بايقاۋدى قورىتىندىلاۋ كەشىندە وبلىس اكىمىنىڭ ورىنباسارى الىبەك ناۋتيەۆ «ۇيادا نە كورسەڭ, ۇشقاندا سونى ىلەرسىڭ» دەيدى حالىق دانالىعى. تاربيەنىڭ ءبارى وتباسىنان باستالادى. ەلباسى «بولاشاققا باعدار: رۋحاني جاڭعىرۋ» ماقالاسىندا ۇلتتىق قۇندىلىقتاردى ساناعا ءسىڭىرۋ قاجەتتىگىن ايتتى. وتباسى قۇندىلىعىن ارتتىرۋ ماقساتىندا قولعا الىنىپ جاتقان شارالار كوپ. بۇل بايقاۋ دا وتباسى ينستيتۋتىن نىعايتۋعا, بەرەكەلى دە باقىتتى شاڭىراقتاردى كوپشىلىككە ناسيحاتتاۋعا ارنالعان», دەدى. وبلىستىق ىشكى ساياسات باسقارماسى باسشىسىنىڭ مىندەتىن اتقارۋشى زىليحا تالاسبەكوۆانىڭ ايتۋىنشا, بايقاۋعا قاتىسۋعا وبلىس بويىنشا 97 وتباسى ءوتىنىش بىلدىرگەن. سونىڭ ىشىندە جەتىستىكتەرىمەن دارالانعان جەتى وتباسى وبلىستىق كەزەڭنىڭ جۇلدەگەرلەرى اتاندى. ال رەسپۋبليكالىق بايقاۋعا اتىراۋدىڭ اتىنان ەكى وتباسى بارادى. ءبىرى – جىلىويلىق اساباەۆتار اۋلەتى. كىسەنباي اساباەۆ –اتىراۋ وبلىسىنىڭ قۇرمەتتى ازاماتى. ۇزاق جىلدار بويى شوپان بولعان ول اتا تاياعىن ۇرپاقتارىنا تابىستاعان. سەكسەننىڭ سەڭگىرىنە شىققان قاريانىڭ قول جەتكىزگەن تابىستارى از ەمەس, سوتسياليستىك ەڭبەك ەرى, ەكى مارتە ەڭبەك قىزىل تۋ, «لەنين» وردەندەرىمەن جانە بىرنەشە مەدالدارمەن ماراپاتتالعان. قازاق كسر مەملەكەتتىك سىيلىعىنىڭ لاۋرەاتى, قازاق كسر ەڭبەك سىڭىرگەن اۋىلشارۋاشىلىق قىزمەتكەرى, قازاق كسر جوعارعى كەڭەسىنىڭ دەپۋتاتى, «اۋىل شارۋاشىلىعى سالاسىنىڭ ۇزدىگى» توسبەلگىسىنىڭ يەگەرى. وسىنداي ۇلاعاتتى جاننان تاربيە العان ۇرپاقتارى دا ەلگە ەڭبەك ءسىڭىرىپ ءجۇر. قازىر جەكە شارۋا قوجالىقتارى بار. جۇبايى دامەتكەن اساباەۆا – «التىن القالى» انا. 11 پەرزەنت سۇيگەن ولار 41 نەمەرە مەن 26 شوبەرەنىڭ قىزىعىنا كەنەلىپ وتىر.
ەكىنشى وتباسى – يساتايلىق جۇماعازيەۆتەردىڭ اۋلەتى. زاكاريا جۇماعازيەۆ عۇمىرىن ۇستازدىق قىزمەتكە ارناعان جان. «ەرەن ەڭبەگى ءۇشىن», «قازاق كسر-ءنىڭ حالىق اعارتۋ ءىسىنىڭ ۇزدىگى», «اعا مۇعالىم» دەگەن ماراپاتتارى بار. وتاناسى توتانمەن 14 ۇل-قىز تاربيەلەگەن. ولاردان وربىگەن 51 نەمەرە مەن 14 شوبەرە –شاڭىراقتىڭ شاتتىعى. 23 مۇعالىم شىققان بۇل وتباسىن ەل ۇستازدار اۋلەتى رەتىندە جاقسى بىلەدى.
جۇلدەلى ەكىنشى ورىندى اتىراۋلىق اجىعاليەۆتەر مەن ماحامبەتتىك قۋانىشەۆتار ەنشىلەدى. جىلىوي اۋدانىنان كەلگەن شارعاباەۆتار, ماقاتتىق ورازاليەۆتەر مەن قىزىلقوعالىق يماشەۆتار ءۇشىنشى ورىنعا يە بولدى. وبلىستىق كەزەڭگە قاتىسقان دوستانوۆتار (اتىراۋ), ازانوۆتار (يندەر), عيباتۋلليندەر (يساتاي), حارەسوۆتەر (قۇرمانعازى), ەرەكەنوۆتەر (قىزىلقوعا), مۇحانعاليەۆتەر (ماقات), قاناتوۆتار (ماحامبەت) العىس حاتتارمەن ماراپاتتالدى.
ونەگەلى ومىرلەرى كوپكە ۇلگى وتباسىلار قازاق جەرىنىڭ قاي قيىرىندا دا كەزدەسەدى. ولاردىڭ باقىت جايلى تۇجىرىمدارىن سىيلاستىق, بەرەكە مەن بىرلىك دەگەن قاسيەتتى سوزدەر انىقتايدى. ىرىسى مەن ىنتىماعى ۇيىعان اۋلەتتەردى ەل الدىنا شىعارىپ, دارىپتەۋ كەزەك كۇتتىرمەيتىن ءىس. «مەرەيلى وتباسى» ۇلتتىق بايقاۋىنىڭ باستى ماقساتى دا – وسى.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن
راقىم قويلىباەۆ
