التىن مەدال سۇيىنشىسىنە – 100 مىڭ دوللار
بەيسەنبى, 28 ماۋسىم 2012 7:09
وليمپيا ويىندارى ءبىر قىر استىندا. ءتورت جىل بويى دايىندىق, جولداما الا الام با دەپ كىرپىك ايقاسپاعان تۇندەر, قۇراماداعى ورىن ءۇشىن تالاس… ءبارى, ءبارى ارتتا قالىپ بارادى. سوڭعى دايىندىق, سان جىلدار بويى ابدەن ماشىقتانعان ءادىس-ايلالاردى تاعى پىسىقتاۋ, سوسىن قىسقا مەرزىمدى دەمالىس, سوسىن لوندون…
بەيسەنبى, 28 ماۋسىم 2012 7:09
وليمپيا ويىندارى ءبىر قىر استىندا. ءتورت جىل بويى دايىندىق, جولداما الا الام با دەپ كىرپىك ايقاسپاعان تۇندەر, قۇراماداعى ورىن ءۇشىن تالاس… ءبارى, ءبارى ارتتا قالىپ بارادى. سوڭعى دايىندىق, سان جىلدار بويى ابدەن ماشىقتانعان ءادىس-ايلالاردى تاعى پىسىقتاۋ, سوسىن قىسقا مەرزىمدى دەمالىس, سوسىن لوندون…
قازىر لوندون الەمنىڭ نازارىندا. وندا سپورت تاريحىنىڭ جاڭا پاراقتارى التىن ارىپتەرمەن جازىلادى. باعى جانعان مەملەكەتتەر, بەيجىڭدە سۋعا جۇزۋدەن ءبىر ءوزى سەگىز التىن ولجالاعان امەريكالىق مايكل فەلپس, اتقان وقتاي زاۋلايتىن, سۇيىكتى يامايكاسىنا ءبىر ءوزى ءۇش التىن سىيلاعان قارا مارجان ۋسەين بولت سەكىلدى جاڭا چەمپيونداردىڭ اتاعى جەر جاھانعا جايىلادى. جەر تارپىعان سايگ ۇلىكتەرىن دوداعا قوسقان قازاقستاننىڭ دا كوڭىلى كۇپتى.
وسىندايدا ەل مۇراتىن بيىك قوياتىن ازاماتتار لوندوننان قۇس قاناتىمەن جەتەتىن جۇرەكجاردى حابارلارعا سۇيىنشىلەرىن اتاپ جاتىر, قازاقستان كۇرەس فەدەراتسياسىنىڭ جيىنىندا فەدەراتسيا پرەزيدەنتى, “قازترانسگاز” كومپانياسىنىڭ پرەزيدەنتى سەرىك سۇلتانعالي فەدەراتسيا اتىنان لوندوندا التىن مەدال جەڭىپ العان بالۋاندارعا 100 مىڭ دوللار سىياقى بەرىلەتىندىگىن ايتتى. كۇمىس مەدالعا 50 مىڭ دوللار, قولا مەدالعا 30 مىڭ دوللار تاعايىندالعان.
– سىزدەر ەلىمىزدىڭ مەرەيىن اسقاقتاتۋ ءۇشىن تەر توگىپ جۇرسىڭدەر, – دەدى فەدەراتسيا پرەزيدەنتى. – بۇعان دەيىن دە قازاق سپورتىندا ماڭدايى جارقىراعان جۇلدىزدار كوپ بولعان. لوندوننان كەيىن سول شوعىردىڭ مولايۋىنا ءبارىمىز دە تىلەكتەسپىز. وليمپيادا – كوسموسقا ۇشقاننان بەتەر ماڭىزدى مەجە. وتانىمىزدىڭ پاتريوتى رەتىندە بايراعىمىزدى جەلبىرەتىپ, ءانۇرانىمىزدى شىرقاتار ساتتەرىڭىزگە كۋا بولعىمىز كەلەدى.
ءسوزىن وسىلاي تۇجىرعان سەرىك سۇلتانعالي استانادا تاياۋ جىلداردا كۇرەس سارايى سالاتىندىعىن جەتكىزدى. جوباسىن كورەي ساۋلەتشىلەرى جاساعان. اقوردانىڭ كورنەكتى جەرىنە ورىن تەبەتىن سارايدىڭ بار شىعىنىن “قازترانسگاز” كومپانياسى كوتەرىپ الماق. الەمدىك ۇلگىدە سالىنىپ جاتقان بوكس ورتالىعى بار. ەندى ونىڭ قاتارىنا كۇرەس سارايى قوسىلىپ جاتسا, تاريح ساحناسىنا اتتىڭ ۇستىندە شىققان جاۋىنگەر حالىقتىڭ ۇلاندارى وليمپ بيىگىنەن ءالى تالاي رەت قول بۇلعايتىن بولادى.
جيىندا ەركىن كۇرەس قۇراماسىنىڭ باس باپكەرى التاي تاناباەۆ, گرەك-ريم كۇرەسى قۇراماسىنىڭ باس باپكەرى مۇراتبەك قاسىمحانوۆ جانە ايەلدەر كۇرەسى قۇراماسىنىڭ باس باپكەرى ەرجان تەلاقىنوۆ شاكىرتتەرى جايىندا ەسەپ بەرىپ, بيىك ناتيجەگە جەتۋگە دايىن ەكەندىكتەرىن باياندادى.
باقتيار تايجان,
“ەگەمەن قازاقستان”.
الماتى.
