ءىىى جاسوسپىرىمدەر وليمپيا ويىندارىنىڭ ەڭ سوڭعى كۇنىندە قازاقستان قۇراماسىنىڭ قورجىنى ەكى جۇلدەمەن تولىقتى. بوكسشى تالعات شايكەن (64 كگ) فينالدا رەسەيلىك يليا پوپوۆتەن جەڭىلىپ, وليمپيادانىڭ كۇمىس جۇلدەگەرى اتاندى. جەكپە-جەكتەن كەيىن پىكىر بىلدىرگەن شايكەن بۇعان دەيىن ول بوكسشىنى ءۇش رەت جەڭگەنىن, بۇل كەزدەسۋدە جەڭىلمەگەنىن ايتتى. بىراق تورەشىلەر جەڭىستى 1:4 ەسەبىمەن رەسەيلىك بوكسشىعا بەردى. ال كاراتە سپورتىنان 68 كيلو سالماق دارەجەسىندە سىنعا تۇسكەن ءابىلمانسۇر باتىرعالي جارتىلاي فينالدا بەلگيالىق كۆەنتي ماحاۋدەننەن جەڭىلىپ, ءتۋرنيردىڭ قولا جۇلدەگەرى اتاندى.
ون ەكى كۇنگە سوزىلعان ءىىى جاسوسپىرىمدەر وليمپيا ويىندارىنىڭ قورىتىندىسى بويىنشا, قازاقستاندىق سپورتشىلار مەدال سانىنان دا, التىن جۇلدە بويىنشا دا رەكورد ورناتتى. بۇعان دەيىنگى ەكى وليمپيادادا وتانداستارىمىز 3 التىن مەدال يەلەنگەن بولاتىن. بيىل 4 التىن, 3 كۇمىس جانە 3 قولا جۇلدەگە قول جەتكىزدى. جالپىكوماندالىق ەسەپتە ءبىزدىڭ سپورتشىلار جالپى سانى 10 مەدالمەن ون ءتورتىنشى ورىنعا تۇراقتادى. بۇل سىندا رەسەي فەدەراتسياسىنىڭ سپورتشىلارى ءبىرىنشى بولدى. سولتۇستىكتەگى كورشىلەرىمىزدىڭ قورجىنىندا 59 مەدال بار (29 التىن, 18 كۇمىس جانە 12 قولا). قىتاي قۇراماسى 36 جۇلدەمەن (18, 9, 9) ەكىنشى ورىنعا ورنالاستى. ال ءۇشىنشى ساتىعا تابان تىرەگەن جاپونيا سپورتشىلارىنىڭ قورجىنىندا 39 مەدال بار (15, 12, 12).
جاسوسپىرىمدەر وليمپياداسىندا ەل قورجىنىنا ەڭ كوپ مەدالدى بوكسشىلار سالدى – 4 جۇلدە. ونىڭ بىرەۋى التىن, ەكەۋى كۇمىس جانە بىرەۋى قولا. دوداعا بەس بوكسشى بارعانىن ايتا كەتكەن ابزال. ايبەك ورالباي وليمپيادا چەمپيونى اتانسا, دامير تويباي مەن تالعات شايكەن كۇمىس, نادەجدا ريابەتس قولا جۇلدەنى يەلەندى. سونداي-اق ۆەلوسپورتشىلار ەۆگەني فەدوروۆ پەن گلەب برۋسەنسكي, كانوەمەن ەسكەك ەسۋدەن دياس باحريددين جانە دزيۋدوشى بەكارىس سادۋاقاس ەل قورجىنىنا التىن جۇلدە سالسا, دزيۋدوشى قىز مارگاريتا گريتسەنكو كۇمىس, كانوەمەن ەسكەك ەسۋدەن ستەللا سۋحانوۆا قولا جۇلدەگەر اتاندى.
جاسوسپىرىمدەر اراسىنداعى وليمپيا ويىندارى 2010 جىلدان بەرى تۇراقتى تۇردە ۇيىمداستىرىلىپ كەلەدى. بيىلعى جارىستى قوسا ەسەپتەگەندە قازاقستان قۇراماسىنىڭ سپورتشىلارى مۇنداي سايىسقا ءۇشىنشى رەت قاتىستى. وسى ارالىقتا ءبىزدىڭ سپورتشىلار جالپى سانى – 25 مەدال يەلەنگەن ەكەن. 2010 جىلى تۇڭعىش رەت ۇيىمداستىرىلعان بايراقتى باسەكەدە ءبىزدىڭ ەلدىڭ سپورتشىلارى ءۇش التىن, ەكى كۇمىس جانە ەكى قولا مەدال العان ەدى. جالپى سانى 7 جۇلدەمەن مەدال كورسەتكىشى بويىنشا جالپىكوماندالىق ەسەپتە 15-ورىندى مىسە تۇتتى.
اراعا ءتورت جىل سالىپ قىتايدىڭ نانكين قالاسىندا وتكەن وليمپيادادا قازاقستان قۇراماسىنىڭ سپورتشىلارى 3 التىن, 1 كۇمىس جانە 4 قولا مەدالمەن جالپىكوماندالىق ەسەپتە 21-ورىنعا تۇراقتادى.
جاسوسپىرىمدەر اراسىنداعى كەلەسى وليمپيادا 2022 جىلى سەنەگالدا وتەتىن بولدى. بۇل شەشىمدى حالىقارالىق وليمپيادا كوميتەتى بۋەنوس-ايرەستەگى سەسسيادا ءبىراۋىزدان قولدادى. سەنەگالدا وتەتىن حالىقارالىق دودا افريكا قۇرلىعىنداعى العاشقى وليمپيادا جارىسى بولماق.
ءالي بيتورە,
«ەگەمەن قازاقستان»
