بۇرناعى كۇنى اقمولا وبلىسى, ارشالى اۋدانىنا قاراستى ارناساي ەلدى مەكەنىندە ەرەكشە ءىس-شارا بولىپ ءوتتى. اۋىلداعى «ۆياچەسلاۆ» ورتا مەكتەبى اۋماعىندا «استانا ەكسپو-2017» حالىقارالىق كورمەسى قۇرمەتىنە الما اعاشتارى وتىرعىزىلىپ, بولاشاق «ەكسپو باۋ-باقشاسىنىڭ» نەگىزى قالاندى.
2017 جىلى استانادا تمد ەلدەرىنىڭ ىشىندە العاش رەت «بولاشاقتىڭ ەنەرگياسى» دەگەن تاقىرىپپەن «ەكسپو-2017» حالىقارالىق مامانداندىرىلعان كورمەسى وتكىزىلەتىندىگى بەلگىلى. وسىعان وراي, ەلىمىزدە اۋقىمدى شارالار قولعا الىنىپ, جاھاندىق شارانى قولداۋ, ناسيحاتتاۋ جۇمىستارى جۇرگىزىلۋدە. بۇگىنگى «ۆياچەسلاۆ» مەكتەبى اۋلاسىندا «ەكسپو باۋ-باقشاسىنىڭ» نەگىزىن سالۋ دا سول كەشەندى شارالاردىڭ ءبىرى. بۇل شارانىڭ تاعى ءبىر ەرەكشەلىگى, ول ۇلى جەڭىستىڭ جەتپىس جىلدىعىنا ورايلاستىرىپ وتكىزىلۋدە. سوعان بايلانىستى مەكتەپ اۋماعىندا جەتپىس ءتۇپ الما اعاشى وتىرعىزىلدى. جەمىس باعىنىڭ نەگىزىن قالاۋ ءراسىمى مەملەكەتتىڭ انۇرانىمەن باستالىپ, اسكەري ءبولىم جاۋىنگەرلەرى سوعىستا قازا بولعان جاۋىنگەرلەر قۇرمەتىنە ارناپ, اسپانعا ءۇش دۇركىن وق اتۋ ءراسىمىن ورىندادى.
كەشەندى شارانى «استانا ەكسپو-2017» ۇك» اق, «جاسىل» ەكونوميكانى قولداۋ جانە G-Global-دى دامىتۋ كواليتسياسى» زتب, ۇلىبريتانيانىڭ قازاقستانداعى ەلشىلىگى, G-GLOBAL حالىقارالىق حاتشىلىعى, «اقبوتا» قق جانە «تۇراقتى دامۋ» جەر قورى بىرلەسە ۇيىمداستىرىپ وتىرعانىن اتاپ ءوتۋ كەرەك.
ۆياچەسلاۆ ورتا مەكتەبىن بىرەگەي مەكەمە دەپ اتاۋعا بولادى. مۇندا وقۋشىلاردىڭ بويىندا ءبىرىنشى سىنىپتان باستاپ تۋعان جەرىنە, تابيعاتقا دەگەن سۇيىسپەنشىلىك تاربيەلەنەدى. بالالار ناقتى مىسالدار ارقىلى ەنەرگيانى ءتيىمدى پايدالانۋعا ۇيرەنىپ, وسىنداي تەحنولوگيالاردى قولدانۋدىڭ پايداسىن كورىپ وسەدى. جەڭىستىڭ 70 جىلدىعىنا وراي جانە تۋعان جەرىن قورعاعان ساربازداردىڭ قۇرمەتىنە ارناپ الما اعاشىن ءدال وسى مەكتەپتە وتىرعىزۋدىڭ استارىندا ۇلكەن ءمان جاتىر. مەكتەپتىڭ جانىندا ءوز جەر تەلىمى جانە جىلىجايى بار. ونىڭ كۇندەلىكتى قىزمەتىندە وزىق تەحنولوگيالار قولدانادى. مۇندا سۋدى جىلىتۋ ءۇشىن كۇن باتارەيالارىن, جارىق ديودتى جارىقتاندىرۋعا, ال جىلىتۋ ماقساتىندا پيروليزدىك پەشتى قولدانادى. قازىر بالالار تامشىلاتىپ سۋارۋ ءادىسىن جانە سۋ سەبۋگە ارنالعان جاڭبىرلاتقىش ساپتامالاردى قولدانىسقا ەنگىزىپ وتىر.
«ەكسپو باعىنا» جەتپىس ءتۇپ الما اعاشىن وتىرعىزۋ اكتسياسىنا قازاقستان رەسپۋبليكاسى پارلامەنتىنىڭ دەپۋتاتتارى سەرىك نوگەربەكوۆ, ايگۇل سولوۆەۆا, سەرىك وسپانوۆ, نادەجدا نەستەروۆا, ۇلىبريتانيانىڭ قازاقستانداعى ەلشىسى كەرولين براۋن, «استانا ەكسپو-2017» ۇلتتىق كومپانياسىنىڭ باسقارۋشى ديرەكتورى سالتانات راقىمبەكوۆا جانە جەرگىلىكتى تىل ارداگەرلەرى, اۋىل تۇرعىندارى, جاستار ۇيىمدارى مەن بۇقارالىق اقپارات قۇرالدارى وكىلدەرى قاتىستى.
اكتسيا بارىسىندا ءسوز العان سەناتور س.نوگەربەكوۆ «استانا ەكسپو-2017» حالىقارالىق كورمەسىنىڭ ماڭىزى مەن ءمانىن ايتىپ, بۇگىنگى ءىس-شاراعا ريزالىعىن جەتكىزدى. جەتپىس ءتۇپ الما اعاشىنىڭ كەلەشەكتە ۇلكەن اۋماقتى الاتىن جەتپىس مىڭ ءتۇپ الما اعاشى بار الىپ باققا اينالۋىنا تىلەكتەستىك ءبىلدىردى. سالتانات راقىمبەكوۆا وسى اكتسيانى وتكىزۋگە قولداۋ كورسەتكەن مەكتەپ ۇجىمىنا العىس ايتتى. سونداي-اق, ءبىلىم ورداسىنىڭ ەلىمىزدەگى باسقا مەكتەپتەرگە ۇلگى بولاتىنىنا سەنىم ءبىلدىردى. سودان كەيىن ۆياچەسلاۆ مەكتەبىنىڭ وقۋشىلارىنا «ەكسپو باۋ-باقشاسىن ساقتاۋشى» دەگەن سەرتيفيكات سالتاناتتى تۇردە تابىس ەتىلدى. جيىن سوڭى مەرەكەلىك كونتسەرتكە ۇلاستى.
جاراس سادۋاقاسوۆ.
اقمولا وبلىسى, ارشالى اۋدانى, ارناساي اۋىلى.
سۋرەتتە: «ەكسپو باعىنىڭ» نەگىزىن قالاۋ شاراسىنان كورىنىس.
