قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ رەسەيلىك ارىپتەستەرىنە جايىق وزەنى بويىنشا گيدرولوگيالىق جىلدىق انىقتامالارمەن الماسۋدى ۇسىندى. بۇل تۋرالى ورىنبور قالاسىنداعى قازاقستاننىڭ ەكولوگيا ءمينيسترى مەن رەسەي فەدەراتسياسى تابيعي رەسۋرستار جانە ەكولوگيا ءمينيسترى الەكساندر كوزلوۆتىڭ ەكىجاقتى كەزدەسۋىندە ايتىلدى.
ماعزۇم مىرزاعاليەۆتىڭ ايتۋىنشا جايىقتىڭ تارتىلۋى مەن وسىنىڭ اسەرىنەن وزەن ەكوجۇيەسىنىڭ بۇزىلۋى – ونىڭ سۋ شارۋاشىلىق جۇيەسىن كەشەندى زەرتتەۋدى تالاپ ەتەدى. مينيستر 1981 جىلعا جەيىن جايىقتىڭ بىرىڭعاي گيدرولوگيالىق جىلدىعى جاسالىپ, 1982 جىلدان باستاپ قازكسر مەن رفكسر ءۇشىن بولەك دايىندالا باستاعانىن اتاپ ءوتتى. ال كسرو تاراعان سوڭ ءار ەل ءوز الدىنا جاسايتىن بولدى.
ء«دال وسىنداي جۇمىس ءتاسىلى ءبىز قازىر كورىپ وتىرعان سالدارعا اكەپ سوقتىردى دەپ ەسەپتەيمىن. وسىعان بايلانىستى جايىق بويىنشا گيدرولوگيالىق جىلدىقتارمەن تۇراقتى تۇردە الماسىپ وتىرۋ تاجىريبەسىن ەنگىزۋدى ۇسىنامىن», دەدى م.مىرزاعاليەۆ.
بۇدان بولەك قازاقستاننىڭ ەكولوگيا ءمينيسترى جايىقتىڭ تومەنگى جاعىنداعى ەكوجۇيەنى ساقتاۋ ءۇشىن ءساۋىر-مامىر ايلارىندا يريكلين سۋ قويماسىنان جىبەرىلەتىن سۋ كولەمىن ارتتىرۋدى ۇسىندى.
«سونىمەن بىرگە وزەن باسسەينىندەگى كاسىپورىنداردىڭ بىرىڭعاي رەەسترىن جاساپ, ءار كاسىپورىننىڭ اسەرى بويىنشا ساراپتاما جۇرگىزۋ كەرەك. ءسويتىپ اينالىمدى سۋمەن قامتاماسىز ەتۋ جۇيەسىن, سۋ تازالاۋدىڭ ءتيىمدى جۇيەسىن جانە اۋىلشارۋاشىلىعىندا سۋ ۇنەمدەۋ تەحنولوگياسىن ەنگىزۋ قاجەت. اتقارىلعان جۇمىس تۋرالى اقپاراتتى جايىق ترانسشەكارالىق وزەنىنىڭ ەكوجۇيەسىن ساقتاۋ بويىنشا قازاقستان-رەسەي كوميسسيانىڭ اياسىندا قاراۋعا ەنگىزۋدى ۇسىنامىز», دەدى قازاقستاندىق ۆەدومستۆو باسشىسى.
بۇدان بولەك, قازاقستان تاراپى باتىس قازاقستان وبلىسى اتموسفەرالىق اۋاسىنىڭ ترانسشەكارالىق لاستانۋىماسەلەسىن دە قوزعادى.
«اتموسفەرالىق اۋانىڭ مونيتورينگىنەن رەسەي فەدەراتسياسىنىڭ شەكارالىق اۋىلدارىندا كۇكىرتتوتىعى كورسەتكىشىنىڭ ارتىپ كەتۋ جاعدايلارى بايقالدى. جەرگىلىكتى تۇرعىندار مەن اتقارۋشى ورگانداردان گازدىڭ ءيىسى بويىنشا ءجيى شاعىم تۇسەدى. اسىرەسە, ول جەل سولتۇستىككە قاراي تۇرعاندا قاتتى بايقالادى. بۇل وزىندىك ءيىستىڭ كوزى – ورىنبورداعى گاز جاعاتىن كەنورىندارى», دەدى ماعزۇم مىرزاعاليەۆ.
ماسەلەنىڭ شەشىمى رەتىندە قازاقستاننىڭ ەكولوگيا ءمينيسترى اتموسفەرالىق اۋانىڭ لاستانۋ دەڭگەيى بويىنشا بىرلەسكەن مونيتورينگ پەن ساراپتاما جۇرگىزۋدى, قازاقستان مەن رەسەي تاراپىنان اۆتوماتتاندىرىلعان باقىلاۋ پوستتارىن ورناتۋدى, سونىمەن قاتار مۇنايگاز كومپانيالارىنىڭ قىزمەتىن باقىلاۋدى كۇشەيتۋدى ۇسىندى.
كەزدەسۋدە سونىمەن بىرگە قازاقستان مەن رەسەيدىڭ ايماقارالىق ارىپتەستىگى فورۋمىن وتكىزۋ ماسەلەسى تالقىلاندى. تاراپتار كورمەنىڭ بىرلەسكەن تانىستىرىلىمدارى بويىنشا كەلىسىمدى, قول قويىلۋى ءتيىس ەكىجاقتى قۇجاتتاردى جانە فورۋمنىڭ پانەلدىك سەسسياسى باعدارلاماسىن اياقتاۋ قاجەتتىگى تۋرالى ءوزارا كەلىسىمگە كەلدى.
كەزدەسۋ قورىتىندىسى بويىنشا ەكى ەلدىڭ تابيعات قورعاۋ ۆەدومستۆولارىنىڭ مينيسترلەرى ەرتىس ترانسشەكارالىق وزەنىنىڭ ەكوجۇيەسىن قالپىنا كەلتىرۋ جانە ساقتاۋ ماسەلەسىن تولىققاندى زەرتتەۋ ءۇشىن كەلەسى كەزدەسۋدى پاۆلودار قالاسىندا وتكىزۋ تۋرالى شەشىم قابىلدادى.
