ءۇش تۇعىرلى ءتىل – ۇلتتىڭ كەلەشەگى

باياندى بولاشاق باعدارلاماسى مەن ءبىلىم جانە عىلىم دامۋىنا ارنالعان مەملەكەتتىك باعدارلامانى قولدايمىن. بۇل باعدارلاما بولاشاق جاس­تارىمىزدىڭ مۇددەسىن ارتتىرۋعا, ولاردىڭ الاتىن ءبىلىمى باسەكەلىككە قابىلەتتى, تابىستى ۇلتتاردىڭ قاتارىندا بولۋعا مۇمكىندىك بە­رەدى. 30 دامىعان مەملەكەتتىڭ قاتارىنا قوسىلۋ ەلباسىمىزدىڭ قويعان ەڭ باستى ماقساتتارىنىڭ ءبىرى بولىپ تابىلادى. وسى ماقساتقا جەتۋدىڭ ءبىر جولى ءۇش ءتىلدى ۇلتتى تاربيەلەۋ. بۇل رەفورما بويىنشا مەكتەپ ءبىتىرۋ­شىلەرگە ءۇش ءتىلدى دە مەڭگەرۋ مۇمكىندىگى بەرىلىپ وتىر: قازاق ءتىلى – مەملەكەتتىك ءتىل, ورىس ءتىلى – ۇلتارالىق قارىم-قاتىناس ءتىلى جانە اعىلشىن ءتىلى – جاھاندىق ەكونوميكاعا ويداعىداي كىرىگۋ ءتىلى. 5 كۇندىك وقۋ جۇيەسىنە توقتالساق, وتباسىلىق قۇندىلىقتاردىڭ وركەندەۋى انىق كورىنەدى. وتباسىلىق تاربيە, بالانى قوسىمشا دامىتۋ ۋاقىتى ەكى ەسە ۇلعايتىلىپ جاتىر. سپورتپەن, مۋزىكامەن, ونەرمەن اينالاسۋعا مۇمكىندىك كوبەيەدى.  وسى رەفورما­نىڭ ەنگىزىلۋى زامان تالابىنا ساي. ينتەللەكتۋالدى دامىعان جانە تابىستى قازاقستاندىقتاردى تاربيەلەيتىن ۋاقىت كەلدى. مەن ەلىمىزدىڭ بارلىق جاس­تارىن, ارىپتەستەرىمدى وسى باع­دارلامانى قولداۋعا شاقى­رامىن. بۇل باعدارلاما ءبىزدىڭ تابىستى بولاشاعىمىزدىڭ باعدارلاماسى ەكەندىگىنە مەن سەنىمدىمىن.  ايدىن ءسابيتوۆ, قازاقستان جاستارى كونگرەسىنىڭ اتقارۋشى ديرەكتورى استانا

