تاۋەلسىز مەملەكەتتەر دوستاستىعىنا قاتىسۋشى ەلدەردىڭ پارلامەنتارالىق اسسامبلەياسىنىڭ (تمد پاا) قۇرىلعانىنا بيىل 25 جىل تولدى. ونىڭ جۇمىسىنا پارلامەنت دەپۋتاتتارى عانا ەمەس, ءتۇرلى اتقارۋشى ورگانداردىڭ ماماندارى, عالىمدار مەن كاسىبي زاڭگەرلەر قاتىسادى. تمد پاا-نىڭ ماڭىزدى مىندەتتەرىنىڭ ءبىرى – قاتىسۋشى مەملەكەتتەر زاڭنامالارىنىڭ ءبىر-بىرىنە ۇيلەسىمدى ۇلگىلەرىن ازىرلەۋ.
وسى مىندەتتەرگە سايكەس زاڭنامالىق اكتىلەر دوستاستىق ەلدەرىنىڭ جانە كوبىنەسە ەۋروپالىق پەن الەمدىك حالىقارالىق قۇقىقتىق ستاندارتتارعا سايكەس جاسالۋدا. تمد پاا قۇرىلعاننان بەرى 300-دەن ارتىق ۇلگىلىك زاڭنامالار مەن 100-دەن ارتىق ۇسىنىستار قابىلداندى. ولاردىڭ ءبارى دە ۇلتتىق زاڭنامانىڭ دامۋى مەن تيىمدىلىگىن ارتتىرۋعا ايتارلىقتاي ۇلەس قوستى. ال دوستاستىق ەلدەرى دەپۋتاتتارىنىڭ بىرلەسكەن جۇمىستارى پارلامەنتارالىق ىنتىماقتاستىقتى دامىتۋدا ماڭىزدى ءرول اتقارادى.
مەملەكەت باسشىسى ۇلتتىق زاڭنامالاردى حالىقارالىق ستاندارتتار دەڭگەيىنە جەتكىزۋ ماسەلەسىن بىرنەشە رەت كوتەردى. قازاقستان رەسپۋبليكاسىنىڭ پرەزيدەنتى بەكىتكەن 2010-2020 جىلدارعا ارنالعان قۇقىلىق تۇجىرىمدامادا: «ۇلتتىق قۇقىقتاردى زاماننىڭ جاڭا تالاپتارىنا سايكەس جانە باسەكەلەستىككە قابىلەتتى قىلۋ ماقساتىن قامتاماسىز ەتۋ ءۇشىن مەملەكەتتىڭ نورمالىق جانە قۇقىق قولدانۋ ىستەرىن ودان ءارى جەتىلدىرۋ كەرەك», دەپ جازىلعان. وسى تالاپتىڭ شەڭبەرىندە, ءبىزدىڭ ويىمىزشا, تمد پاا ازىرلەيتىن قوعامدىق قاتىناستاردىڭ بارلىق سالالارىنا قاتىسى بار ۇلگىلىك زاڭنامالىق اكتىلەر دە ءوزىنىڭ ماڭىزدى ءرولى بار.
وسىعان بايلانىستى, قازاقستان رەسپۋبليكاسىنىڭ ۇكىمەتى كوپتەگەن زاڭ جوبالارىنىڭ باستاماشىسى بولىپ وتىرعاندىقتان, ەلىمىزدىڭ زاڭنامالىق اكتىلەرىن ازىرلەگەندە تمد پاا ۇسىنعان ۇلگىلىك زاڭنامالىق اكتىلەر مەن ۇسىنىستاردى ەسكەرۋى قاجەت دەپ سانايمىن. ول ءۇشىن قازاقستان رەسپۋبليكاسىنىڭ «قۇقىقتىق اكتىلەر تۋرالى» زاڭىنا ازىرلەۋشى ورگان ۇلگىلىك زاڭنامالار مەن ۇسىنىستاردى ەسكەرۋى قاجەت دەگەن تولىقتىرۋدى جاڭا زاڭ جوباسىمەن ەنگىزۋ مۇمكىندىگىن قاراستىرۋ قاجەت دەپ بىلەمىن. مەن وسى ۇسىنىستاردى پرەمەر-مينيستر ب.ساعىنتاەۆتىڭ اتىنا جولداپ, باستامانى اياقسىز قالدىرماۋدى ءوتىندىم.
ۆلاديمير ۆولكوۆ,
سەنات دەپۋتاتى
