«مەنىڭ جىرىم – جاقسىلىقتىڭ جارشىسى»

الماتىدا ق.قوجامياروۆ اتىنداعى مەملەكەتتىك رەس­پۋبليكالىق ۇيعىر مۋزىكالىق كومەديا تەاترىندا ۇيعىردىڭ تانىمال اقىن قىزى, فيلولوگيا عىلىمدارىنىڭ كانديداتى, مەملەكەتتىك ستيپەنديانىڭ يەگەرى پاتيگۇل ماحساتوۆانىڭ قازاق تىلىندە شىققان «وزىڭە سەنەم» اتتى ولەڭدەر جيناعىنىڭ تۇساۋكەسەرى ءوتتى. كىتاپتى قازاقشا سويلەتكەن – تۇركى دۇنيەسى اقىندارى جىر ءمۇشايرالارىنىڭ بىرنەشە دۇركىن جۇلدەگەرى, تۇرىك, ازەربايجان, قىرعىز, ۇيعىر اقىندارىن قازاق وقىرماندارىنا تانىتىپ جۇرگەن بەلگىلى اقىن داۋلەتبەك بايتۇرسىن ۇلى. ۇيعىردىڭ اقىن قىزىنىڭ قازاق تىلىندەگى تۇڭعىش كىتابىنىڭ سالتاناتىنا ەكى حالىقتىڭ وقىرماندارى كوپ جينالدى. جيىندى قازاقستاننىڭ ەڭبەك سىڭىرگەن قايراتكەرى, حالىق­ارالىق «الاش» سىيلىعىنىڭ, «قۇر­مەت» وردەنىنىڭ يەگەرى, جازۋشىلار ودا­عىنداعى ۇيعىر ادەبيەتى كەڭەسىنىڭ توراعاسى احمەتجان اشيري اشىپ, قازاقستان جازۋشىلار وداعى­نىڭ باسقارما مۇشەسى, وننان استام جىر جيناقتارىنىڭ اۆتورى, ۇيعىر ادەبيەتى بويىنشا بىرنەشە وقۋلىقتىڭ, ادىستەمەلىك قۇرال­داردىڭ, ديداكتيكالىق ماتەريال­داردىڭ, ديكتانت جيناقتارىنىڭ اۆتورى, ولەڭدەرىنە جۇزدەن استام ءان جا­زىلعان اقىن قىزدارىن جاقىن­ىراق تانىستىرىپ, ونىڭ ادامي قا­سيەتتەرىنە توقتالدى. – پاتيگۇلدى قازاق ءتىلىنىڭ ماما­نى دەسەك تە بولادى, – دەدى بايان­دا­ماشى. – وتە ساۋاتتى قىز. پاتي­گۇلدى ەرەكشە قادىرلەيتىنىم, ءارى باس­قاعا ۇقسامايتىن جەرى, ونىڭ شىعارمالارى «قازاق ادەبيەتى» گازە­تىندە, «جۇلدىز», «پروستور», «ليتە­راتۋرا كازاحستانا», «الەم ادەبيەتى» جۋرنالدارى مەن ت.ب. باسىلىم­داردا جاريالانعاندىقتان وقىرماندار جاقسى تانيدى. اسىرەسە, جاركەن بودەش اۋدارعان ولەڭدەرى ادەبي جىل قورىتىندىلارىندا اتالىپ جاتادى. وسى ۋاقىتقا دەيىن شىعارعان ون بەس كىتابىنىڭ نەگىزگى تاقىرىپتارى اداميلىق, ادامگەرشىلىك قۇندىلىقتارى, بىرلىك, دوستىق جايىندا. بۇل – قازاق پەن ۇيعىر حالقىنىڭ ەرتەدەن باستالعان تاريحي دوستىعىنىڭ زاڭدى جالعاسى. بۇگىنگى قازاق تىلىنە اۋدارىلعان كىتابىنا كەلسەك, داۋلەتبەك ۇيعىر ءتىلىن عانا ەمەس, ونىڭ سالت-ءداستۇرىن, تابيعاتىن, نازىك تۇستارىن جاقسى بىلگەندىكتەن مەيىرىممەن, جۇرەكپەن اۋدارعان. ءبىز سوعان قۋانىشتىمىز. ويتكەنى, جاقسى شىعارما حالىقتىڭ مۇراسى, حالىقتىڭ قازىناسى, باي­لىعى, مەملەكەتتىڭ داۋلەتى. مىنە, سونى داۋلەتبەك ءماشھۇر قازاق