جولاۋشىلاردىڭ تاعى دا ۇرەيىن ۇشىردى

كەشە الەكساندريا – كاير باعىتىمەن ۇشىپ كەلە جاتقان «Airbus ا 320» جولاۋ­شىلار ۇشاعىن ءبىر قارۋلى ادام باسىپ الدى. ۇشاق كيپردىڭ لارناك اۋەجايىنا امان-ەسەن قوندى. بورتىندا 81 ادام بولعان ۇشاق EgyptAir اۆياكومپانياسىنا قارايدى. بۇعان دەيىن ۇشاق بورتىندا ەكيپاجدىڭ جەتى مۇشەسى قالعانى, باسقا بارلىق جولاۋشىلاردىڭ ۇشاق بورتىنان سىرتقا شىعارىلعانى حابارلانعان ەدى. كەيبىر مالىمەتتەر بويىنشا, ۇشاق اۋەجايعا قونعاننان سوڭ, ءتيىستى مەكەمەلەر قىزمەتكەرلەرى تەررورشىمەن كەلىسسوز جۇرگىزگەن. ناقتى ەمەس دەرەكتەرگە قاراعاندا, تەررورشى ءبىر ءوزى عانا ارەكەت ەتكەن, وندا جارىلعىش زات بولعان كورىنەدى. كەيىن بەلگىلى بولعانىنداي, جولاۋشىلار ۇشاعىن كاير ۋنيۆەرسيتەتىنىڭ پروفەسسورى سەيف اد-دين مۇستافا دەگەن باسىپ العان. ءۇش پارتيا جاڭا كواليتسيا قۇرماق ۋكراينا پارلامەنتىندەگى ءىرى ءۇش پارتيا جاڭا كواليتسيا قۇرىپ, پارلامەنت توراعاسى ۆلاديمير گرويسماندى ەلدىڭ پرەمەر-ءمينيسترى قىزمەتىنە ۇسىنۋعا ۋاعدالاستى. بۇل جونىندە ءۇش پارتيانىڭ وكىلدەرى حابارلادى. الدىن الا جاسالعان بولجام بويىنشا, جاڭا پارلامەنتتىك كواليتسياعا جوعارعى رادادا بۇعان دەيىن سەرىكتەس بولعان پرەمەر-مينيستر ارسەني ياتسەنيۋكتىڭ پارتياسى, پرەزيدەنت پەتر پوروشەنكونىڭ بلوگى جانە بۇرىنعى پرەمەر-مينيستر يۋليا تيموشەنكونىڭ «باتكيۆششينا» پارتيا­سى كىرۋى مۇمكىن. كواليتسياعا كىرۋدەن بۇرىنعى وداقتاستار – راديكالدىق پارتيا مەن «ساموپوموشش» رەفورماشىل پارتياسى باس تارتقان سياقتى. ساراپشىلار پارلامەنتتە جاڭا كواليتسيانىڭ قۇرىلۋى ۋكراينادا بىرنەشە ايعا سوزىلعان ساياسي داعدارىسقا نۇكتە قويۋى ىقتيمالدىعىن ايتادى. ەلدەگى ساياسي تارتىس ۋكراينا ەكونوميكاسىن قولداۋ ءۇشىن حالىقارالىق ۆاليۋتا قورىنان 1,7 ميلليارد دوللار نەسيە الۋ تۋرالى كەلىسسوزگە دە كەدەرگى كەلتىرىپ وتىر. اقيقات نەمەسە جالعان ەكەنى بەلگىسىز مەملەكەتارالىق اۆياتسيا كوميتەتى وسى جىلدىڭ 19 ناۋرىزىندا روستوۆ ماڭىندا اپاتقا ۇشىراعان «بوينگ» ۇشاعى ەكيپاجىنىڭ سوڭعى سوزدەرى تۋرالى اقپاراتتى نە ناقتىلاماي, نە ونى جوققا شىعارماي وتىر. جوعارىدا اتالعان ۆەدومستۆو جەتەكشىسىنىڭ كومەكشىسى ارتۋر مۋرادياننىڭ مالىمدەۋىنشە, رەسەيدىڭ مەملەكەتارالىق اۆياتسيا كوميتەتى «كوممەرسانت» باسىلىمىنا دا, باسقا دا اقپارات اگەنتتىكتەرىنە «بوينگ» ەكيپاجى مۇشەلەرىنىڭ اراسىندا بولعان سوزدەر جونىندە قانداي دا ءبىر اقپارات بەرمەگەن. ۇشاقتىڭ «قارا جاشىكتەرىندەگى» جازۋدى «وقۋ» ءالى اياقتالعان جوق. ونىڭ الدىن الا قورىتىندىسى ءبىر-ەكى اپتادان سوڭ جاريا ەتىلەدى. بۇدان ەكى كۇندەي بۇرىن «كوممەرسانت» گازەتى اپاتقا ۇشىراعان ۇشاقتىڭ «قارا جاشىكتەردىڭ» جازۋى اشىلدى, ونىڭ قۇلاۋىنا ۇشقىشتاردىڭ قاتەلىگى سەبەپ بولدى, دەگەن ماعىنادا اقپارات جاريالاعان ەدى.

قىسقا قايىرىپ ايتقاندا:

ۇلىبريتانيادا كاپكەيك اتتى سيام مىسىعى سالەمدەمە قورابىنىڭ ىشىندە سەگىز كۇن قامالىپ وتىرسا دا ءتىرى قالعان. ول ءوز يەسىنىڭ باتىس سۋسسەكس ايماعىنا جىبەرمەك بولعان سالەمدەمەسىنىڭ قورابىنا كەزدەيسوق كىرىپ كەتكەن سياقتى. مىسىق سەگىز كۇندە 400 شاقىرىم جول ءجۇرىپتى. اقش استاناسىنداعى كونگرەسس وتەتىن كاپيتولي ماڭىندا اتىس بولدى. «رەيتەر» اگەنتتىگى تاراتقان اقپاراتقا قاراعاندا, وق جاۋدىرعانداردىڭ ءبىرى سول جەردە ۇستالعان. ال ەكىنشىسىن پوليتسەيلەر وق اتىپ جارالاعان. ازەربايجاننىڭ اسكەري قولباسشىلىعى تاۋلى قاراباق داۋلى اۋدانىندا ارمەنيا اسكەريلەرىمەن بولعان قاقتىعىستا ەكى اسكەري قىزمەتشى وققا ۇشقانىن حابارلادى. ولار مەملەكەتتىك شەكارانى كەسىپ وتپەك بولعان ارميان اسكەريلەرىن ۇستاۋ كەزىندە قازا تاپقان. بريتانيالىق سيۋزان براۋن دەگەن 65 جاستاعى تۋريست وزدەرى ءتۇسىپ قالعان پورتتان ءارى قاراي اتتانعان ساياحاتشى كەمەنى قۋىپ جەتپەك بولىپ, سۋدا ءۇش ساعاتتان استام جۇزگەن. ابىروي بولعاندا, ونى بالىقشىلار بايقاپ, قۇتقارىپ الىپتى. اسادتىڭ بولاشاعى ءسوز بولا باستادى رەسەيلىك بىرقاتار اقپارات اگەنتتىكتەرىنىڭ تاراتقان حابارلارىنا قاراعاندا, اقش ورتالىق بارلاۋ باسقارماسىنىڭ باسشىسى دجون برەننان ناۋرىزدىڭ باسىندا ماسكەۋگە كەلگەن سياقتى. مۇندا ول رەسەيدىڭ ءتيىستى ۆەدومستۆولارى جەتەكشىلەرىمەن سيريا پرەزيدەنتى باشار اساد بيلىگىنىڭ بولاشاعىنا بايلانىستى ماسەلەنى تالقىلاعان. رەسەيلىك اقپارات اگەنتتىكتەرىنىڭ حابارلاۋىنشا, دجون برەننان «اقش بيلىگىنىڭ سيرياداعى ساياسي وزگەرىستەردى جۇيەلى تۇردە قولداپ كەلە جاتقانىن» اتاپ وتكەن. ال «ينتەرفاكس» اگەنتتىگىنىڭ رەسەي سىرتقى ىستەر ءمينيسترىنىڭ ورىنباسارى ولەگ سىرومولوتوۆتىڭ سوزىنە سىلتەمە جاساي وتىرىپ حابارلاۋىنشا, د.