استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «قازاقستاننىڭ بولاشاعى – قازاق تىلىندە» اتتى تەلەۆيزيالىق جوباسىنىڭ قورىتىندى ماراپاتتاۋ ءراسىمى بولىپ ءوتتى.
استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «قازاقستاننىڭ بولاشاعى – قازاق تىلىندە» اتتى تەلەۆيزيالىق جوباسىنىڭ قورىتىندى ماراپاتتاۋ ءراسىمى بولىپ ءوتتى.
بۇل جوبا مادەنيەت جانە اقپارات مينيسترلىگى ءتىل كوميتەتىنىڭ تاپسىرىسى بويىنشا ءتۇسىرىلىپ, «قازمەديا حولدينگ» جاۋاپكەرشىلىگى شەكتەۋلى سەرىكتەستىگى جانە «ەۋرازيا ءبىرىنشى» ارناسىنىڭ كورسەتكەن اقپاراتتىق قولداۋى بويىنشا جۇزەگە اسقان. ەلىمىزدىڭ ەڭ وزەكتى ماسەلەسى – قازاق ءتىلىنىڭ شىن مانىندە مەملەكەتتىك ءتىل مارتەبەسىنە جەتە الماۋى. كەلەلى ماسەلەنى شەشۋدە ەرەكشە ەرەن ەڭبەك سىڭىرگەن وسى تەلەجوبا بولسا كەرەك. ەلباسىمىزدىڭ تالاي رەت تۇعىردا تۇرىپ «قازاقستاننىڭ بولاشاعى – قازاق تىلىندە!» دەگەن ءسوزىن ۇران ەتىپ, «ەۋرازيا ءبىرىنشى» ارناسى بويىنشا باعدارلاما ءتىل ۇيرەنۋشى كورەرمەن قاۋىمعا جول تارتتى. جوباعا قاتىسقان 10 ازامات بار-جوعى 30 تەلەساباقتا قازاق ءتىلىن مەڭگەرىپ شىقتى. اتالمىش باعدارلامادا ءتىل ۇيرەنۋشىلەر ءۇشىن قازاقستان حالقى اسسامبلەياسى ارنايى ازىرلەگەن «ءتىلدارىن» ادىستەمەسى بويىنشا وقىتىلدى. جوباعا قاتىسقان 10 ازامات باعدارلاما بارىسىندا 300 ءسوز جانە 50 ءسوز ءيىرىمىن ۇيرەندى. مۇلدە قازاق ءتىلىن بىلمەگەن ولار بۇگىندە ەركىن سويلەسەدى. ولارعا ۇستازدىق ەتىپ, تەلەساباقتاردى جۇرگىزگەن قازاقستان رەسپۋبليكاسى ءبىلىم بەرۋ ءىسىنىڭ ۇزدىگى, «ءتىلدارىن» كەشەندى ادىستەمەسىنىڭ اۆتورى سارا جۇمانوۆا.
سالتاناتتى كەشتە «قازاقستاننىڭ بولاشاعى – قازاق تىلىندە!» جوباسىنا قاتىسقان 10 ازاماتقا ءتىل ۇيرەنۋ كۋرسىنان وتكەندىكتەرى تۋرالى سەرتيفيكاتتار تابىستالدى.
