جيىن ماقساتى – جاستار اراسىنداعى تۇسىنىستىكتى نىعايتۋ

كەشە بەيبىتشىلىك جانە كەلىسىم سارايىندا «قازاقستاندىق جاستار: تولەرانتتىلىق جانە كونفەسسياارالىق ۇنقاتىسۋ ارقىلى ءوزارا تۇسىنىستىك پەن ىنتىماقتاستىققا قول جەتكىزۋ» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. بىرىككەن ۇلتتار ۇيىمى باس اسسامبلەياسىنىڭ 2009 جىلعى جەل­توق­سان ايىندا قابىلداعان №64/134 قارارى بويىنشا 2010 جىلدىڭ 12 تامىزىنان 2011 جىل­دىڭ 11 تا­مىزىنا دەيىنگى مەرزىم «ۇنقاتىسۋ جانە ءوزارا تۇسىنىستىك» ۇرانىمەن وتەتىن حالىقارالىق جاستار جىلى بولىپ جاريالانعان بو­لا­تىن. كونفەرەنتسيا وسىنىڭ نەگىزىندە ۇيىم­داستىرىلىپ وتىر. ال ماقساتى – قازاقستاندىق قو­عام­دى قۇراپ وتىر­عان جاس بۋىن­نىڭ ءمۇم­كىن­دىگىن اشۋ, قوعامداعى تولەرانت­تى­لىق پەن كونفەسسيا­ارالىق ۇنقا­تى­سۋدى دا­مىتۋداعى قازاقستاندىق جاستار ءرولىن اي­قىنداۋ, ءتۇرلى مادەنيەتتەر مەن ءدىن­دەردى ۇستانا­تىن جاستار ارا­سىنداعى ءوزارا تۇسىنىستىك پەن ىنتىماقتاستىقتى نىعايتۋ, قازاق­ستاننىڭ زايىرلى جانە ءدىندار جاس­تارىن مادەنيەت ءمينيسترلى­گىنىڭ مادەنيەتتەر مەن دىندەردىڭ حا­لىقارالىق ورتالىعى جانىندا قۇرىلاتىن استانا قالا­سىنىڭ ءدىندار جاستارىنىڭ كەڭەسى اياسىنا بىرىكتىرۋ. مەملەكەتتىڭ ىشكى ساياساتىندا جۇزەگە اسىرىلاتىن قۋاتتى سترا­تەگيالىق باسىمدىقتارىندا الەۋ­مەتتىك-ساياسي جانە ءدىني كەڭىستىكتە جاستاردىڭ ورنى ەرەكشە. بۇل جونىندە پارلامەنت سەناتىنىڭ دەپۋتاتى عاريفوللا ەسىم: «جاستار – بولاشاق پەن وتكەننىڭ ارا­سىن جالعاستىرۋشى. سوندىقتان ولارعا ءتۇزۋ باعىت بەرۋىمىز كەرەك. بۇل رەتتە, مۇنداي باسقوسۋلاردىڭ ماڭىزى زور. ءدىن – ۇگىت-ناسيحات نەمەسە اتەيزم ەمەس ەكەندىگىنە نازار اۋدارىپ, جاستارعا ءدىندى ءما­دە­نيەتتىڭ فەنومەنى رەتىندە قاراۋدى قولعا الۋىمىز كەرەك», – دەدى. مادەنيەت ۆيتسە-ءمينيسترى عا­زيز تەلەباەۆ «قازاقستانداعى جاس­تار ساياساتى جانە ءدىن» تاقى­رىبىنداعى بايانداماسىندا ءدىن­نىڭ قوعامداعى ورنى ەرەكشە, ءدىن ادامداردى جاقسىلىققا جەتەلەۋشى وڭدى ءۇردىس ەكەندىگىنە, جاس­تارىمىزدىڭ دىنگە وڭ كوزقاراس تانىتىپ, دىنگە بەتبۇرۋى كوڭىل كونشىتەتىندىگىنە, الايدا, ەلىمىزگە ءداستۇرلى دىندەردەن بولەك, شەت ەلدەردەن وزگە ءدىني اعىمدار كوپتەپ كەلىپ جاتقاندىعىنا توقتالدى. ال «نۇر وتان» حدپ «جاس وتان» جاستار قاناتىنىڭ اتقارۋ­شى حاتشىسى نۇرلان وتەشەۆ: «جاستار مەن ولاردىڭ ۇستاناتىن ءدىنى – ءبۇ­گىنگى تاڭدا بارشامىزدى الاڭ­دا­تا­دى. عازيز تۇرىسبەك­ ۇلىنىڭ جاساعان بايانداماسى ويعا قونىمدى بولدى. وسى جوباعا قاتىستى كورسەتىلەتىن كومەكتەرگە ءبىزدىڭ, ياعني «جاس وتان» جق دا اتسالىسۋىنا رۇقسات ەتىڭىز­دەر», – دەپ ىزگى نيەتىن ۇسىندى. مادەنيەت مينيسترلىگى جانىن­داعى مادەنيەتتەر مەن دىندەردىڭ ورتالىعى پرەزيدەنت نۇرسۇلتان نازارباەۆتىڭ الەمدىك جانە ءداس­تۇرلى دىندەر ليدەرلەرىنىڭ ءۇشىن­شى سەزىندەگى ايتقان باستامالارىن جۇزەگە اسىرۋ نەگىزىندە قۇرىلعان. ادامزات ءومىرىنىڭ ماڭىزدى سالا­لارىندا ورىن العان جاھاندانۋ جانە ينتەگراتسيا ۇردىستەرى ءبىرىنشى كەزەكتە حالىقتاردىڭ بىرەگەيلىگىن دامىتۋ, تاريحتى ساقتاۋ, مادەنيەتتى, ءتىل مەن ءدىندى دامىتۋ ءتارىزدى ماسەلەلەردى الدىڭعى ورىنعا شىعاراتىندىعى بەلگىلى. كونفەرەنتسيادا كوتەرىلگەن ءما­سە­لەلەر 2012 جىلى وتەتىن الەم­دىك جانە ءداستۇرلى دىندەر ليدەر­لەرىنىڭ ءتورتىنشى سەزىندە تالقى­لاناتىن بولادى. بۇل سەزدە جاستار جانە ايەلدەر سەكتسيالارى جۇ­مىس ىستەيدى دەپ جوسپارلانىپ وتىر. جۇلدىز ءبايدىلدا.