جۇمىسشى ماماندىقتار جىلى • 13 تامىز, 2025

كەرنەۋلى توكتىڭ ءتىلىن تاپقان مامان

پرەزيدەنت قاۋلىسىمەن بيىلعى جىل «جۇمىسشى ماماندىقتار جىلى» دەپ جاريالانعانى بەلگىلى. تىرشىلىك ءۇشىن تاپتىرماس مامانداردىڭ ماڭداي تەرىن, ەرەن ەڭبەگىن نانىمدى ناسيحاتتاۋعا ارنالعان جىلدىڭ جەتى ايى دا ارتتا قالدى. ۋاقىت ماشيناسى وزا تۇسكەنمەن, جۇمىسشى مامانداردىڭ جەمىستى ەڭبەگى ەسكەرىلىپ, بەدەلى بيىكتەپ كەلەدى. جىل قۇرعاق سوزبەن سىرعىماۋ ءۇشىن جۇمىسشى مامانداردىڭ الەۋمەتتىك الەۋەتىن الدەندىرۋگە نازار اۋدارىلىپ جاتىر. اۋىز تولتىرىپ ايتاتىن نەگىزگى جاڭالىق تەحنيكالىق مامانداردى باسپانامەن قامتۋعا باعىتتالعان – «ناۋرىز جۇمىسكەر» باعدارلاماسى. باستاما ونەركاسىپ, ەنەرگەتيكا, كولىك, اۋىل شارۋاشىلىعى جانە سۋ رەسۋرستارى سالالارى قىزمەتكەرلەرىن ءۇيلى ەتۋگە ۇلەس قوسادى. بۇدان بولەك جۇمىسشى مامانداردىڭ مارتەبەسىن بەلگىلەۋ,  سالالارداعى سىندارلى تۇستى ساراپتاۋ, تەحنيكالىق جانە كاسىپتىك ءبىلىم بەرۋ جۇيەسىنىڭ رەفورماسىن جۇزەگە اسىرۋ سىندى جۇيەلى جۇمىستار اتاۋلى جىل اياسىندا اتقارىلىپ جاتىر. باستىسى قوعام جۇمىسشى ماماندارعا قاجەتتىلىكتى تەرەڭ ءتۇيسىنىپ, تۇرمىس تۇرالاماۋ ءۇشىن ەتىپ جۇرگەن ەڭبەگىنە قۇرمەتپەن قاراۋعا بەيىل ءبىلدىرىپ كەلەدى.