حيميالىق جانە بيولوگيالىق قورعاۋ
ايبىن • 02 شىلدە, 2025
قوعامدا كوزگە كورىنبەيتىن قاۋىپتەر بولادى. ولار مىلتىقسىز سوعىس سالىپ, ادامزاتتىڭ ومىرىنە توتەنشە قاتەر توندىرەدى. وسىنداي جاعدايدا كومەككە كەلەتىن – رادياتسيالىق, حيميالىق جانە بيولوگيالىق قورعاۋ (رحبق) اسكەرلەرى. بۇل قۇرىلىمنىڭ جاۋىنگەرلەرى كوزگە كورىنبەيتىن جاۋمەن كۇرەستە الدىڭعى شەپتە جۇرەدى. ولار – بەيبىت كۇننىڭ باتىرلارى. بۇگىندە قارۋلى كۇشتەردىڭ قۇرامىنداعى ەرەكشە مىندەت جۇكتەلگەن بۇل قۇرىلىم ءوز تاريحىن 1992 جىلعى 2 شىلدەدەن باستايدى. ءدال وسى كۇنى ەلىمىزدىڭ قورعانىس مينيسترلىگى قۇرامىندا رادياتسيالىق, حيميالىق جانە بيولوگيالىق قورعاۋ ءبولىمى قۇرىلعان بولاتىن. ۋاقىت وتە كەلە زامان تالابىنا ساي جاڭعىرىپ, 2020 جىلى رادياتسيالىق, حيميالىق, بيولوگيالىق قورعانىس جانە ەكولوگيالىق قاۋىپسىزدىك اسكەرلەرى دەپارتامەنتى بولىپ قايتا قۇرىلدى. بۇل ولاردىڭ ماڭىزىن ارتتىرىپ, جاۋاپكەرشىلىك اياسىن كەڭەيتە ءتۇستى, دەپ جازادى Egemen.kz.
