پىكىر • 31 قازان, 2021

سەزىمى اقىن, جۇرەگى باتىر عۇلاما عالىم

اكادەميك ەدىل ەرعوجا ۇلىنىڭ تۋعانىنا – 80 جىل ەدىل ەرعوجا ۇلى ەرعوجين 1941 جىلى 7 قاراشادا الماتى وبلىسى ەسكەلدى اۋدانى ەكپىندى اۋىلىندا دۇنيەگە كەلگەن. 1963 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ حيميا فاكۋلتەتىن ۇزدىك ءبىتىردى. 33 جاسىندا «جاڭا يونالماستىرعىش جانە توتىعۋ-توتىقسىزدانۋ پوليمەرلەرىنىڭ سينتەزى جانە ءتۇزىلۋ زاڭدىلىقتارىن زەرتتەۋ» تاقىرىبىندا دوكتورلىق ديسسەرتاتسياسىن قورعادى. قازاق كسر عا حيميا عىلىمدارى ينستيتۋتى يونالماستىرعىش شايىرلەرى زەرتحاناسىنىڭ مەڭگەرۋشىسى, س.م.كيروۆ اتىنداعى قازاق مەملەكەتتىك ۋنيۆەرسيتەتى حيميا فاكۋلتەتىنىڭ جوعارى مولەكۋلالىق قوسىلىستار حيمياسى كافەدراسىنىڭ مەڭگەرۋشىسى, دەكانى, اتالعان ۋنيۆەرسيتەتتىڭ ءبىرىنشى پرورەكتورى جانە رەكتورى, «ا.ب.بەكتۇروۆ اتىنداعى حيميا عىلىمدارى ينستيتۋتى» اق ديرەكتورى, باس ديرەكتورى جانە يونالماستىرعىش شايىرلەر جانە مەمبرانالارى زەرتحاناسىنىڭ مەڭگەرۋشىسى, ۇعا ۆيتسە-پرەزيدەنتى (1994-1995), ءبىلىم جانە عىلىم ۆيتسە-ءمينيسترى (1999-2002) بولىپ جۇمىس ىستەدى. ۇعا اكادەميگى E.E.ەرعوجين «عىلىم تۋرالى» قازاقستان رەسپۋبليكاسىنىڭ زاڭىن, قازاقستان رەسپۋبليكاسىنىڭ عىلىمي جانە عىلىمي-تەحنيكالىق ساياساتىنىڭ تۇجىرىمداماسىن جانە «عىلىم» مەملەكەتتىك باعدارلاماسىن ازىرلەۋشى جۇمىس توبىن باسقاردى.