وقىر­ماندارىنا جەتكىزدى. سول ءۇشىن اۋدارماشى, ءبىرىنشى دارەجەلى حالىقارالىق يلحام سىيلىعىنا يە بولعان. ودان كەيىن ەلوردادان جەتكەن قۋانىشتى حاباردى «ان-ارىس» باس­پاسىنىڭ ديرەكتورى, بەلگىلى اقىن كا­دىر­بەك قۇنىپيا ۇلى جەتكىزىپ, اقىن قىزعا شىعارماشىلىق تابىس تىلەدى. «قۇرمەتتى پاتيگۇل ماحساتوۆا! جولداعان حاتىڭىز بەن قولتاڭبا جازىپ سىيلاعان «وزىڭە سەنەم» دەپ اتالاتىن جىر جيناعىڭىز مەملەكەت باسشىسى نۇرسۇلتان ءابىش ۇلى نازارباەۆقا تانىستىرىلدى. پرەزيدەنت جىلى لەبىزدەرگە تولى حاتىڭىز بەن سىي-قۇرمەتىڭىز ءۇشىن سىزگە العىسى مەن ىزگى تىلەك­تەرىن جەتكىزۋدى تاپسىردى. ەلبا­سىمىز سىزگە زور دەنساۋلىق پەن باقىت, شىعارماشىلىق ىزدە­نىس­تەر, تابىستار تىلەيدى. ولەڭدەرىڭىز وقىرماندار ويىنان شىعا بەرسىن. سىيلاعان كىتابىڭىز ەلباسى كىتاپ­حا­ناسىنىڭ قورىندا ساقتا­لاتىن بولادى. قۇرمەتپەن, ماحمۇت قاسىم­بەكوۆ». سونداي-اق تانىستىرىلىمدا بەلگىلى اقىن, مەملەكەتتىك سىيلىقتىڭ لاۋرەاتى, «جۇلدىز» جۋرنالىنىڭ باس رەداكتورى ۇلىقبەك ەسداۋلەت «تەڭىزدىڭ ءدامىن تامشىدان بىلەسىڭ» دەگەن, جاقسى اۋدارمالاردىڭ ارقاسىندا پاتيگۇلدىڭ وسى كىتاپتاعى بىرقاتار ولەڭدەرى «جۇلدىز» جۋرنالىندا دا جاريالانعانىن, تۇتاس تۇرىك ادەبيەتىن الاتىن بولسا, ۇيعىر ادەبيەتى سونىڭ ءبىر بۇتاعى, شىن مانىندەگى ىرگەلى ادەبيەت ەكەنىن, سونىمەن قاتار, ۇيعىر ادەبيەتىنىڭ ارعى كلاسسيكتەرىن ايتپاعاننىڭ وزىندە, زيا سامەدي, حيزمەت ابدۋللين اقساقالداردىڭ كوزىن كورگەنىن, جامەلەتدين بوساكوۆ اعايمەن كورشى تۇرسا, تۇرعان توحتاموۆ اعاسىمەن «جازۋشى» باسپاسىندا بىرگە قىزمەت ىستەگەنىن, شايم شاۆاەۆ اعالارمەن جاقىن سىيلاسىپ جۇرگەنىن دە تىلگە تيەك ەتە كەلە, ەستەلىككە ۇلى اباي بابامىزدىڭ ءمۇسىنىن تاپسىردى. اۋدارماشى داۋلەتبەك باي­تۇر­سىن ۇلى بولسا جالپى ۇيعىر حال­قىنىڭ تالانتتى اقىن قىزى پاتيگۇل ماحساتوۆانىڭ بۇل ەڭبەگى ۇيعىر اقىندارىنىڭ, ۇيعىر حالقىنىڭ تابيعاتىنا ءتان جازىلعان دۇنيە ەكەنىن, قازاق وقىرماندارى وقىعاندا ەشقانداي كەدىر-بۇدىرى بولماسىن, قازاقتىڭ ءبىر اقىن قىزى رەتىندە قابىلداسىن دەپ بار كۇشىن سالىپ اۋدارعانىن جەتكىزدى. سونداي-اق, اۆتوردىڭ شىعارماشىلىعى جايلى «قازاق ادەبيەتى» گازەتىندە, «جۇلدىز» جۋرنالىندا جاقسى ايتى­لىپ, «ەگەمەن قازاقستان» گازە­تىن­دە قورعانبەك امان­جولدىڭ اقىن پاتيگۇلمەن ادەمى سۇحباتى جاريا­لان­عانىنان دا حاباردار ەتتى. ءوز كەزەگىندە پاتيگۇل تۇساۋ­كەسەرى