ۇلار
رۋحانيات • 16 اقپان, 2021
ۇلىتاۋعا باردىڭ با, ۇلار ەتىن جەدىڭ بە؟
ۇلار جايلى ويلاعان سايىن بالالىق شاعىم قالعان الىس كۇندەردىڭ ەلەسىنە شومامىن. ءتاڭىرتاۋدىڭ ەڭ بيىك شوقتىعى – ءحانتاڭىردىڭ كۇنشىعىس سىلەمىندەگى اعاياز القابىندا قىستاۋىمىز بولدى. اينالا قورشاعان الىپ تاۋلار, كۇننىڭ كوزى تۇسەر ۋاقىت پەن كولەڭكە باسى ۇزارار شاقتىڭ اراسى قارعاادىم عانا. قويدى قورالاپ, مال جايعاپ ۇيگە كىرگەنشە ىمىرت جابىلادى. سول ءبىر قاس قارايعان مەزگىلدە توبەمىزدەن اۋەنى جارا گۋلەتىپ, اتقان وقتاي ۇشىپ وتەتىن قۇس بولۋشى ەدى. ول قۇس – ساقپاننىڭ تاسىنداي اعىپ ۇشاتىن ۇلار-تىن.
