ورتالىق مەملەكەتتىك مۋزەيدە جاس سۋرەتشىلەر دانيار ءجانە اسىلگۇل بايداراليندەردىڭ وتباسىلىق كورمەسى اشىلدى. امەريكاعا قونىس اۋدارعان قازاقستاننىڭ بەلگىلى بالەتمەيستەرى جانات بايداراليننىڭ بالاسى دانيار ۇزاق جىلدار امەريكادا تۇرعاندىقتان, قازاق تاريحى مەن مادەنيەتىن تانىستىراتىن العاشقى كورمەسىن ىلگەرىرەكتە امەريكالىقتارعا ارناپ ۇيىمداستىرسا, بۇل – ولاردىڭ قازاقستاندا وتكىزىپ وتىرعان تۇڭعىش ۇلكەن كورمەسى. كورمە اياسىندا د.ءبايداراليننىڭ «ساداقشىلىق – يسكۋسستۆو يزگوتوۆلەنيا ي سترەلبى يز كازاحسكوگو كوننوگو لۋكا» اتتى كىتابىنىڭ تۇساۋكەسەرى بولدى. سونداي-اق, دانياردىڭ سۋرەت ونەرىندەگى تاقىرىبى كوشپەلىلەر مادەنيەتى جانە قازاق قارۋ-جاراعىنىڭ تاريحى بولعاندىقتان, كورمەگە كەلگەندەرگە ات ۇستىندە اتىلاتىن ساداقتى پايدالانۋ ءتاسىلىن كورسەتتى.
سۋرەتشىلەر قازاق ۇلتتىق مادەنيەتى مەن تاريحىنا قاتىستى تۋىندىلارىندا ۇنەمى ەرەكشە كومپوزيتسيالىق شەشىمدەردى ىزدەستىرەدى. د.بايداراليننىڭ جۇمىستارى بابالارىمىز قالدىرعان باي مۇراعا نەگىزدەلگەن جانە ول سۋرەتشىنىڭ ءوز ويىمەن شەبەر ۇشتاستىرىلعان. كارتينالار, نەگىزىنەن, ءتۇرلى-ءتۇستى جانە اق-قارا گاممادا سالىنعان. كورمەگە قويىلعان جۇمىستاردا حالىق تۇرمىس-تىرشىلىگىنىڭ ۇلتتىق ناقىشتارى, جەرىن, ەلىن قورعاعان باتىرلاردىڭ قايسارلىعى مەن پاتريوتتىق رۋحى سيپاتتالادى.
ال اسىلگۇل بايدارالينانىڭ جۇمىستارى كەسكىندەمە ءجانە گرافيكا تەحنيكاسىندا ورىندالعان: ايەل مەن انا تاقىرىبىنا ارنالعان «ايەلدى كەيىپتەۋ» فانتاستيكالىق پورترەتتەر سەرياسى, «قىز ۇزاتۋ» تريپتيحى ۇلتتىق بوياۋىنىڭ قانىقتىعىمەن تەرەڭ مازمۇنعا يە بولعان.
سۋرەتشى بايداراليندەر جازۋ ونەرىن دە سەرىك ەتكەن. دانيار ءبايداراليننىڭ «ساداقشىلىق – يسكۋسستۆو يزگوتوۆلەنيا ي سترەلبى يز كازاحسكوگو كوننوگو لۋكا» كىتابى كوشپەلىلەردىڭ باس قارۋى – قازاقتىڭ ات ۇستىندە ساداق اتۋ ونەرىنە ارنالعان العاشقى عىلىمي ەڭبەكتەردىڭ ءبىرى. سۋرەتشى وسى ونەردى زەرتتەگەن مامان رەتىندە عىلىمي ىزدەنىسىن توقتاتپاي, جالعاستىرا بەرەتىنىن ايتادى. كىتاپ اۆتوردىڭ ءوز اۋدارماسىمەن ورىس جانە اعىلشىن تىلدەرىندە جارىق كورگەن. اسىلگۇل بايدارالينا «ءبىزدىڭ سارا اپاي», «سيقىرلى بالتا» جانە «تاۋىق ارمانى» سىندى بالالارعا ارنالعان بىرنەشە كىتاپتىڭ اۆتورى جانە يلليۋستراتورى بولدى. ءتۇرلى-ءتۇستى جانە اق-قارا ءتۇستى گرافيكادا ورىندالعان كىتاپتار اۆتوردىڭ ىشكى الەمىنىڭ كەڭدىگى مەن قيالىنىڭ ۇشقىرلىعىن پاش ەتكەن.
بۇگىندە سۋرەتشىلەر «بايدارالى ستۋديو» شىعارماشىلىق شەبەرحانالارىندا بەينەلەۋ ونەرىمەن اينالىسادى. كورمەگە بايدارالىنىڭ بالالارى كۇنىكەي مەن تايماستىڭ جۇمىستارىن قوسا العاندا, 80-نەن استام كارتينا تاماشالاۋشى جۇرتتىڭ نازارىنا ۇسىنىلعان. كورمە 28 اقپانعا دەيىن جالعاسادى.
ايگۇل احانبايقىزى,
«ەگەمەن قازاقستان»
الماتى