ۋچاسكەلىك سايلاۋ كوميسسيالارىنىڭ مۇشەلەرىمەن كەزدەسۋدە وسك توراعاسى تەرەڭوزەك كەنتى اكىمىنىڭ سايلاۋ ناۋقانىنىڭ بارىسىمەن, ادىستەمەلىك جانە ۇيىمداستىرۋشىلىق-تەحنيكالىق قامتاماسىز ەتۋ, سايلاۋ ۋچاسكەلەرىنىڭ دايىندىعى, مۇمكىندىگى شەكتەۋلى سايلاۋشىلار ءۇشىن قاجەتتى جاعدايلار جاساۋ ماسەلەلەرىمەن تانىستى. سونداي-اق ۇلتتىق باقىلاۋشىلاردىڭ قىزمەتىن قۇقىقتىق رەتتەۋ ماسەلەلەرى تالقىلاندى.
كەزدەسۋ قورىتىندىسى بويىنشا ول داۋىس بەرۋ كۇنى سايلاۋ راسىمدەرىن ۇيىمداستىرۋ جانە وتكىزۋ قاتاڭ تۇردە زاڭناما تالاپتارىنا ساي جۇزەگە اسىرىلۋعا ءتيىس ەكەنىن ەرەكشە اتاپ ءوتتى.
سىرداريا اۋدانىنىڭ سايلانعان اكىمدەرىمەن جانە اۋىلدىق وكرۋگ تۇرعىندارىمەن كەزدەسۋ بارىسىندا, اۋىلدىق دەڭگەيدەگى اكىمدەردى تىكەلەي سايلاۋ ينستيتۋتىن ەنگىزۋ ماسەلەلەرى بويىنشا پىكىر الماسىلدى. سونداي-اق ن.ءابدىروۆ اكىمدەردىڭ ەلدى مەكەندەردى دامىتۋ جانە ولاردىڭ تىنىس-تىرشىلىگىن قامتاماسىز ەتۋ بويىنشا اتقارعان جۇمىستارى مەن جوسپارلارىمەن تانىستى.
سونداي-اق وسى كۇنى وسك مۇشەسى اسىلبەك سماعۇلوۆ پەن ەلەكتورالدى وقىتۋدى ۇيىمداستىرۋ ءبولىمى مەڭگەرۋشىسىنىڭ ورىنباسارى ءتۇسىپ رىسپەكوۆ وبلىستاعى سايلاۋدى ۇيىمداستىرۋشىلار ءۇشىن وقىتۋ سەمينارىن وتكىزدى.
ورتسايلاۋكوم توراعاسى قىزىلوردا وبلىسىنىڭ جاستار رەسۋرستىق ورتالىعىندا ءوڭىر جاستارىمەن دە كەزدەستى. كەزدەسۋدى اشا وتىرىپ, ول: «جاستار – ەلدىڭ بولاشاق زيالى قاۋىمى جانە ەلەكتوراتتىڭ ماڭىزدى قۇرامداس بولىگى. وسىعان بايلانىستى ءبىز ءۇشىن قازىرگى تاڭدا جاستاردىڭ سايلاۋ پروتسەسى ماسەلەلەرىنىڭ كەڭ سپەكترى توڭىرەگىندە پىكىرلەرى مەن ۇسىنىستارى وتە ماڭىزدى», دەدى.
كەزدەسۋدە جاستار وكىلدەرى سايلاۋ پروتسەسىنە تسيفرلى تەحنولوگيالاردى ەنگىزۋ, سايلاۋ مادەنيەتى مەن الداعى سايلاۋدا جاستاردىڭ بەلسەندىلىگىن ارتتىرۋ بويىنشا بىرقاتار ناقتى ۇسىنىستاردى العا تارتتى. قاتىسۋشىلار ورتالىق سايلاۋ كوميسسياسى ۇيىمداستىرعان وسىنداي كەزدەسۋلەر جاستاردىڭ سايلاۋعا دەگەن سەنىمىن ارتتىرۋدىڭ پارمەندى تەتىكتەرىنىڭ بىرىنە اينالاتىنىن جانە جاستار وسىنداي ديالوگ ورناتۋدى قولدايتىنىن اتاپ ءوتتى.
