«بالا كۇتىمىنە جاردەماقىنى ارتتىرۋ ماسەلەسىنە باستاماشىلىق جاساماقپىز. بۇگىندە ول بالا 1 جاسقا تولعانعا دەيىن تولەنەدى. ءبىز بۇل مەرزىمدى 1,5 نەمەسە 3 جىلعا دەيىن ۇزارتۋ نۇسقاسىن قاراستىرىپ وتىرمىز. قازىرگى ۋاقىتتا شامامەن 387 مىڭ انا بالا كۇتىمىنە بايلانىستى اتالعان جاردەماقىنى الادى. ونىڭ ىشىندە الەۋمەتتىك ساقتاندىرۋ قورىنان الاتىنداردىڭ سانى ازداۋ عانا», - دەدى ءبىرجان نۇرىمبەتوۆ.
ماسەلەن, ونىڭ دەرەگىنشە, جۇمىس ىستەمەيتىن انالار بيۋدجەتتەن اي سايىن 1 جىل بويى 15-24 مىڭ تەڭگە الىپ وتىرادى. ال جۇمىس ىستەيتىن انالار الەۋمەتتىك ساقتاندىرۋ قورىنان اي سايىن جالاقىسىنىڭ شامامەن 40 پايىزىن الادى. سونىمەن قاتار مينيستر مۇگەدەكتىك بويىنشا جاردەماقىنى قايتا قاراستىرۋ جوسپارلانىپ وتىرعاندىعىن ايتتى.
«ەرەكشە قاجەتتىلىكتەرى بار ادامدارعا مەملەكەتتىك قولداۋ كەرەك. ءبىز مۇگەدەكتىگى ءۇشىن كۇتىمگە جاردەماقى تولەۋ باستاماسىن كوتەرمەكپىز. بۇگىندە اتا-انالار مەن قامقورشىلارعا مۇگەدەك بالا كۇتىمىنە, سونىمەن قاتار, بالا كەزىنەن ءبىرىنشى توپتاعى مۇگەدەك بالا كۇتىمىنە جاردەماقى قاراستىرىلعان. بىراق بالا كەزىنەن مۇگەدەك ەمەس ءبىرىنشى توپتاعى ەرەسەك مۇگەدەكتەر بار. ولار دا كۇتىمدى قاجەت ەتەدى. سوندىقتان قوسىمشا جاردەماقى ەنگىزۋ دۇرىس بولار ەدى. بۇل ازىرشە مينيسترلىكتىڭ جوسپارى عانا. ۇكىمەتكە جانە اتقارۋشى ورگاندارمەن كەلىسۋگە ءالى ەنگىزىلگەن جوق», - دەدى ول.
