جاپپاي جۇگەنسىزدىكپەن كۇرەس – ورتاق مىندەت

مەنىڭ ويىمشا, جاڭاوزەن قالاسىندا توتەنشە جاعداي جاريالاۋ تۋرالى ەل­باسى جارلىعىنىڭ ارعى استارىنان ىلىك ىزدەپ, ودان قارا اسپاندى تۋدىرۋدىڭ قاجەتى جوق. ونىڭ ۋاقىتى جيىرما كۇن دەپ بەلگىلەنگەنىمەن, ونداعى جاعداي تۇراقتانسا تۇبەكتەگى توتەنشە جاعداي دا تەزىرەك توقتاتىلۋى ابدەن مۇمكىن. بۇلاي دەپ تۇجىرىم جاساۋىما قازىردىڭ وزىندە العىشارتتار بار دەپ وي­لايمىن. ويتكەنى تەلەارنالاردان كورىپ, ءبىلىپ وتىرعانىمىزداي, جاڭاوزەندەگى جاعداي ودان سايىن ۋشىعىپ ەمەس, كەرىسىنشە, ساعات ساناپ, كۇن ساناپ ساباسىنا ءتۇسىپ كەلە جاتقانى بەلگىلى بولىپ وتىر. بۇل رەتتە رەسپۋبليكالىق تەلەارنالاردان مەملەكەت باسشىسى نۇر­سۇلتان نازارباەۆتىڭ اقىل مەن پاراساتقا سالماق سالا سويلەگەن ءسوزى بارشا قازاق­ستان­دىق­تاردىڭ كوڭىل-كۇيىن ءدوپ باستى دەپ سانايمىن. ارينە, ءدال 16 جەلتوقسان كۇنى, تاۋەل­سىزدىگىمىزدىڭ جيىرما جىلدىعى اتالىپ ءوتىپ جاتقان تۇستا جاڭاوزەن قا­لاسىندا ادام ولىمىنە اكەلىپ سوقتىرعان شەكتەن شىققان جاپپاي بۇزاقىلىق كورىنىستەرى اۋىزدىقتالۋعا ءتيىس. قاس­كۇ­نەمدەر ءتيىستى جازالارىن الۋى كەرەك. قاتارداعى قارا­پايىم, بەيبىت, ءوز ءجون­دەرىمەن جۇرگەن ازاماتتاردىڭ زارداپ شەگۋى ەش اقىلعا سىيمايدى. ولاردىڭ قانداي جازىعى بار ەدى؟ سونىمەن بىرگە اعا ۇرپاقتىڭ وكىلى رەتىندە مەملەكەت, قوعام, بۇكىل ەل بولىپ وسى ماسەلەنىڭ ءتۇپ-تامىرىنا تەرەڭ بويلاپ, جەتە زەرتتەپ, زەردەلەۋىمىز كەرەك دەپ ويلايمىن. ءيا, قازىر ەكسترەميزممەن, لاڭ­كەس­تىك­پەن كۇرەس, ۇجىمدىق قاۋىپسىزدىك ماسە­لە­لەرى جان-جاقتى تالقىلانىپ, تەرەڭ كوڭىل ءبولىنىپ جاتقانى, بۇل جونىندە مەم­لەكەتتىك اۋقىمدا ناقتى ءىس-شارالار شوعىرى بەلگىلەنگەنى, ءسوز جوق, وتە قۇپتارلىق ماسەلە. سونىمەن بىرگە, بۇل وتە قاجەت ماسەلە. نەگىزىندە بۇل – سالدارمەن كۇرەس. سونىمەن بىرگە, جاڭاوزەن قالاسىندا جا­عاڭ­دى ۇستاتىپ, توبە شاشىڭدى تىك تۇرعىزاتىن جايسىز وقيعا مەن قولايسىز قۇبىلىستىڭ ءتۇپ-تا­مى­رى مەن سەبەپ-سالدارىن اشىپ, انىقتاپ الۋدىڭ دا ارتىق­شى­لىعى جوق. «جەل تۇرماسا, ءشوپ­تىڭ باسى قيمىل­دامايتىنىن» دا ەسكەرەيىك. ەشكىم دە ومىرگە تۋ­مى­سىنان قا­نىپەزەر, بۇزىق بو­لىپ كەلمەيدى عوي. وقىپ, ءتار­بيەلەنىپ, ەسەيىپ, ەرجەتكەن شاق­تارىندا ومىردەن ورىن تاپپاي قوعامعا كەرەكسىز بولىپ قالاتىن جاستار دا كەزدەسەدى. ءسويتىپ, ولار باس­تارىن تاۋعا دا, تاسقا دا سوققانداي كۇي كەشەدى. كەيىننەن ءدىني ەكسترەميزم مەن قىلمىسقا بوي ۇرۋى دا ابدەن مۇمكىن. ءسوز جوق, قىل­مىس جاساعان ادام جازىق­سىز قالماۋعا ءتيىس. دەگەنمەن, تەرىس وقيعانىڭ الدىن الۋ دەگەن وزەكتى ماسەلەنى دە نازاردان تىس قالدىرماۋ قاجەتتىگىن ۇعىن­دىر­عانداي بولادى, مەنىڭ كوپتى كورگەن كوڭىلىمە جاڭاوزەن وقيعاسى. قىسقاسى, ماڭعىس­تاۋ وبلىسىندا بولعان جاپپاي جۇگەن­سىز­دىكتەن ارىلۋ ءۇشىن بىلەك سى­بانىپ, تىزە قوسىپ بەلسەنە قىزمەت ەتۋ – جاسىمىز بار, كارى­مىز بار بۇكىل حال­قىمىزدىڭ قازىرگى تاڭ­دا­عى ەڭ ماڭىزدى مىندەتى دەپ بىلەمىن. جايساڭ اقباي, تاريحشى, ەڭبەك ارداگەرى. ورال.