ەلورادانىڭ تورقالى تويىن اتاپ ءوتۋ قارساڭىندا كوپتەگەن مەرەكەلىك شارالار ۇيىمداستىرىلىپ جاتقانى بەلگىلى. سونىڭ ءبىرى – مادەنيەتىمىزگە ءماندى عۇمىرىن ارناپ, سپورت سالاسىنا ماڭدايتەرىن توككەن, ەل يگىلىگىنە ەلەۋلى ەڭبەك ءسىڭىرىپ جۇرگەن ءبىر توپ قوعام وكىلدەرىنە بەرىلگەن ماراپات.
«استانا 20 جىل» مەرەيتويلىق مەدالى مەن ەستەلىك سىيلىقتارىن مادەنيەت جانە سپورت ءمينيسترى ارىستانبەك مۇحامەدي ۇلى تابىستادى. باس شاھاردىڭ ەڭسەلى بوي تۇزەۋىنە قوسقان ۇلەسى ءۇشىن قوعام قايراتكەرلەرىنىڭ, عىلىم جانە شىعارماشىلىق زيالى قاۋىمنىڭ, سپورت ساڭلاقتارىنىڭ ىشىنەن 62 ادام وسى ماراپاتقا لايىق دەپ تانىلدى. ولاردىڭ ىشىندە بيبىگۇل تولەگەنوۆا, ءاسانالى ءاشىموۆ, مىرزاتاي جولداسبەكوۆ سىندى تۇلعالار بار. ايتا كەتۋىمىز كەرەك, «استانا 20 جىل» مەرەيتويلىق مەدالى پرەزيدەنت ن.نازارباەۆتىڭ جارلىعىنا سايكەس تاعايىندالعان مەملەكەتتىك ناگرادا بولىپ ەسەپتەلەدى.
ميراس اسان,
«ەگەمەن قازاقستان»
