وركەنيەتتى, الەمدەگى وزىق ەلدەردىڭ جاقسى تاجىريبەسى قازاقستان ومىرىنە دەندەپ ەنىپ قانا قويماي, ءتاتتى جەمىسىن بەرىپ جاتىر. بۇرىنىراقتا قىزمەتتىڭ مايلى جىلىگىنە تامىر-تانىسى جوق ادامدار ىلىگە المايتىنداي كورىنەتىن. مەكتەپتى «التىن بەلگىگە», جوعارى وقۋ ورنىن «قىزىل ديپلومعا» بىتىرگەن تۇلەكتەردىڭ ءوزى جۇمىس تابا الماي, تاپقان جاعدايدا ينستيتۋتتا وزىنەن قوزى كوش تومەن وقىعان, بىراق بەدەلدى قىزمەتكەردىڭ, باي-باعلاننىڭ بالاسىنىڭ قول استىندا جۇمىس جاساپ جاتقانىنا نامىستانار ەدى.
ەندى وعان باياعىداي ورىن بەرىلە بەرمەيدى. ءبىز مۇنى مەملەكەتتىك قىزمەت ءىستەرى مينيسترلىگىنىڭ وقو بويىنشا دەپارتامەنتىندە بوس مەملەكەتتىك اكىمشىلىك لاۋازىم ءۇشىن ۇمىتكەرلەرگە كونكۋرس جاريالاعان كوميسسيا جۇمىسىنا باقىلاۋشى بولىپ شاقىرىلعاندا بايقادىق. انىعىن ايتساق, مەملەكەتتىك قىزمەت باسقارماسىنىڭ باس مامانى, مەملەكەتتىك قىزمەت كورسەتۋ باسقارماسىنىڭ باس مامانى, مەملەكەتتىك قىزمەت سالاسىنداعى باقىلاۋ باسقارماسىنىڭ باس مامانى, اكىمشىلىك باسقارماسىنىڭ باس مامانى بوس ورىندارىنا 16 ۇمىتكەر قۇجات تاپسىرعانىمەن, كونكۋرسقا ۇشەۋى كەلمەي قالدى.
«مەملەكەتتىك قىزمەتى تۋرالى» جاڭا زاڭ 2016 جىلدىڭ 1 قاڭتارىنان باستاپ كۇشىنە ەندى. اتالعان زاڭ ەلباسىمىز ن.ءا.نازارباەۆتىڭ ۇسىنعان ۇلت جوسپارىنىڭ العاشقى بولىمىندەگى 15-قادامدا كورسەتىلگەن مەملەكەتتىك اپپاراتتى كاسىبيلەندىرۋگە جانە ونىڭ دەربەستىگىن قامتاماسىز ەتۋگە نەگىزدەلگەن. وسىنداي جاڭا رەفورما اياسىندا «ب» كورپۋسىنداعىلار ءبىر مەكەمەدەن ەكىنشى مەكەمەگە اۋىسۋدى بىلاي قويعاندا, سول مەكەمەنىڭ ىشىندە ساتىلىق وسۋدە ءمىندەتتى تۇردە اشىق كونكۋرستان وتەتىن بولادى. ياعني, ءىس باسىنداعى مەملەكەتتىك قىزمەتشىلەردىڭ لاۋازىمدىق ءوسۋى كونكۋرس نەگىزىندە جۇزەگە اسىرىلادى.
ءبىرىنشى كەزەكتە سول مەكەمە ىشىندەگى قىزمەتكەرلەر ءۇشىن ىشكى كونكۋرس جاريالاناتىن بولادى. ەگەر دە وسى كونكۋرستا قاجەتتى كانديدات تابىلماسا, ەكىنشى كەزەڭ بارلىق مەملەكەتتىك قىزمەتشىلەر ءۇشىن وتكىزىلەدى. ول جەردە دە وڭ شەشىمى تابىلماسا, ءۇشىنشى كەزەڭ, ياعني جالپى جۇرتشىلىق اراسىندا كونكۋرس وتكىزىلەدى. ەسكەرە كەتەتىن جايت, ءبىرىنشى جانە ەكىنشى كەزەڭدەگى ىشكى كونكۋرسقا قاتىسۋ ءۇشىن قازاقستاننىڭ زاڭنامالارىن بىلۋگە ارنالعان تەستىلەۋدەن ءوتۋدىڭ قاجەتى جوق.