ۋاقىت تالابىمەن ۇندەستىك

ەلباسى نۇرسۇلتان نازارباەۆ ءوزىنىڭ قازاقستان حالقىنا جاساعان بيىلعى جولداۋىندا بۇگىنگى تاڭدا ءۇش ءتىلدى مەڭگەرۋ ۋاقىت تالابى ەكەندىگىن ەسكە سالعانى بەلگىلى. بۇل, ارينە, وتە ورىندى ايتىلعان وي. ويتكەنى, جاھاندانۋ قاناتىن كەڭگە جايعان كەزدە ءومىر سۇرە وتىرىپ, زامان زاڭدىلىقتارىنا باعىنباۋ مۇمكىن ەمەس. ءبىلىم جانە عىلىم ءمينيسترى ە.ساعاديەۆتىڭ مىنا پىكىرىمەن كەلىسپەسكە بولمايدى. «ەلىمىز­دىڭ ەرتەڭى سانالاتىن جاس ۇر­پاقتى, اسىرەسە, اۋىل بالالارىن انا تىلىمەن قاتار اعىلشىن ءتىلىن ەركىن يگەرۋگە باۋلىساق ءبىز ءۇشىن دۇرىس شەشىمنىڭ ءبىرى بولار ەدى. مۇنداي جاعدايدا ولاردىڭ تەرەڭ ءبىلىم الۋلارىنا مۇمكىندىك تۋىپ قانا قويماي, وتاندىق جانە شەتەلدىك تاڭداۋلى ۋنيۆەرسيتەتتەردىڭ تابالدىرىعىنان اتتاۋلارىنا جول اشىلارى تالاس تۋدىرماسا كەرەك», دەگەن بولاتىن ول. پرەزيدەنتىمىزدىڭ ساياساتىنا قولداۋ بىلدىرگەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى كوپتىلدىلىك باعدارلاماسىن جۇزەگە اسىرۋ ماقساتىندا اۋقىمدى جۇمىستار اتقارىپ جاتقاندىعىن اتاپ وتكەنىمىز ورىندى. وسى ورايدا اتالمىش وقۋ ورداسىندا 2012 جىلى اشىلعان كوپتىلدى ءبىلىم بەرۋ جانە اكادەميالىق رەسۋرستاردى دامىتۋ ورتالىعى ءبىرتالاي يگى ىستەردىڭ باسىن قايىردى. ورتالىقتىڭ الدىنا ۋنيۆەرسيتەتتە اعىلشىنشا وقىتۋدى جاقسارتۋ, جىل سايىن كوپتىلدى ءبىلىم بەرۋ باع­دارلامالارىنىڭ سانىن ارتتىرۋ, پروفەسسورلار مەن وقىتۋشىلار قۇرامىن كاسىبي تۇرعىدان تىڭ ىزدەنىستەرگە بوي ۇرىپ, جوعارى ناتيجەلەرگە جەتۋگە ىنتالاندىراتىن جاعداي جاساۋ مىندەتى قويىلىپ وتىر. بەلگىلەنگەن شارالار ۋنيۆەرسيتەتتىڭ فاكۋل­تەتتەرى مەن كافەدرالارى ارقىلى مەجەلى ماقساتىنا جەتىپ جاتادى. ءاربىر جاڭا وقۋ جىلى باستالاردا ءبىزدىڭ ورتالىق ستۋدەنتتەر مەن ۇستازداردى تەستىلەۋدەن وتكىزىپ, ولاردىڭ اعىلشىن ءتىلىن ءبىلۋ دەڭگەيىن انىقتايدى. سونىڭ نەگىزىندە جانە IELTS نەمەسە TOEFL قورىتىندىلارى بويىنشا كوپتىلدى توپتار قالىپتاسادى. قازىرگى تاڭدا ۋنيۆەرسيتەتتەگى 88 كوپتىلدى توپتاعى 611 شاكىرتكە 270 ءپان بويىنشا اعىلشىن تىلىندە ساباق بەرىلەدى. ونىڭ سىرتىندا ەۇۋ-ءدىڭ حالىقارالىق قاتىناستار فاكۋلتەتىندە ءۇش ماماندىق بويىنشا كوپتىلدى ءبىلىم بەرۋ باعدارلاماسى بەكى­تىلدى. سوعان سايكەس ۋنيۆەرسيتەتكە تۇسكەندە ستۋدەنتتەر بۇكىل كۋرس بارىسىندا اعىلشىن تىلىندە وقۋ قالاۋىن بىلدىرە الادى. كوپتىلدى كادرلاردىڭ بىلىك­تىلىگىن ارتتىرۋعا نازار اۋدارىلادى. بىلتىردان بەرى ورتالىق نازارباەۆ ۋنيۆەرسيتەتتىڭ جوعارعى ءبىلىم مەكتەبىمەن بىرلەسىپ توقسان سايىن كوپتىلدى توپتار وقىتۋشىلارىنا سەمينار ۇيىمداستىرۋدى داستۇرگە اينالدىردى. كوپتىلدى توپتارعا لەكتسيا وقىپ, پراكتيكالىق ساباقتار وتكىزۋ ءۇشىن شەتەلدىك عالىمداردى, مامانداردى, وقىتۋشىلاردى, سونداي-اق, شەتەلدىك كومپانيالاردىڭ وكىلدەرىن تارتۋ ماسەلەسى دە ورتالىقتىڭ مىندەتىنە جاتادى. ۇزاق مەرزىمگە سىرتتان شاقىرىلعانداردىڭ ىشىنەن گارۆارد ۋنيۆەرسيتەتىنەن, اۆستراليا ۇلتتىق ۋني­ۆەر­­سيتەتىنەن, ليون ۋنيۆەرسيتەتى­نەن, كارديفف ۋنيۆەرسيتەتىنەن, بولون ۋنيۆەرسيتەتىنەن كەلىپ, ءدارىس وقىپ جۇرگەن پروفەسسورلاردى بولە-جارا ايتۋعا بولادى. وسىنداي قادامداردىڭ ارقاسىندا ساندىق ءھام ساپالىق جاعىنان وڭ وزگەرىستەر وركەن جاي­عانىن ايتا كەتۋدىڭ ار­تىقتىعى جوق. ەندىگى ءبىر ماقساتىمىز – 13 جاڭا اعىلشىن تىلىندە ءبىلىم بەرەتىن توپتار اشۋ. سول ارقىلى ەۇۋ-ءدىڭ ابىرويىن كوتەرىپ, بەدەلىن وسىرۋگە وزىندىك ۇلەسىمىزدى قوسامىز دەگەن ويدامىز.  دينا ساپاروۆا, ل.ن.گۋميلەۆ اتىنداعى ەۇۋ كوپتىلدى ءبىلىم بەرۋ جانە اكادەميالىق رەسۋرستاردى دامىتۋ ورتالىعىنىڭ ديرەكتورى  استانا