كەشە پارلامەنت سەناتى الەۋمەتتىك-مادەني دامۋ كوميتەتى مۇشەلەرىنىڭ مەملەكەتتىك ورگان باسشىلارىمەن ەلباسى نۇرسۇلتان نازارباەۆتىڭ «قازاقستان-2050» ستراتەگياسىن جۇزەگە اسىرۋ شەڭبەرىندە «ەلىمىزدى الەۋمەتتىك جاڭعىرتۋ بويىنشا جۇرگىزىلىپ جاتقان جۇمىستاردىڭ بارىسى» تاقىرىبىن تالقىلاعان كەزدەسۋى بولدى.
كەشە پارلامەنت سەناتى الەۋمەتتىك-مادەني دامۋ كوميتەتى مۇشەلەرىنىڭ مەملەكەتتىك ورگان باسشىلارىمەن ەلباسى نۇرسۇلتان نازارباەۆتىڭ «قازاقستان-2050» ستراتەگياسىن جۇزەگە اسىرۋ شەڭبەرىندە «ەلىمىزدى الەۋمەتتىك جاڭعىرتۋ بويىنشا جۇرگىزىلىپ جاتقان جۇمىستاردىڭ بارىسى» تاقىرىبىن تالقىلاعان كەزدەسۋى بولدى.
كەزدەسۋدى الەۋمەتتىك-مادەني دامۋ كوميتەتىنىڭ توراعاسى اقان بيجانوۆ اشىپ, جۇرگىزىپ وتىردى. ءوزىنىڭ كىرىسپە سوزىندە كوميتەت ءتوراعاسى «قازاقستان-2050» ستراتەگياسى الەۋمەتتىك ماسەلەلەرگە ءۇلكەن كوڭىل بولەتىنىن ايتا كەلىپ, وسى باعىتتا قابىلدانعان باعدارلامالاردىڭ ورىندالۋ بارىسى تۋرالى كوميتەت مۇشەلەرى تولىق حاباردار بولعىسى كەلەتىنىن جەتكىزۋمەن بىرگە, مەملەكەتتىڭ جاڭا الەۋمەتتىك ساياساتىنىڭ ەرەكشەلىگى مەن وزەكتىلىگىن اتاپ ءوتتى. الەۋمەتتىك قورعاۋ تەتىكتەرىن كۇشەيتۋ, ايماقتارداعى الەۋمەتتىك تەڭسىزدىكتەردى جويۋ, ەڭبەك جانە جۇمىسپەن قامتۋ ساياساتىن جاڭعىرتۋ, دەنساۋلىق ساقتاۋ مەن ءبىلىم بەرۋ جۇيەسىن دامىتۋ ماسەلەلەرى مەملەكەتتىڭ ستراتەگيالىق باعىتتارىن ماقسات ەتكەن شەشىمدەردىڭ قاتارىندا, دەدى ول.
سونىمەن بىرگە, الەۋمەتتىك باعدارلامالاردىڭ ورىندالۋىنا زاڭنامالىق تۇرعىدان قولداۋ قاجەت بولسا, پارلامەنتاريلەر بۇل ىسكە ارقاشان دا دايىن ەكەندىگى ايتىلدى. وسى تۇرعىدا مەملەكەت باسشىسى ەڭبەكاقى, زەينەتاقى مەن جاردەماقىنىڭ, كەپىلدى دارىگەرلىك جانە ءبىلىم بەرۋ قىزمەتتەرىنىڭ كولەمىن, مەكتەپكە دەيىنگى تاربيەمەن قامتاماسىز ەتۋ, سونداي-اق, وسى ستاندارتتاردى بۇزعانى ءۇشىن لاۋازىمدى ادامدار مەن جۇمىس بەرۋشىلەردىڭ جاۋاپتىلىعىن ورنىقتىرۋمەن بىرگە, ءومىر ساپاسىنىڭ ەڭ تومەنگى نەگىزگى كورسەتكىشتەرى كورىنىس تاباتىن الەۋمەتتىك ستاندارتتار مەن الەۋمەتتىك قۇقىقتار تۋرالى زاڭ جوباسىن ءازىرلەۋ تۋرالى تاپسىرما بەرگەنىن اتاپ ءوتتى.