جوباعا قاتىسۋشى الەكساندرا رومانوۆا مەن قانات ساتىباەۆقا سەرتيفيكاتتاردى تابىستاي وتىرىپ «جۋرناليستيكا جانە ساياساتتانۋ» فاكۋلتەتىنىڭ دەكانى قايرات ساق: «اتاقتى الاشوردا كوسەمى احمەت بايتۇرسىنوۆتىڭ: «ءتىلى جوعالعان جۇرتتىڭ ءوزى دە جوعالادى» دەگەن ءسوزى بار. ەلباسى ءوزىنىڭ جولداۋىندا 2020-شى جىلى حالىقتىڭ 95 پايىزى قازاق تىلىندە سويلەيدى دەپ قاداپ ايتتى. بۇل بىزگە جۇكتەلگەن ۇلكەن جاۋاپكەرشىلىك. وسىنداي وزەكتى ماسەلەنىڭ وتكىر شەشىمىن تاۋىپ, جوباعا قولداۋ كورسەتكەن «ەۋرازيا ءبىرىنشى» ارناسىنا ريزاشىلىعىمىزدى بىلدىرەمىز. ال بۇگىنگى ماراپاتتاۋ سالتاناتى ءبىزدىڭ فاكۋلتەتتە ءوتىپ جاتقانى بىزگە دە ۇلكەن مارتەبە», – دەپ ىزگى نيەتىن ءبىلدىردى. ال, كەلەسى قاتىسۋشىلار الەنا بايانبەكوۆا مەن حاسان شاريپوۆتى جۋرناليست, «باس رەداكتورلار كلۋبى» قوعامدىق بىرلەستىگىنىڭ پرەزيدەنتى كەنجەبولات جولدىباي ماراپاتتادى. ول: «ادام جاڭا ءبىر ءتىلدى مەڭگەرىپ, بىلگەن سايىن تانىم كوكجيەگىن دە كەڭەيتە تۇسەدى. سوندىقتان, ءتىلدى ۇيرەنگەندەرىڭىز ەڭ الدىمەن, وزدەرىڭىز ءۇشىن ۇلكەن جەتىستىك», – دەپ ۇلاعاتتى ۇستاز س.جۇمانوۆاعا ريزاشىلىعىن ءبىلدىردى. مادەنيەت جانە اقپارات مينيسترلىگى جانىنداعى ءتىل كوميتەتىنىڭ باسقارما باسشىسى سەرىك جاقسىلىق ۇلى كارينا كۋماروۆا مەن ولگا بىكوۆسكاياعا سەرتيفيكاتتاردى تاپسىردى. بارلىق قاتىسۋشىلار قازاق تىلىندە ويلارىن ەركىن جەتكىزىپ, العىستارىن ءبىلدىرىپ جاتتى. ءسوز كەزەگىن العان سارا جۇمانوۆا: «بۇل باعدارلاما ارقىلى قاتىسۋشىلار ءتىلدى 3 اپتادا مەڭگەرىپ شىقتى. باعدارلاما ءان ايتۋمەن باستالىپ, قاتىسۋشىلاردى ءتىلدىك كەدەرگىدەن وتكىزدى, ەكىنشىدەن, ەموتسيونالدىق-پسيحولوگيالىق جاعدايدىڭ قولايلىلىعىنان ولاردىڭ ساباقتا ويلارىن ەمىن-ەركىن ءبىلدىرۋىنە جانە قارىم-قاتىناس جاساۋلارىنا مۇمكىندىك تۋعىزىلدى. جاڭا يننوۆاتسيالىق ادىستەمە بويىنشا قازاق ءتىلى گرامماتيكاسى فۋنكتسيونالدىق تۇرعىدان ۇسىنىلدى. ياعني, ءتىلدى مەڭگەرۋ ءۇشىن جيىلىك نەگىزىندە 300 لەكسيكالىق مينيمۋم جانە 15 گرامماتيكالىق قۇرىلىم عانا ءبىلۋ شارت ەكەن. وسى ۇستانىم بويىنشا جۇمىس ىستەپ, ونىڭ ءتيىمدى ەكەنىن ءبىز دالەلدەپ شىقتىق», – دەپ قاتىسۋشىلارعا العىسىن ءبىلدىردى.
باعدارلاماعا قاتىسقان 10 ازامات ۇلتىنا, جاس ەرەكشەلىكتەرىنە, قىزمەتىنە قاراماستان قازاق ءتىلىن مەڭگەرىپ شىقتى. قاتىسۋشىلاردىڭ ءبىرى حاسان شاريپوۆ: «ءتىلدى ۇيرەنۋ ەشقاشان دا كەش ەمەس ەكەن!» دەپ وي ءتۇيدى.
نۇرزادا كۇمىسبەك,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى.
