ءار ءتورتىنشى بالاعا – 50 مىڭ تەڭگە

بيىل شىعىسقازاقستاندىق انالار ءۇشىن جاعىمدى جىل بولىپ وتىر. وبلىستىق ءماسليحاتتىڭ شەشىمىمەن ءتورتىنشى بالا تۋعان وڭىردەگى ءاربىر انا 50 مىڭ تەڭگە مولشەرىندە الەۋمەتتىك كومەك الاتىن بولدى. ايماق ەكونوميكاسى ورگە باسقان سايىن اتالعان الەۋمەتتىك كومەكتىڭ كولەمى دە ۇلعايا تۇسپەك. – ءبىزدىڭ ءوڭىرىمىز مۇنداي يدەيانى ەلىمىزدە ءبىرىنشى بولىپ قولعا الدى. الداعى ۋاقىتتا كاسىپكەرلەر مەن كاسىپورىندار دا كوپبالالى انالاردى قولدايدى دەپ ويلاي­مىز. وڭىرىمىزدە كوپبالالى جاس وتباسىلاردىڭ كوبەيگەنىن قالايمىز, – دەدى ايماق باسشىسى بەردىبەك ساپارباەۆ كوپبالالى انالارمەن كەزدەسۋدە. سونداي-اق, وبلىس باسشىلىعى بارشا كوپبالالى انالارعا تانىمال ساۋىقتىرۋ-ەمدەۋ كەشەن­دەرىنە سەرتيفيكاتتار تابىس ەتتى. ونىڭ ىشىندە الاكول, راحمان قاينارى, كوكتاۋ سىندى دەمالىس ورىندارى مەن وسكەمەندەگى ەتنواۋىل, باسسەين, تەاتر جانە تاعى باسقا الەۋمەتتىك-مادەني ورىندارعا جىل بويى تەگىن كىرۋگە ارنالعان ابونەمەنتتەر بار. شىعىس وڭىرىندە 16 مىڭنان استام كوپبالالى انا تۇرادى. ولاردىڭ بارلىعى «التىن القا», «كۇمىس القا», ەرتەرەكتە بەرىلگەن «باتىر انا» اتاقتارىنا يە جانە «انا داڭقى» وردەنىمەن ما­راپاتتالعان جاندار. سونداي-اق, 8 مىڭعا جۋىق انا كامەلەتتىك جاسقا تولماعان ءتورت بالادان اساتىن وتباسىلاردىڭ ۇيىتقىسى بولىپ وتىر. كەزدەسۋگە وبلىستىڭ بارلىق قالالارى مەن اۋداندارىنان 40-قا جۋىق كوپبالالى انا قاتىستى. ولاردىڭ اراسىندا قىسقى ازيا ويىندارىنىڭ ەكى مارتە چەمپيونى ماريا فەدورەنكو, «شىعىس» وڭىرلىك قولباسشىلىعى اسكەري وركەسترىنىڭ كونتسەرتمەيستەرى ولگا ساعىندىقوۆا, وسكەمەندەگى انا مەن بالا ورتالىعىنىڭ ديرەكتورى رايا راحيموۆا سىندى قوعامدا بەلسەندىلىگىمەن كوزگە ءتۇسىپ جۇرگەن جاندار بار. كەزدەسۋگە زايسان قالاسىنان كەلگەن ءبيباتىش راحىمجانوۆا سەكسەننىڭ ەكەۋىنە شىققان ەكەن. اجەيدىڭ بالالىق شاعى سوعىس جىلدارىنا تاپ كەلسە دە, تىلدا اۋىر ەڭبەك ەتە ءجۇرىپ, 8 بالاسىن ءوسىرىپ, جەتكىزگەن. ەلىمىزدە ءتۇرلى سالادا جەمىستى ەڭبەك ەتىپ جۇرگەن بالالاردىڭ اناسى قازىر 24 نەمەرە مەن 6 شوبەرە ءسۇيىپ وتىر. – بارلىق جاس قىز-كەلىن­شەك­تەرىمىزگە انا باقىتىن تىلەيمىن. ءبىز سوعىستان كەيىنگى قيىن جىلداردا دا دۇنيەگە بالا اكەلىپ, وسىردىك. ال قازىر مەملەكەت تاراپىنان بارلىق جاعداي جاسالىپ جاتىر, – دەدى ءبيباتىش اجە. قىسقى ازيا ويىندارىنىڭ ەكى دۇركىن چەمپيونى ماريا فەدورەنكو جۋىقتا دۇنيەگە ۇشەم اكەلگەن ەكەن. ءوڭىر باسشىلىعى باقىتتى انانىڭ وتباسىنا كەڭ پاتەر بەرۋگە ۋادە بەردى. دۋمان اناش, «ەگەمەن قازاقستان». وسكەمەن.