ەلىمىزدى الەۋمەتتىك جاڭعىرتۋعا مۇمكىندىك بەرەتىن باعدارلامالاردىڭ ورىندالۋ بارىسى تۋرالى العاشقى باياندامانى ەڭبەك جانە حالىقتى الەۋمەتتىك قورعاۋ ءمينيسترى تامارا ءدۇيسەنوۆا جاسادى. «جۇمىسپەن قامتۋدىڭ جول كارتاسى-2020» باعدارلاماسى بويىنشا ۇستىمىزدەگى جىلدىڭ 1 قاراشاسىنا دەيىنگى ءمالىمەتكە ءسايكەس شامامەن 256 مىڭ ادام مەملەكەتتىك كومەك العان. باعدارلاماعا قاتىسۋشىلاردىڭ جارتىسىنان استامى 29 جاسقا دەيىنگى جاستار. وسى شارا بويىنشا بارلىعى 234 مىڭ ادام جۇمىسقا ورنالاسقان. سونىڭ ىشىندە 109 مىڭى قايتا دايارلاۋ, دايىنداۋ جانە بىلىكتىلىگىن ارتتىرۋ كۋرستارىنان وتكەن. 16 مىڭنان استامى شاعىن نەسيەلەرمەن قامتىلىپ, قوسىمشا 12 مىڭ جاڭا جۇمىس ورىندارى اشىلعان.
سونداي-اق, باعدارلامانى ورىنداۋ بارىسىندا 11 مىڭنان ارتىق ادامنىڭ جۇمىسى بار جەرلەرگە كوشىرىلىپ, ولاردىڭ اراسىنان جۇمىس ىستەۋگە قابىلەتتىلەرىنىڭ 80 پايىزعا جۋىعى ەڭبەككە تارتىلعانى بەلگىلى بولدى. ال اۋىلدىق ينفراقۇرىلىمداردى دامىتۋ بويىنشا 1485 جوبا ىسكە اسىرىلىپ, سونىڭ ارقاسىندا 26 مىڭ ادام جۇمىسپەن قامتىلىپتى. سونىمەن بىرگە, بايانداماشى باعدارلامانى ىسكە اسىرۋعا قولبايلاۋ بولىپ وتىرعان جايتتارعا دە توقتالىپ ءوتتى. سونىڭ ىشىندە باعدارلامانىڭ قالىڭ كوپشىلىككە تاراماي, كوپتەگەن ەلدى مەكەندەردىڭ ونىڭ ىسكە اسىرىلۋ تەتىكتەرىنەن حابارسىز ەكەندىگى ايتىلدى.
قوسىمشا بايانداما جاساعان ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ كەزدەسۋگە قاتىسۋشىلاردى ازىرلەنىپ جاتقان ەڭ تومەنگى الەۋمەتتىك ستاندارتتار تۋرالى زاڭ جوباسى جانە ونىڭ نەگىزگى قارجى-ەكونوميكالىق كورسەتكىشتەرى تۋرالى حاباردار ەتتى.
كەزدەسۋگە, سونداي-اق, سپورت جانە دەنەشىنىقتىرۋ جونىندەگى اگەنتتىكتىڭ توراعاسى تاستانبەك ەسەنتاەۆ, دەنساۋلىق ساقتاۋ ءمينيسترىنىڭ ورىنباسارى ەرىك ءبايجۇنىسوۆ, ءبىلىم جانە عىلىم ءمينيسترىنىڭ ورىنباسارى تاقىر بالىقباەۆ, مادەنيەت ءجانە اقپارات مينيسترلىگىنىڭ جاۋاپتى حاتشىسى جاننا كۇرمانعاليەۆا, كاسىپوداقتار فەدەراتسياسى ءتوراعاسىنىڭ ورىنباسارى قايرات اماندىقوۆ قاتىسىپ, دەپۋتاتتاردىڭ ساۋالدارىنا جاۋاپ بەردى.
كەزدەسۋدى قورىتىندىلاي كەلىپ, ا.بيجانوۆ بۇل تالقىلاۋدىڭ ەلىمىزدىڭ الەۋمەتتىك جاڭعىرتۋدىڭ قۇقىقتىق بازاسىن جەتىلدىرۋدەگى جۇمىستاردىڭ تيىمدىلىگىن ارتتىرۋعا ىقپال ەتەتىنىن اتاپ ءوتتى.
جاقسىباي سامرات,
«ەگەمەن قازاقستان».
