قوعام • 26 جەلتوقسان, 2022

سوتتار دا سىبايلاس جەمقورلىققا ۇرىنعان با؟

قاراشا ايىندا «Egemen Qazaqstan» گازەتىنە «سولقىلداق سوت ادىلەتتى قازاقستانعا قالاي قىزمەت ەتەدى» دەگەن ءبىر بەتتىك كولەمدى ماقالامىز شىقتى. قىسقاشا عانا مازمۇنىن ەسكە تۇسىرەر بولساق, ماقالادا مۇقاش قابدىروۆ دەگەن ازاماتتىڭ ساياسي قۋعىن-سۇرگىننىڭ زارداپ شەگۋشىسى بولىپ سوت ارقىلى تانىلعانى, وبلىستىق پروكۋراتۋرا ونى اقتاعانى ايتىلعان. ەندى قۋعىن-سۇرگىننىڭ زارداپ شەگۋشىسى رەتىندە ونىڭ تۇرعىن ءۇي تالاپ ەتكەنى (ويتكەنى تۇرعىن-ءۇي جاعدايىن جاقسارتۋدى سۇراپ 2010 جىلدان بەرى كەزەكتە تۇر), بىراق پەتروپاۆل قالالىق تۇرعىن-ءۇي كوممۋنالدىق شارۋاشىلىعىنىڭ كوميسسياسى سول ءۇيدى بەرگەندە ونىڭ وتباسى مۇشەلەرىنىڭ سانى 5 ادام ەكەنىن, ءوزىنىڭ ءۇشىنشى توپ مۇگەدەگى ەكەندىگىن ەسكەرمەي ءتورتىنشى قاباتتان ءبىر-اق بولمەلى ءۇيدى جەكەشەلەندىرۋ قۇقىعىنسىز بەرگەنى, ال قابدىروۆ جەدەلساتىسى جوق ءۇي بولعان سوڭ مۇگەدەكتىگىنە بايلانىستى تومەنگى قاباتتان ءۇش بولمەلى ءۇيدى زاڭعا سايكەس جەكەشەلەندىرۋ قۇقىمەن بەرۋدى ەكى جىلدان بەرى تالاپ ەتىپ, سوتتاسىپ جۇرگەنى تۋرالى جازىلعان. سۋديالاردىڭ الدىمەن ءبىر شەشىم شىعارىپ, بىراق ورىنداۋشىلىق قاعاز بەرمەي ارتىنان وزدەرىنىڭ شەشىمىنەن تايقىپ, باسقا شەشىم قابىلداپ, ادامدى ابدەن اۋرە-سارساڭعا سالعاندىعى, سول سەبەپتى قۇقىعىن تاپتاپ جۇرگەنى ايتىلعان. وسى وقيعاعا قايتا ورالۋعا تۋرا كەلىپ وتىر.