التىن كۇن, كوك اسپان, بۇل – ءبىزدىڭ قازاقستان!

قوستاناي وبلىسىنداعى جوعارى جانە ورتا وقۋ ورىندارىندا وتكەن پاتريوتتىق اكتسيادا ستۋدەنت-جاستار پرەزيدەنت نۇرسۇلتان نازارباەۆتىڭ ماڭگىلىك ەل يدەياسىن قولدايتىندىقتارىن ءبىلدىردى. سونداي اكتسيانىڭ ءبىرى م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتى مەن وسى اتتاس كوللەدجدە ءوتتى. ءبىلىم ورداسىنىڭ ۇلكەن اكت زالى ستۋدەنتتەر مەن وقىتۋشىلارعا لىق تولدى. قازاق ەلىنىڭ كەڭ دالاسىن, تۋعان جەرگە دەگەن ماحابباتتى پاش ەتكەن پاتريوتتىق اندەر جاندى ەرەكشە باۋرايدى. بۇل اكتسيادا ءاپ دەگەننەن ماڭگىلىك ەل يدەياسى بۇگىننىڭ عانا ەمەس, بولاشاقتىڭ جارقىن كورىنىسى ەكەنى ايتىلدى. جەر ءۇشىن ءومىرى اتتىڭ جالىندا وتكەن اتالارىمىزدىڭ تاۋەلسىز ەل بولۋ ارمانى ورىندالدى. – ەل بولۋ وڭاي ەمەس, ال سول ەلدى ساقتاپ تۇرۋ ودان دا قيىن. مىنە, ۋاقىت ونىڭ اينالامىزداعى زار­داپتى مىسالدارىن الدىمىزعا توسىپ وتىر. ەلدى ۇستاپ تۇرۋ ءۇشىن ونىڭ ەكونوميكاسىن دامىتۋىمىز, وعان ۇلەس قوسۋىمىز, ارقايسىمىز تۋعان جەردىڭ, ەلدىڭ پاتريوتى بولۋىمىز قاجەت. سول ءۇشىن ستۋدەنت-جاستاردىڭ مىندەتى ساپالى ءبىلىم الۋ, وقۋ, ەرتەڭگى بىلىكتى مامان بولىپ شىعۋ, – دەدى ۋنيۆەرسيتەت رەكتورى, ەكونوميكا عىلىمدارىنىڭ دوكتورى ءسابيت ەسمۇراتوۆ. مۇنان كەيىن ءبىلىم ورداسىنىڭ باسشىسى نۇرسۇلتان نازارباەۆتىڭ كەمەڭگەر ساياساتىنىڭ دۇرىستىعىنا توق­تالدى. – 1997 جىلى مەن نۇرسۇلتان نا­زار­باەۆتىڭ العاشقى جولداۋىن تىڭداۋعا قاتىسقان ەدىم. سوندا ەلباسى ايتقان ماسەلەلەر مۇمكىن ەمەستەي, تاڭعالىپ قايتقان بولاتىنمىن. مىنە, قازىر سونىڭ بارلىعى دا جۇزەگە استى. قازاقتىڭ دالاسىندا ەلوردامىز توتى قۇستاي تارانىپ ءوستى. نۇرسۇلتان ءابىش ۇلى ەلدىڭ بولاشاعى تەك قانا حالىقتىڭ, قازاقستاندىقتاردىڭ بىرلىگىندە ەكەنىن ءار كەزدەسۋىندە ايتىپ وتىرادى. مۇنى دا ءومىر راستاپ وتىر, – دەدى ءسابيت بوريس ۇلى. اۋعانستان جەرىندەگى سوعىستىڭ ارداگەرى, زاپاستاعى پودپولكوۆنيك اناتولي حارچەنكو جاستاردىڭ پاتريوتتىق اكتسياسىنىڭ قوناعى بولدى. – قازاقستان تاۋەلسىزدىگىن العان جىلدارعى قيىندىقتاردى بۇگىنگى جاستار ۇلكەندەردىڭ ايتۋىنان عانا بىلەدى. ال بىزدەر ونى ءوز باسىمىزدان وتكىزدىك. استانا قالاسى سالىنادى دەگەندە كوپشىلىك ادامداردىڭ وعان كۇمانى بولعانى راس. مەن دە «زەينەتاقى تولەنبەي جاتقاندا تۇتاس قالا قالاي بوي كوتەرمەك؟» دەپ ويلاعانمىن. كوپ ۋاقىت وتپەي-اق مەن ءبىزدىڭ قازاقستاننىڭ قۋاتتى ەل ەكەنىنە كوزىم جەتتى. الىستى بولجايتىن ساياساتكەر نۇرسۇلتان نازارباەۆتىڭ ءار باس­تاماسىن جان-تانىممەن قولداپ وتىرامىن. ەلدىڭ بولاشاعى, ونى قورعاۋ, تاۋەلسىزدىكتىڭ ىرگەسىن بەكىتە ءتۇسۋ – ءبىزدىڭ ءوز قولىمىزدا. نۇرسۇلتان نازارباەۆ ۇلتتار مەن ۇلىستار اراسىنداعى دوستىقتى, ىنتىماقتىڭ بولۋىن ايتۋمەن كەلەدى. مەن قازاقستاندا تۋدىم. اسكەردەن كەيىن قايدا كەتسەم دە ەركىم ەدى. بىراق مەن تۋعان جەرىمە قايتىپ ورالدىم. بۇل جەردە مەنىڭ اتامنىڭ, اجەمنىڭ كىندىك قانى تامعان. بۇل – مەنىڭ وتانىم. مەن دۇرىس تاڭداۋ جاساعانمىن. قازاقستان ءۇشىن بارىمدى بەرەمىن. ويتكەنى, مۇندا مەنىڭ بالالارىم ءوسىپ كەلەدى, قازاقستان – سولاردىڭ, مىنا سىزدەردىڭ بولاشاعىڭىز! «قازاقستان-2050» ستراتەگياسىن مىنا سىزدەر جۇزەگە اسىراسىزدار, يگىلىگىن دە سىزدەر كورەسىزدەر!– دەپ اناتولي حارچەنكو تەبىرەنە سويلەدى. پاتريوتتىق شارا ستۋدەنتتەر شىرقاعان انمەن, بيمەن ورنەكتەلىپ وتىردى. مۇنان كەيىن ءسوز العان وقى­تۋشىلار, كاسىپكەرلەر, ستۋدەنتتەر ەلباسىنىڭ قازاقستان حالقىنا بيىل جولداعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» جولداۋىنداعى «ءماڭ­گىلىك ەل» يدەياسىن قولداي­تىندىقتارىن ايتتى. ولار بۇل ءار ستۋدەنت ەلىمىزدىڭ پاتريوتى بول­عاندا عانا مۇمكىن دەدى. اكتسيا سوڭىندا وعان قاتىسۋشىلاردىڭ بارلىعى قوسىلىپ قازاقستاننىڭ ءانۇرانىن شىرقادى. ءنازيرا جارىمبەتوۆا, «ەگەمەن قازاقستان». قوستاناي.