بۇل تۇستا, مەملەكەتتىك قىزمەت ءىستەرى مينيسترلىگىنىڭ وقو بويىنشا دەپارتامەنتىندە «ب» كورپۋسىنىڭ مەملەكەتتىك اكىمشىلىك لاۋازىمدارىنا ورنالاسۋعا ارنالعان بارلىق مەملەكەتتىك ورگانداردىڭ مەملەكەتتىك قىزمەتشىلەر اراسىندا ىشكى كونكۋرس ءوتتى. دەپارتامەنت باسشىسىنىڭ ورىنباسارى ابدۋللا ەسىمحانوۆتىڭ كونكۋرس بارىسى جونىندەگى انىقتاماسى وسى. مەملەكەتتىك قىزمەت ىستەرى مينيسترلىگىنىڭ وقو بويىنشا دەپارتامەنتى باسشىسىنىڭ ورىنباسارى ايبەك ءشىمانوۆ باسقارعان كوميسسيا (س-و-S ساناتى بويىنشا) ۇمىتكەرلەرگە ءوزى تاڭداعان قىزمەت ورىندارى بويىنشا سۇراقتار قويىپ, ءبىلىمى مەن بىلىگىن سارالادى.
العا وزىپ ايتساق, وزدەرى مەملەكەتتىك قىزمەتتە جۇرگەندىكتەن, كوپشىلىگى قامشى سالدىرعان جوق. الايدا, «كۇرىش اراسىندا كۇرمەك تە سۋ ىشەدى» دەگەندەي, «وتسەم – ءوتتىم, وتپەسەم – قايتتىم», دەپ كەلگەندەر دە بارشىلىق ەكەن. ال بايقاۋشىعا كونكۋرس كوميسسياسىنىڭ مۇشەلەرىنە, ولاردىڭ شەشىم قابىلداۋىنا اسەر ەتۋگە قۇقىق بەرىلمەگەن. ويىمىزدى سۇرادى, ايتتىق, قايتتىق. ايتسە دە, ءبىلىمدى بىلسەم ەكەن دەگەن جاستاردىڭ ءوسىپ كەلە جاتقاندىعى قۋانتتى.
كادر تازالىعى, اشىقتىق – وبلىس اكىمى بەيبىت اتامقۇلوۆتىڭ قىزمەتكە كەلگەننەن بەرى قولعا العان بىرەگەي ماسەلەلەرىنىڭ ءبىرى. وبلىس اكىمدىگىندە دە مەملەكەتتىك قىزمەتكە الۋ ءۇش ءتۇرلى ساتىلى كونكۋرسپەن ءوتىپ جاتىر. وبلىس اكىمى اپپاراتى باسشىسىنىڭ ورىنباسارى اسەت بايسىنوۆ باسقارعان كوميسسيا جۇمىسىنا قاتىسىپ, بەيبىت باكىر ۇلىنىڭ كادر ساياساتىندا اشىقتىقتى, جاريالىلىقتى قالايتىنىن تاعى دا ۇعىندىق. ال توقەتەرى – ەندى ءبىلىمدىنىڭ الدى كەڭ, ماڭدايى جارىق, ەلباسى ساياساتى وڭىرلەردە وسىلايشا ىسكە اسىپ جاتىر.
ايتا كەتۋ كەرەك, وڭتۇستىك قازاقستان وبلىسىندا 8217 مەملەكەتتىك قىزمەتشى جۇمىس ىستەيدى. سونىڭ ىشىندە 5625 – ەر, 2592 ايەل ازامات قىزمەت اتقارسا, 112-ءسى زەينەتكەرلىك جاسقا جاقىنداعاندار. ال 1868 ادام جاس مەملەكەتتىك قىزمەتشى بولىپ تابىلادى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى