جاقسىدان – شاراپات

پارلامەنت ءماجىلىسىنىڭ دەپۋتاتى ن.سابيليانوۆ شىعىس قازاقستان وبلىسىن ارالاعان ساپارىندا كۇرشىم اۋدانىنا دا اتباسىن بۇرىپ, وسىنداعى سايلاۋشى قاۋىممەن كەزدەسۋ وتكىزگەن بولاتىن. نۇرتاي ساليح ۇلى بۇگىنگى تاڭداعى ساياسي جاعدايمەن, مەملەكەت باسىندا جوسپارلانىپ جاتقان اۋقىمدى جوبالارمەن تانىستىرىپ, كوپتەگەن قىزىقتى جايتتەردى اڭگىمەلەدى. ونى ىنتامەن تىڭداعان كۇرشىمدىكتەر وزدەرىن قىزىقتىراتىن ماسەلەلەر بويىنشا الۋان ءتۇرلى ساۋالدار قويىپ, بارىنشا تياناقتى جاۋاپتار الدى. وسى باسقوسۋعا قاتىسىپ وتىرعان كۇرشىم اۋداندىق مۋزىكا مەكتەبىنىڭ ديرەكتورى, بەلگىلى مۋزىكانت, تانىمال سازگەر مۇباراك شاكىروۆ دەپۋتاتقا ءوزىنىڭ ايتار ءوتىنىشى بار ەكەنىن ءمالىم ەتىپ, ءسوز سۇراعان-دى. ن.سابيليانوۆ ول كىسىنى تىڭداۋعا ءازىر ەكەنىن ءبىلدىرىپ, ورتاعا شاقىردى. – مەن باسقاراتىن مۋزىكا مەكتەبى 40 جىل بويى جۇمىس ىستەپ, بويىندا مۋزىكالىق قابىلەتى بار دارىندى ورەندەردى وسى عاجايىپ ونەرگە باۋلىپ كەلەدى, – دەدى م.شاكىروۆ. – ءبىزدىڭ مەكتەپتى تامامداعان تۇلەكتەردىڭ ىشىندە كونسەرۆاتوريا ءبىتىرىپ, رەسپۋبليكالىق دەڭگەيدەگى مۋزىكا مامانى اتانعان, ءتۇرلى ونەر وردالارىندا جەمىستى ەڭبەك ەتىپ جۇرگەن ازاماتتار بارشىلىق. قازىر دە ءانشى, ءبيشى, كۇيشى وقۋشىلارىمىز ءتۇرلى دەڭگەيدەگى كونكۋرستاردا جۇلدەلى ورىنداردى يەلەنىپ, ەشكىمگە دەس بەرمەي ءجۇر. ال وسى ونەر شاڭىراعىندا اۋەل باستان تەر توگىپ, بىتە قايناسىپ كەلە جاتقان مەنىڭ ەڭبەگىمدى دە ەشكىم جوققا شىعارا المايدى. بار سانالى ءومىرىمدى مۋزىكاعا, وسى سالانى مۇرات تۇتقان قابىلەتتى شاكىرتتەردى وقىتۋعا ارنادىم. ەڭبەگىم ناتيجەسىز ەمەس, اللا جازسا, بيىل زەينەت دەمالىسىنا شىققالى وتىرمىن. وسىنىڭ بارلىعىن بايانداي كەلە, مۇباراك اكمال ۇلى ءوزىنىڭ كوكەيىندە جۇرگەن ءبىر ارما­نىن ورتاعا سالدى, سونىڭ جۇزەگە اسۋىنا قول­داۋ جاساۋىن ءوتىنىپ, نۇرتاي ساليح ۇلىنان كومەك سۇرادى. – مەنىڭ ءتالىمىمدى الىپ, ونەر شىڭىنا, دارىن بيىگىنە قول جەتكىزگەن, ءسويتىپ حالقى­نىڭ قالاۋلىسى اتانعان ۇل-قىزدار از ەمەس, دەدى م.شاكىروۆ. – وكىنىشىم جوق, جاس بۋىنعا بىلگەنىمدى ۇيرەتتىم, بارىمدى بەردىم, اتا-انالارىنىڭ العىسىنا بولەندىم. نۇرتاي باۋىرىم, ەندىگى ءبىر ارمانىم – وسى ءتۇ­لەكتەرىمنىڭ ءبىر توبىن الىپ بارىپ استانا تورىنە شىعارسام, كۇرشىم مۋزىكا مەكتەبىنىڭ ونەرىن سول ۇلكەن ساحنادا ءبىر كورسەتسەم دەيمىن. ءسىزدىڭ ەل-جۇرتقا, اسىرەسە, بالالارعا جاساپ جۇرگەن دەمەۋشىلىك كومەگىڭىزدى ەستىپ, كورگەن سايىن ءتانتى بولىپ وتىراتىنىمىز شىندىق. مەنىڭ ايتپاعىم: وسى ماقساتىمدى جۇزەگە اسىرۋعا دەمەۋشىلىك جاساپ, اقشالاي كومەك بەرسەڭىز. وسىنشا مازاسىزدانعاندا جەكە باستىڭ پايداسىن ەمەس, جاس بۋىننىڭ قامىن ويلاپ جۇرگەنىمدى تۇسىنەدى دەپ بىلەمىن. حالىق قالاۋلىسى كوپ ويلانىپ-تولعانعان جوق. قانشا بالا اپاراتىنىن, نەشە كۇنگە بارماق ويدا ەكەندىگىن سۇراپ, ءمان-جايعا قا­نىق­قان ول «جارايدى» دەگەن جاۋاپ قايتارىپ, ماسەلەنى بىردەن شەشتى. تەك قاجەتتى قۇجات­تاردى دايارلاپ, ۋاقىتىندا ءوز اتىنا جولداۋدى تاپسىردى. كوپ ۇزاماي, ءساۋىر ايىنىڭ باسىندا مەكتەپ ەسەپ-شوتىنا نۇرتاي سابيليانوۆتان 500 مىڭ تەڭگە قارجى تۇسكەنىن ەستىگەندە ريزا بولماعان جان قالعان جوق. ەندى م.شاكىروۆ 30 دارىندى شاكىرتى مەن ماقتاۋلى 10 مۇعالىمىن وسى ءدۇبىرلى سالتاناتقا, «استانا كۇنى» مەرەكەسىنە اپارۋعا قىزۋ دايىندىق جۇرگىزىپ جاتىر. ونداعى ءتيىستى مەكەمەلەرمەن كەلىسىم-شارت جاساۋعا ءوزىنىڭ ورىنباسارى ج.سمايىلوۆتى جىبەرىپ, بارشا ماسەلەنى ءپىسىرىپ العان مەكتەپ ديرەكتورى شىلدەنىڭ 2-ءسى كۇنى ءوز ۇجىمىمەن «ءسات ساپار» دەپ جولعا شىقپاق. ءسويتىپ, 4-5 شىلدە كۇندەرى كۇرشىم مۋزىكا مەكتەبىنىڭ ورەندەرى تالعامپاز استانا جۇرتىنىڭ, ەلباسىنىڭ الدىندا ونەر كورسەتەتىن بولادى. حاسەن زاكاريا. شىعىس قازاقستان وبلىسى, كۇرشىم اۋدانى.