالاردى قولدايدى», دەدى.
ءوز كەزەگىندە م.داميرچيلۋ, يراننىڭ قازاقستان پرەزيدەنتى نۇرسۇلتان نازارباەۆتىڭ حالىقارالىق جانە ايماقتىق ماسەلەلەردى شەشۋ جولىنداعى بارلىق باستامالارىن قۇپتايتىندىعىن جەتكىزدى.
پارلامەنتارالىق دەڭگەيدەگى جۇمىس جايىن ءسوز ەتكەندە, ءماجىلىس توراعاسى وسى سەسسيا سوڭىنا دەيىن پارلامەنتتىڭ الدىندا ماڭىزدى رەفورمالاردى زاڭنامالىق قولداۋ بويىنشا اۋقىمدى جۇمىستار تۇرعانىن اتاپ كورسەتتى.كەزدەسۋ يەلەرى پارلامەنتارالىق ءتيىمدى بايلانىس ەكىجاقتى قارىم-قاتىناستاردى ودان ءارى تەرەڭدەتۋگە سەپتىگىن تيگىزەتىنىنە سەنىمدى.