وبلىس اكىمى بەردىبەك ساپارباەۆ ۆەنگريانىڭ قازاقستانداعى توتەنشە جانە وكىلەتتى ەلشىسى اندراش بارانيمەن كەزدەستى. كەزدەسۋ بارىسىندا ەكىجاقتى ءوزارا ءتيىمدى ىنتىماقتاستىق پەن بىرلەسكەن جوبالاردى جۇزەگە اسىرۋ تۋرالى اڭگىمە بولدى.
ءوڭىر باسشىسى ازىرگە ەكى اراداعى ساۋدا-ەكونوميكالىق بايلانىستاردىڭ كەمشىندىگىن, وبلىس پەن ۆەنگريا اراسىنداعى
تاۋار اينالىمى نەبارى 10 ميلليون دوللاردى عانا قۇرايتىنىن اتاپ ءوتتى. بولاشاققا جوسپارلانعان ىزدەنىستى قادامدار جۇزەگە اسسا, بۇل باعىتتا اناعۇرلىم ىلگەرىلەۋ بولاتىنىن جەتكىزدى. وعان اقتوبەدە اشىلعان ۆەنگريانىڭ كونسۋلدىعىنىڭ ىقپالى زور بولاتىنىن تىلگە تيەك ەتتى. ايماق باسشىسى قازاقتار مەن ماجارلاردىڭ اراسىندا ەجەلدەن تاريحي جانە مادەني بايلانىستىڭ قالىپتاسقانىن دا جينالعاندار جادىندا جاڭعىرتتى.
توعىز جولدىڭ تورابىندا ورنالاسقان وبلىس شەتەلدىك ينۆەستورلار ءۇشىن تارتىمدى ءوڭىر ەكەنىن ايتا كەلىپ, ەلشىلىك وكىلدەرىنە وسىنداي ارتىقشىلىقتاردى ءتيىمدى پايدالانۋ جولدارىن تارقاتا باياندادى, ەكى ەلدىڭ اراسىندا ءوزارا ەكونوميكالىق بايلانىستىڭ نىعايا بەرەتىنىنە سەنىم ءبىلدىردى. وبلىستىڭ ىسكەرلىك ىزدەنىستەر بويىنشا ەلىمىزدە استانادان كەيىنگى ەكىنشى ورىندا تۇرعانىن باياندادى. وبلىس ەكونوميكاسىنىڭ نەگىزىن مۇناي-گاز سالاسى قۇراعانىمەن, وڭىردە جەراستى قازبا بايلىقتارىنىڭ باسقا دا تۇرلەرى مول ەكەنىنەن حاباردار ەتتى.
جيىن بارىسىندا جىلىجاي قۇرىلىسى, اۋىز سۋدى تازارتۋ, كوكونىس وڭدەۋ ءوندىرىسى, ءسۇت جانە ءسۇت ونىمدەرى مەن بيدايدى قايتا وڭدەۋ باعىتىنداعى جوبالاردى جۇزەگە اسىرۋدىڭ مۇمكىندىگى مول ەكەنى ايتىلدى.
كەزدەسۋدە ءسوز العان ا.باراني ەكى ەلدىڭ اراسىندا ساياسي, ەكونوميكالىق, الەۋمەتتىك, مادەني سالادا بىرقاتار جوبالار قولعا الىنىپ جاتقانىن اتاپ ءوتتى. سونىڭ شىنايى كورىنىسى رەتىندە قازاقستاننىڭ اۋىل شارۋاشىلىعى سالاسىنا تىكەلەي ينۆەستيتسيا تارتۋمەن شۇعىلداناتىن بىرلەسكەن قوردىڭ قۇرىلۋىن كولدەنەڭ تارتتى. اتالعان قورعا «قازاگرو» ۇلتتىق كومپانياسى مەن ۆەنگريانىڭ «ەكسيمبانكى» 20 ميلليون دوللاردان – جالپى 40 ميلليون دوللار سالعانىن جەتكىزدى.
ۆەنگريا – وبلىستا ءوز كونسۋلدىعىن اشقان ەكىنشى ەۋروپالىق ەل. قاڭتار ايىندا ءبىزدىڭ وڭىرگە وسىنداي ميسسيامەن چەحتار كەلگەن بولاتىن. سونداي-اق, اقتوبەدە تۇركيا جانە وڭتۇستىك كورەيا ءوز وكىلدىكتەرىن اشۋدى جوسپارلاپ وتىر.
سونىمەن ۆەنگريانىڭ قازاقستانداعى قۇرمەتتى كونسۋلى بولىپ KAZENERGY قاۋىمداستىعى توراعاسىنىڭ ورىنباسارى جانبولات سارسەنوۆ تاعايىندالدى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى