اقتوبە وبلىسىنىڭ اۋدان əكىمدەرى 2016 جىل بويىنشا ەسەپ بەردى

بەردىبەك ساپارباەۆ وبلىستاعى 12 اۋدان مەن اقتوبە قالاسى اكىمدەرىنىڭ 2016 جىلى اتقارعان جۇمىستارىنىڭ قورىتىندىسىن تىڭدادى, دەپ حابارلادى وبلىس اكىمىنىڭ ءباسپاسوز قىزمەتى. بارلىق اكىمدەردىڭ ەسەبىن تىڭداعان ءوڭىر باسشىسى بەردىبەك ساپارباەۆ 2017 جىلى ەكونوميكا مەن الەۋمەتتىك سالانى ودان ءارى دامىتۋدى قامتاماسىز ەتۋ ءۇشىن بارلىق رەزەرۆتەردى انىقتاپ, ولاردى پايدالانۋعا قاتىستى بىرقاتار تاپسىرمالار بەردى. « كوپتەگەن ماسەلەلەردە مەملەكەتتىك-جەكە سەرىكتەستىك مەحانيزمدەرىن پايدالانۋعا بولادى جانە بۇل قاجەت تە, تۇرعىن ءۇي كوممۋنالدىق شارۋاشىلىق سالاسىنداعى, جول قۇرىلىسى, حالىقتى جۇمىسپەن قامتۋ, سونىمەن قاتار شاعىن جانە ورتا بيزنەستى قولداۋ ماسەلەلەردى شەشۋ جۇمىستارىن كۇشەيتە ءتۇسۋ كەرەك. ازىق-ت ۇلىك قاۋىپسىزدىگى الەۋەتىن ءارى قاراي ءوسىرۋ جانە اۋىلدىقتاردى جۇمىسپەن قامتۋ ماقساتىندا ەگىس القابىن,  سۋارمالى جەرلەردى كەڭەيتۋ, مال شارۋاشىلىعى مەن ەگىنشىلىكتى دامىتۋ, وندىرىستىك اۋىل شارۋاشىلىق كووپەراتيۆتەرىن قۇرۋ, اۋىل شارۋاشىلىعىنا ينۆەستيتسيا تارتۋ بويىنشا جوبالاردىڭ جۇزەگە اسىرىلۋىن جانداندىرا ءتۇسۋ قاجەت»,- دەدى بەردىبەك ساپارباەۆ. بۇدان بۇرىن حابارلانعانداي, 2016 جىلدىڭ قورىتىندىسى بويىنشا وبلىس اۋىل شارۋاشىلىعىندا قۇنى 3,2 ميلليارد تەڭگە بولاتىن 25 ينۆەستيتسيالىق جوبا جۇزەگە اسىرىلدى. اۋىل شارۋاشىلىعى ناقتى كولەمىنىڭ كورسەتكىشى 8,6%-عا, ءداندى داقىلدىڭ ورتاشا تۇسىمدىلىگى 2,2 ەسە ءوستى. ءىرى جانە ۇساق قارا مال باسى, جىلقى, قۇس سانى ءوستى. 72 اۋىل شارۋاشىلىق وندىرىستىك كووپەراتيۆى قۇرىلىپ, قولدانىستاعى سۋارمالى جەر اۋماعى 18 600 گەكتاران استى. تاعى 19,5 مىڭ گەكتار سۋارمالى جەر حالىقارالىق ەۋروپالىق قايتا قۇرۋ جانە دامۋ جانە يسلام دامۋ بانكتەرىنىڭ كومەگىمەن قالپىنا كەلتىرىلمەكشى.