حالىقارالىق قارتتار كۇنى - 1990 جىلى 14 جەلتوقساندا بۇۇ باس اسسامبلەياسىندا بەكىتىلىپ, جاريالاندى. بۇل مەرەكە ەلىمىزدە جىل سايىن اتالىپ وتىلەدى. جانە ونىڭ اياسىندا قارتتارعا قۇرمەت كورسەتىلىپ, ءتۇرلى فورماتتاعى ءىس-شارالار ۇيىمداستىرىلادى.
رەسپۋبليكادا جاسى بويىنشا 2,5 ميلليوننان استام زەينەتكەر تۇرادى. ءاربىر ازاماتتىڭ لايىقتى قارتايۋىن قامتاماسىز ەتۋ – ۇكىمەتتىڭ الەۋمەتتىك ساياساتىنىڭ باستى مىندەتتەرىنىڭ ءبىرى.
ەڭبەك جانە حالىقتى الەۋمەتتىك قورعاۋ مينيسترلىگى اتاپ وتكەندەي, قر الەۋمەتتىك كودەكسىنىڭ 197-بابىنىڭ 3-تارماعىنا سايكەس ەڭبەك سىڭىرگەن جىلدارى ءۇشىن زەينەتاقى تولەمدەرىنىڭ مولشەرىن جىل سايىن ارتتىرۋ رەسپۋبليكالىق بيۋدجەت تۋرالى زاڭدا ءتيىستى قارجى جىلىنا بەلگىلەنگەن مولشەردە جۇزەگە اسىرىلادى.
وسىلايشا, 2025 جىلدىڭ 1 قاڭتارىنان باستاپ ىنتىماقتى زەينەتاقى مولشەرى 8,5%-عا ۇلعايتىلدى جانە ەڭ تومەنگى كۇنكورىس دەڭگەيىنىڭ كولەمىنىڭ وزگەرۋىنە بايلانىستى بازالىق زەينەتاقى مولشەرى يندەكستەلدى.
مەملەكەت باسشىسىنىڭ تاپسىرماسىنا سايكەس بازالىق زەينەتاقىنىڭ مولشەرىن كەزەڭ-كەزەڭىمەن ارتتىرۋ جالعاسۋدا. 2025 جىلدىڭ 1 قاڭتارىنان باستاپ زەينەتاقىنىڭ ەڭ تومەنگى مولشەرى ەڭ تومەنگى كۇنكورىس دەڭگەيىنىڭ 65-تەن 70%-عا, ال ەڭ جوعارعىسى 105-تەن 110%-عا دەيىن وسەدى.
رەسپۋبليكادا 127 بەلسەندى ۇزاق ءومىر ءسۇرۋ ورتالىعى اشىلىپ, جۇمىس ىستەپ تۇر. 2025 جىلى ولاردىڭ جۇمىس ىستەۋىنە جەرگىلىكتى بيۋدجەتتەردەن بولىنگەن قاراجاتتىڭ جالپى سوماسى 7,5 ملرد تەڭگەنى قۇرادى.