وتكىزىلىپ جاتقان ەڭبەگىن قازاق­ستاننىڭ 25 جىلدىق تاۋەلسىزدىگىنىڭ تويىنا تارتۋ رەتىندە ۇسىنعانىن, ونىڭ ۇستىنە, بيىل پرەزيدەنتتىڭ پارمەنىمەن مەملەكەتتىك ستيپەن­ديانىڭ يەگەرى اتانىپ, سول اقشانى وسى كىتابىنا جۇمساپ, قازاق حالقىنا دەگەن دوستىقتىڭ كورىنىسى, قوس ۇلتتىڭ ادەبيەتىندە كوپىر بولسىن دەگەن نيەتتە شىعارعانىن تەبىرەنە جەتكىزدى. ءتاڭىردىڭ ءبىر قۇدىرەتى بولۋى كەرەك, مەنىڭ بۇل كىتابىم ەلىمىزدە تۇڭعىش رەت تويلانىپ وتىرعان 1 ناۋرىز – العىس كۇنىنىڭ ءدال الدىندا جارىق كوردى. سوسىن ويلانىپ, وسى ەڭبەگىمنىڭ شىعۋىنا مەملەكەتتىك ستيپەنديا ارقىلى قولداۋ كورسەتكەن پرەزيدەنتىمىزگە نەگە العىسىمدى ايتپاسقا دەپ, جىلى لەبىزىمدى ءبىلدىرىپ, قولتاڭبامدى قويىپ استاناعا سالىپ جىبەرگەنمىن. بىراق حاتىما جاۋاپ كەلە مە, كەلمەي مە دەگەن ەكى ويدا بولدىم. ەلباسىنىڭ ۇيعىر حالقىنا دەگەن قۇرمەتى بولۋى كەرەك, پرەزيدەنت اكىمدىگىنەن حات كەلگەن سوڭ, مەملەكەت باسشىسى تانىسقان كىتاپتى نەگە حالقىما تانىستىرماسقا دەپ, بۇگىن تانىس­تىرىلىم ءراسىمىن جاساپ وتىرمىن. ماعان كومەكتەسكەن قازاقتىڭ بەلگىلى اقىنى داۋلەتبەك بايتۇرسىن ۇلى كىتاپتى كوڭىلىمدەگىدەي اۋداردى. ءبىزدىڭ دوستىعىمىز تەك ءسوز جۇزىندە ەمەس, ەلباسىنىڭ ساياساتىن, قازاقستان ءۇشىن اتقارىپ جاتقان وسىنشاما قىرۋار ەڭبەگىنە وسىنداي ءىس شارالارىمىز ارقىلى جاۋاپ بەرىپ, باسقا ۇلتتارعا, حالىقتارعا ناسيحاتتايمىز دەپ ويلايمىن. سوندىقتان, كىتاپتىڭ تۇساۋكەسەرىنە كەلگەن قازاق, ۇيعىر حالقىنا ريزاشىلىعىمدى بىلدىرەمىن. بۇل – ەكى حالىقتىڭ ەجەلدەن كەلە جاتقان دوستىعىنىڭ بۇگىنگى كورىنىسى دەپ بىلەمىن. قازاقستاننىڭ گۇلدەنۋى ءۇشىن شىعارماشىلىق ادامدارى ولەڭدەرىمىز, كىتابىمىز ارقىلى قولىمىزدان كەلگەنشە ۇلەس قوسامىز دەپ ويلايمىن, – دەدى اقىن ءىنىسى داۋلەتبەككە شاپان جاۋىپ, قۇرمەت كورسەتكەن اقىن قىز. سونداي-اق, تانىستىرىلىمدا جازۋ­شىلار ءدۋرنام ماشۋروۆا, اۆۋت ءما­سىموۆ, كىتاپقا العىسوز جازعان بەل­گىلى جازۋشى, «جۇلدىز» جۋرنالى­نىڭ ءبولىم رەداكتورى ءدىلدار مامىر­باەۆا, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عى­لىمي قىزمەتكەرى, فيلولوگيا عىلىم­دارىنىڭ دوكتورى گۇلجاحان وردا, تانىمال كاسىپكەر, مەتسەنات ديلمۋرات كۋزيەۆ, «ۇيعىر اۆازي» گازەتىنىڭ جاۋاپتى حاتشىسى مۇحتارجان جۇماروۆ, ت.ب. اقىننىڭ ءومىردىڭ وزىندەي شىنايى جىرلارى جايلى ءسوز ەتتى. گۇلزەينەپ سادىرقىزى, «ەگەمەن قازاقستان»