«قازاقىلىقتىڭ قايماعى بۇزىلماعان» دەپ باعالاناتىن ماڭعىستاۋدا قۇراق كورپە قۇراۋ ۇزاق جىلداردان بەرى انادان قىزعا, كەلىنگە جالعاسىپ كەلەدى. ماڭعىستاۋدا وتكەن عاسىردىڭ 80-جىلدارى ەسىن ءبىلىپ, بويجەتىڭكىرەپ قالعان قىز بالالاردىڭ ىسمەرلىكپەن اينالىسپاعانى كەمدە-كەم. سەبەبى كيىز ءۇيدى باۋ-باسقۇر, شاشاق-ادەمى جەلباۋ, قورجىن, وزگە دە قازاقى ناقىشتاعى بۇيىمدارمەن جاساندىرۋ, سونداي-اق, ءجۇن ساباپ كيىز باسۋ, ءتۇر ويىپ تەكەمەت باسۋ, ۇرشىق ءيىرىپ, ونى شيراتىپ كيىم توقۋ, شي وراۋ, كورپە قۇراپ, سىرعالاق اينالدىرۋ, وزگە دە حالقىمىزدىڭ ءتول ونەرى ەل اراسىندا سانگە اينالدى ما – ايتەۋىر سول كەزدە ءجاسوسپىرىم قىزداردىڭ شەبەرلىگى بىرىنەن-ءبىرى اسىپ تۇسكەندىگىنە بۇگىنگى كۇن كۋا. سەبەبى بۇگىنگى حالقىمىزدىڭ ءتول ونەرىن ناسيحاتتاپ, ونى جاستار اراسىنا ۇيرەتىپ جۇرگەن بۋىن – سول كەزدەگى بالاڭ قىزدار – بۇگىنگى اپالار, اق جاۋلىقتى انالار. كەي كەزدە ول ءۇردىس «ەل اراسىندا سانگە اينالدى» دەپ ايتۋ بەكەر سياقتى بولادى, قۇددى اق جاۋلىقتى انالار كەڭەستىك كەزەڭنىڭ قىسپاعىنا قاراماي جاستارعا ءتول ونەردى جانتالاسا ۇيرەتىپ, بۇگىنگە جالعاي جەتكىزىپ كەتۋگە ەڭبەك ەتكەن-اۋ دەگەن وي كەلەدى.
بۇگىنگى ۇرپاق بابالاردان, انالاردان قالعان ءتول ونەردى زاماناۋي ۇلگىدە دامىتىپ, جان-جاقتى جەتىلدىرە تۇسۋگە ۇمتىلۋدا. ماتانىڭ قات كەزىندە قولدا بار مۇمكىندىك شەگىندە عانا قۇراي العان كورىكتى كورپەلەردى بۇگىنگى شەبەرلەر كەزدەمە ماتالاردى – جۇمساعى كەرەك پە, قاتتىسى كەرەك پە, ويۋلىسى ما, الە ويۋسىزى ما, گۇلدىسى مە, جوق پا, تۇكتىسى كەرەك پە, تۇكسىزى قاجەت پە, اق, قىزىل, جاسىل, سارى – قاسىنا تاۋ عىپ ءۇيىپ قويىپ قالاۋىنشا پايدالانىپ, كورپەنى قۇبىلتا قۇراۋدا. بىراق ونىڭ ارعى باستاۋى ءبارىبىر بابا مۇرادا جاتىر.
ماڭعىستاۋدا جىل سايىن قۇراق كورپەدەن فەستيۆال وتكىزىلىپ كەلەدى. بۇعان دەيىن ەكى جىل قاتارىنان جاڭاوزەن قالاسىندا وتكەن شارا بيىل ماڭعىستاۋ وبلىسى كاسىپكەرلەر پالاتاسى ىسكەر ايەلدەر كەڭەسىنىڭ ۇيىمداستىرۋىمەن اقتاۋ قالاسىندا جالعاسىن تاپتى. وعان وڭىردەگى بەس
اۋدان مەن ەكى قالادان 28 قاتىسۋشى جينالدى.
– قۇراق – «ادامنىڭ باسى قۇرالسىن» دەگەن ىرىممەن تىگىلەتىن كورپە. ماقساتىمىز – ۇلتتىق قول ونەرىمىزدى جاڭعىرتىپ, ۇرپاقتان-ۇرپاققا مۇرا ەتۋ. ۇيدە وتىرىپ ءىس تىگىپ, ونى ونلاين تۇردە ساۋداعا شىعارىپ وتىرعان وبلىستىڭ ءار تۇكپىرىندەگى نازىك جاندىلاردىڭ باسىن قوسۋ, ءبىر-بىرىنەن تاجىريبە الماستىرۋ. جۇمىسسىز وتىرعان قىز-كەلىنشەكتەردى كاسىپكە باۋلىپ, ىنتالاندىرۋدى كوزدەيمىز, – دەيدى جاڭاوزەن قالالىق ىسكەر ايەلدەر كەڭەسىنىڭ ءتورايىمى تىلەكتەس بولاتباەۆا.
فەستيۆالگە كوزدىڭ جاۋىن الاتىن سان ءتۇرلى كورپەلەر قويىلدى. ماقپال, بارقىت, شىت, ت.ب. ماتالار تۇرىنەن قۇرالعان كورپەلەردەن ماڭعىستاۋدىڭ ەجەلگى قولونەرىنىڭ جارقىن كورىنىستەرىن بايقاۋعا بولادى. شي قۇراقتاردىڭ اراسىنا تۇيە بەينەسىن, تاستاعى ەجەلگى تاڭبالى بەلگىلەردى سالىپ تىگۋ, جاڭاشا ءسان كىرگىزۋدى كوزدەگەن ۇلگىلەرى دە بار.
تانىمال ىسمەر-شەبەر اپالار قازىلىق ەتكەن بايقاۋدا جۇلدەگەرلەر ارنايى ورىندارمەن بىرگە «كورەرمەن كوزايىمى», «جاس شەبەر», «ىنتالاندىرۋ», «ويۋ قۇراق شەبەرى», «ىسمەر ايەل», «كۇمىس قول», «التىن ويماق», «قۇراق الەمىنىڭ حانشايىمى» سىندى جۇلدەلەرمەن ماراپاتتالدى.
قۇراق كورپە – ءۇيدىڭ ءسانى, ءناسىبى مول كاسىپ, ۇلتتىق ونەر. وعان جاستاردىڭ قىزىعۋشىلىعى دا جوعارى. دەمەك, قىزىعۋشىلىق بار جەردە كورپە قۇراۋ سان قىرلى يدەيالارمەن جاڭارا جەتىلىپ جالعاسا تۇسەدى دەۋگە بولادى.
ماڭعىستاۋ وبلىسى
