ونەرى – ءومىربايانى

    قاراعاندى ايماعىنداعى اقتوعايدى ەل ءىشى ونەر ولكەسى رەتىندە بىلەدى. قازاقي سالت-ءداستۇردىڭ قايماعى بۇزىلماعان توپىراقتا ەكىنىڭ ءبىرى ءانشى, كۇيشى دەسە بولادى. ماناربەك ەرجانوۆ, كۇلاش بايسەيىتوۆا سىندى جۇلدىزدار شىققان ءوڭىر ءۇردىسى ادەمى, بۇگىندە دە تالانتتى ۇرپاقتارمەن ءوز جالعاسىن تاۋىپ كەلەدى. سولاردىڭ شوعىرلى ساپىندا امانوللا شايبەكوۆتىڭ ەسىمى دە كوپكە تانىمال. جاقىندا ابەكەڭ استانادا ۇلى جەڭىستىڭ 70 جىلدىعىنا وراي ارداگەرلەر اراسىندا وتكەن «قايران ەرلەر, قاھارمان ارداگەرلەر» اتتى رەسپۋبليكالىق بايقاۋ فەستيۆالىنە قاتىستى. سونداعى «مەنىڭ تاعدىرىمداعى سوعىس تاقىرىبى» نوميناتسياسى ءمۇشايراسىندا « ۇلى جەڭىس» اتتى شىعارماسىمەن جۇلدەلى ەكىنشى ورىننان كورىنىپ, لاۋ­رەات اتاندى. ارينە, قانداي دا جەتىستىكتىڭ ەرتە-كەشتىگى جوق بولسا دا الپىستان اسقان اقساقالعا بۇل جەڭىس اسا ىستىق بولۋىن وسى حاباردى ەستىگەن بەت­تە جۇزدەسۋىمىزدە جاس بالاشا شاتتىق ەسكەن جۇرەك ءلۇپى­لى­نەن, شىعارماشىلىق شابىت شال­قىعان جۇزىنەن بايقاعان ەدىك. ول, مىنە, قىرىق جىلدان بەرى اۋىل مادەنيەتىن ماۋەلەتۋشى سانالادى. ءسوزىن ءوزى جازىپ, ءانىن ءوزى شىعارۋشى سان قىرلى تالانت يەسىنىڭ ەل ءىشى ونەرپازدارى رەپەرتۋارىنا بەرىك ورنىققان اسەم اۋەندەرى از ەمەس. نەگىزگى وزەگى وتانشىلدىق, ادامگەرشىلىك, سۇيىسپەنشىلىك, رۋحتىق تاقى­رىپتارعا تارتىلعان «جەڭىس», «مانشۇك تۋرالى ءان», «استا­نا», «شاتتان, قازاق!» سىندى اندەرى اۋىل ساحناسىنان ءاردايىم شىرقالىپ جاتادى. « ۇلىلىق باسپالداعى» اتتى شىعارمالار توپتاماسى تۇڭعىش پرەزيدەنت مۋزەيىنىڭ جەكە كىتاپحانا قورىندا ساقتاۋلى ەكەنى اۋەسقوي سازگەرگە ۇلكەن مەرەي. جوعارىداعىداي قىرىمەن قوسا, رەجيسسەرلىك جانە ستسەناري جازۋ ماشىعى قالىپتاسقان ابەكەڭ «اقتوعاي اۋداندىق مادەني بوس ۋاقىت وتكىزۋ ورتا­لىعى» كمقك ادىستەمەلىك كابي­نەت مەڭگەرۋشىسى رەتىندە بايا­عىسىنشا ولكە ءومىرىن قىزعى­لىقتى ەتۋدىڭ بەل ورتاسىندا. وسى سالانىڭ جەرگىلىكتى ساڭلاعىنىڭ سۇيىكتى قىزمەتىنە لايىق اتاق-دارەجەلەرى دە جەتكىلىكتى. ونەر دەگەندە ىشكەن اسىن جەرگە قوياتىن, وسكەلەڭ ۇرپاق بويىنا دا سونى سىڭىرۋگە ايانبايتىن ازامات جولى – ەل ىشىنە ونەگە. ايقىن نەسىپباي, «ەگەمەن قازاقستان». قاراعاندى وبلىسى, اقتوعاي اۋدانى. سۋرەتتە: فەستيۆال لاۋ­رەاتى ا.شويبەكوۆ جانە جۇلدەگەر ا.بوتباەۆا.