قازاقستاننىڭ بەينەلەۋ ونەرى – يتاليادا

8 ماۋسىم كۇنى قا­زاقستاننىڭ يتاليا­دا­عى ەلشىلىگىندە تانى­مال عالىم, قازاقستان رەسپۋبليكاسىنىڭ ەڭبەك سىڭىرگەن قاي­رات­كەرى, ونەرتانۋشى گۇل­ميرا شالاباەۆانىڭ «ەۋرازيالىق مۇرات – قازاقستاننىڭ بەينەلەۋ ونەرىندە» دەگەن اتاۋ­مەن كارتينا­لارى­نىڭ كورمەسى مەن مو­نوگرافياسىنىڭ تا­نىس­­تى­رى­لىمى وتەدى. بۇل شارا قازاقستان تاۋەل­سىزدىگىنىڭ 20 جىلدىعىنا ارنالىپ وتىر. كوركەم بەزەندىرىلگەن كىتاپ ءۇش تىلدە جارىق كورگەن. ءبىرىنشى رەت فيلوسوفيا, ساياساتتانۋ, ەستەتيكا, ونەر تاريحى سياقتى تۇسىنىكتەردى ءبىر ارناعا توعىستىرا بىلگەن اۆتور ەۋرازيالىق مۇراتتىڭ تانىمى مەن تاعىلىمىن ءار ءتۇرلى دارىندى سۋرەتشىلەر شىعارما­شى­لىعى ارقىلى كورسەتۋدى ماقسات ەتكەن. اتاپ ايتقاندا, ە.سيدوركين, ن.بۋبە, قازىرگى تاڭدا گەرمانيادا تۇ­را­تىن ب.مەكەباەۆ, سونداي-اق قا­زاق­ستاندى ءوز وتانىنداي سۇيەتىن, 15 جىلدان استام الماتى قالاسىندا تۇراتىن يتاليالىق ك.باربارونىڭ شىعارمالارى كىتاپقا ارقاۋ بولعان. بۇل جيناقتاعى تاراۋلارىنىڭ تاقىرىبىنان-اق ونىڭ مازمۇنىن اڭعارۋعا بولادى: «ەۋ­رازيالىق وركەنيەت – اڭىز با, الدە شىن­دىق پا؟», «ەۋرازيالىق مۇ­رات – رۋحاني الەمنىڭ ەرەن قابىلەتى», «ەۆگەني سيدوركيننىڭ سيم­فونيالىق تۇلعاسى», «نەللي بۋبە – ۇلى كوش ساعىنىشى», «جا­ڭا­كوشپەندىلەر – بولات مەكەباەۆ جانە كارمينە باربارو». ريمدە وتەتىن كى­تاپتىڭ تانىستىرى­لى­مى مەن كورمەگە اۆتور­مەن بىرگە ونىڭ كەيىپكەرلەرى ن.بۋبە, ك.باربارو جانە ب.مەكەباەۆ قاتىسادى. باسقوسۋ تەك اتالعان كىتاپ جونىندەگى اڭگىمەمەن شەكتەلمەيدى, جالپى قازاقستاننىڭ بەينەلەۋ ونەرى تۋرالى, ونىڭ تاريحى مەن دامۋى جايلى وي قوزعالادى. كىتاپ­تى تانىستىرۋ ارقىلى قازاق­ستان­نىڭ مادەنيەتى مەن ونەرىن ناسيحات­تاۋعا ۇلەس قوسىلاتىنى انىق. بۇل ەۋرازيالىق مۇرات يدەياسىن قولداۋ, سونىمەن قاتار, قازاقستاندى الەم­دىك مادەني كەڭىستىككە ەنگىزۋ قاجەت­تىگى تۋرالى ەل پرەزيدەنتى ن.نا­زارباەۆتىڭ يدەياسىن جۇزەگە اسىرۋ جولىندا جاسالعان ءبىر قادام بولىپ تابىلادى. «ەگەمەن-اقپارات».