وسىعان دەيىنگى كونستيتۋتسيالىق, مەملەكەتتىك جانە ساياسي ينستيتۋتتارداعى ءداستۇرلى كوزقاراستار مەن جۇيەلى باعىتتار بۇگىنگى تاڭدا تۇبەگەيلى وزگەرگەن. ياعني الەۋمەتتىك تەڭسىزدىكتەردى جويۋ, ءسوز بوستاندىعى مەن دەموكراتيالىق زاڭدار اياسىنداعى ىسكە اسىرىلىپ جاتقان ساياسي ترانفورماتسيالاۋ تۋرالى جولداۋداعى جاڭاشىل باستامالار قوعامدا جاڭا ساياسي مادەنيەتتى قالىپتاستىرۋعا ۇلكەن مۇمكىندىك بەرىپ وتىر. مەملەكەتتىڭ ءوسىپ-وركەندەۋىنە, تۇراقتىلىعى مەن قاۋىپسىزدىگىنە جاۋاپتى مەملەكەتتىك قىزمەتشىلەر مەن ولارعا تەڭەستىرىلگەن مەكەمەلەردەگى جۇمىسشىلار جالپىۇلتتىق دەڭگەيدەگى ءارتۇرلى جاعدايلاردا وزىندىك شەشىم قابىلداپ, جەرگىلىكتى دەڭگەيدە ءوزىن-ءوزى باسقارۋ, ادال قوعام قۇرۋ, قالالىق جانە اۋداندىق دەڭگەيدە حالىققا قىزمەت ەتۋشى ورگاندارداعى باسشى مامانداردى ادىلەتتى سايلاۋ سياقتى تۇعىرلى ەل بولۋعا تالپىنعان قابىلەتتى قوعامدى قالىپتاستىرۋعا باعىت الدى.
الەمدى ابىگەرگە سالعان سوعىس وشاقتارىنىڭ سالدارى مەن ءبىر-بىرىنە شەكتەۋ سالۋمەن تىرەسكەن بۇرىنعى ىنتىماقتاس ەلدەردىڭ بۇگىنگى الاۋىزدىعى ءورشىپ تۇرعان زاماندا اۋماقتىق تۇتاستىقتى قورعاۋ – باستى مىندەت ەكەنىن ءار ازامات سەزىنىپ وتىر. ەلىمىزگە ناقتى قادامدار مەن ۇقىپتى سۇرىپتالعان ساياسي شەشىمدەردى تالاپ ەتىپ وتىرعان اۋمالى-توكپەلى كەزەڭدە, ۇلتتىق بىرەگەيلىكتى نىعايتۋعا باعىتتالعان يگىلىكتى باستامالارعا قانىق بۇل جولداۋ كوپشىلىك قولداۋىنا يە. دەمەك «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن باسشىلىققا العان مەملەكەت باسشىسىنىڭ الدىمىزعا قويعان تاپسىرمالارى مەن مىندەتتەرىن ۋاقتىلى جۇزەگە اسىرۋدى ءبىز ءال-اۋقاتتى قوعام قۇرۋعا قوسقان ۇلەسىمىز دەپ تانۋىمىز كەرەك.
بۇل تۇرعىدا, حح-ءححى عاسىرلارداعى قازاقستاننىڭ ساياسي-الەۋمەتتىك تاريحىنىڭ قۇندى قۇجاتتارىن ساقتاپ وتىرعان قازاقستان رەسپۋبليكاسى پرەزيدەنتىنىڭ ءارحيۆى, ەلىمىزدىڭ الداعى ۋاقىتتاعى دامۋ جولىنىڭ ستراتەگيالىق, يدەولوگيالىق باعىتتارىن قالىپتاستىرۋداعى وزىنە جۇكتەلگەن تاريحي جاۋاپكەرشىلىكتى سەزىنىپ وتىر. وسى ورايدا, ءارحيۆتىڭ الدىندا بىرنەشە كەشەندى ءىس-شارانى جۇزەگە اسىرۋ مىندەتتەرى تۇر.
بىرىنشىدەن, ارحيۆتىك قىزمەتتەردى جاڭعىرتۋ. ەڭ الدىمەن, ارحيۆتىك قۇجاتتار كەشەنىنىڭ قولجەتىمدىلىگى مەن اشىقتىعىن قامتاماسىز ەتۋ ماقساتىندا ولاردى تسيفرلى جۇيەگە كوشىرۋ قارقىنىن ارتتىرۋ.
ەكىنشىدەن, ازاماتتارىمىزدىڭ ەل الدىنداعى جاۋاپكەرشىلىگىن, حالقىمىزدىڭ تاريحىنا دەگەن قۇرمەتىن ارتتىرۋ, وتانسۇيگىشتىك, ۇلتجاندىلىق قاسيەتتەرىن وياتۋ ماقساتىندا ارحيۆتە ساقتاۋداعى تاريحي قۇجاتتاردى ايگىلەپ, ناسيحاتتاۋعا باعىتتالعان شارالاردى ۇيىمداستىرۋ.
ۇشىنشىدەن, عىلىمي اينالىمعا ەنبەگەن قۇجاتتىق دەرەكتەردى عالىم-زەرتتەۋشىلەر كەڭىنەن قولدانىپ, سولاردىڭ نەگىزىندە تىڭ تاريحي ەڭبەكتەر جاريالاۋىنا جاعداي جاساۋ.
وسى كوتەرىلىپ وتىرعان وتاندىق ارحيۆ سالاسىنداعى وزەكتى ماسەلەلەر مەملەكەت باسشىسىنىڭ جولداۋدا ايتىپ وتكەن, ء«بىز ەڭ باستى قۇندىلىعىمىز – تاۋەلسىزدىگىمىزدى ساقتاپ, ۇلتتىق بىرەگەيلىگىمىزدىڭ نەگىزىن نىعايتىپ, ەلىمىزدى جاڭعىرتۋ جولىندا ۇيىسۋعا ءتيىسپىز» دەگەن مىندەتتەرىنە سايكەس كەلەدى.
ءاليا مۇستافينا,
پرەزيدەنت ءارحيۆىنىڭ ديرەكتورى
