قازاقستاندا پرەزيدەنت تاپسىرماسىمەن قۇرىلاتىن جاڭا ۇلتتىق كومپانيا نەمەن اينالىساتىنىن قر ۇلتتىق ەكونوميكا ءمينيسترى تيمۋر سۇلەيمەنوۆ ايتىپ بەردى, دەپ حابارلايدى قازاقپارات.
«ءبىزدىڭ ەلدە ينۆەستيتسيا تارتۋمەن بىرنەشە ۇيىم اينالىسادى. سوعان بايلانىستى, پرەزيدەنت ناقتى تاپسىرمالار جۇكتەدى - ينۆەستورلارعا مەملەكەتتىك قىزمەتتىڭ تولىق سپەكترىن ۇسىناتىن, ءبىر تەرەزە قاعيداتىمەن جۇمىس ىستەيتىن ارنايى ۇلتتىق كومپانيا قۇرۋ. بۇل كومپانيا قۇرىلادى. بۇگىن ۇكىمەت وتىرىسىندا قر پرەمەر-ءمينيسترى وسى باعىتتا قاشان جانە قانداي شارالار اتقارۋ كەرەكتىگىن ايتتى. سوندىقتان وسى تۇرعىدا بىزدە تولىق تۇسىنىك بار», - دەپ اتاپ ءوتتى تيمۋر سۇلەيمەنوۆ ۇكىمەت وتىرىسىنان كەيىن وتكىزىلگەن ءباسپاسوز ءماسليحاتىندا.
ايتا كەتەيىك, پرەزيدەنت نۇرسۇلتان نازارباەۆ ءوزىنىڭ ەل حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» تاقىرىبىنداعى جولداۋىندا قازاقستان شەتەل ينۆەستيتسيالارىن تارتۋ ىسىندەگى كوشباسشىلىعىن ساقتاپ قالۋى قاجەتتىگىن اتاپ وتكەن بولاتىن.
«استانا» حالىقارالىق قارجى ورتالىعى ەل ەكونوميكاسىنا قارجى رەسۋرستارىن تارتۋدا ماڭىزدى ءرول اتقارۋعا ءتيىس. ءبىز تاۋار ءوندىرۋ مەن وتكىزۋ, قىزمەت كورسەتۋ ءىسىن جاھاندىق جەلىگە بەيىمدەۋىمىز كەرەك. مۇنى, ەڭ الدىمەن, ترانسۇلتتىق كومپانيالاردى تارتۋ ارقىلى جاساعان ءجون. قازاقستاندا وندىرىستەر اشۋ جونىندەگى قىتايمەن بىرلەسكەن ينۆەستيتسيالىق باعدارلامانى ءتيىمدى جۇزەگە اسىرۋ كەرەك. قىتاي تاراپىمەن ۋاعدالاستىققا قول جەتكىزىلدى. نىساندار بەلگىلەندى. ناقتى جۇمىس ىستەۋ قاجەت», - دەلىنگەن جولداۋدا.