برەننان رەسەي فەدەرالدىق قاۋىپسىزدىك قىزمەتىندە كەزدەسۋ وتكىزگەن. دەگەنمەن, ءمينيستردىڭ ورىنباسارى اقش ورتالىق بارلاۋ باسقارماسى باسشىسىنىڭ ماسكەۋگە جاساعان ساپارى رەسەيدىڭ سيريادان اسكەرىنىڭ ءبىر بولىگىن اكەتۋ جونىندەگى شەشىمىنە قاتىستى ەمەس ەكەندىگىن ايتقان. جەمقورلىققا قاتىسى بار ەكەنىن مويىندادى گوندۋراستىڭ ەكس-پرەزيدەنتى, سونداي-اق, فۋتبول قاۋىمداستىعىنىڭ بۇرىنعى باسشىسى بولعان رافاەل كاللەحاس حالىقارالىق فۋتبول فەدەراتسياسىنداعى (فيفا) سىبايلاس جەمقورلىق قىلمىستارعا قاتىسى بار ەكەنىن مويىندادى. رافاەل كاللەحاس فيفا-عا بايلانىستى تەرگەۋدە كىناسىن مويىنداعان ون ءتورتىنشى ادام بولىپ وتىر. كەلتىرىلگەن دەرەكتەر بويىنشا,  ول الەم چەمپيوناتىنىڭ بىلىكتىلىك كەزدەسۋ ويىندارىن وتكىزۋ جانە سول ويىنداردى ترانسلياتسيالاۋ قۇقىعىن بەرۋ ءۇشىن پارا العان. بۇگىنگە دەيىن اقش بيلىگى فيفا-داعى سىبايلاس جەمقورلىققا قاتىستى 42 تۇلعا مەن ۇيىمعا ايىپ تاعىپ وتىر. ءبىر-بىرىنە جالعاسقان جانە ۇزاق جىلداردى قامتىعان قىلمىستاردى تەرگەۋ فيفا-نىڭ قىزمەتىنە, سونىمەن قاتار, وزگە دە ەلدەردىڭ فۋتبول قاۋىمداستىقتارىنىڭ جۇمىسىنا كەرى اسەر ەتكەن. ايتا كەتەيىك, وسى جانجالدار سالدارىنان فيفا پرەزيدەنتى زەپپ بلاتتەر مەن ونىڭ ورىنباسارى ميشەل پلاتيني وتستاۆكاعا كەتكەن بولاتىن. سودىرلار يندونەزيالىق تەڭىزشىلەردى كەپىلگە الدى فيليپپيندە «ءال-كايدا» تەررورشىل ۇيىمىمەن بايلانىسى بار «ابۋ ساياف» توبىنىڭ سودىرلارى جۇك كەمەسىنە شابۋىل جاساپ, ەكيپاجدىڭ ون مۇشەسىن كەپىلگە الدى. ەلدىڭ سىرتقى ىستەر مينيسترلىگىنىڭ رەسمي وكىلى ارماناتا ءناسيردىڭ مالىمدەۋىنشە, كەپىلگە الىنعان ادامدار يندونەزيانىڭ ازاماتتارى بولسا كەرەك. ال وقيعا جەكسەنبى كۇنى  بولعان. جۇك كەمەسى بورنەو ارالىنان فيليپپينگە كومىر اپارا جاتقان جولدا شابۋىلعا ۇشىراپتى. كەيبىر اقپاراتتارعا قاراعاندا, شابۋىل جاساعاندار كەمە ەكيپاجىنىڭ مۇشەلەرىنە الدى­مەن وزدەرىن ەكسترەميستىك توپتىڭ ادامىمىن دەپ اتاعان بىرەۋ بايلانىسقا شىققان كورىنەدى. الگى ادام كەمەدەگىلەردى بوساتۋ ءۇشىن ءبىر ميلليون دوللار كولەمىندە اقشا تالاپ ەتكەن. «ءال-كايدا» ۇيىمىمەن بايلانىسى بار «ابۋ سايار» توبى ءفيليپپيننىڭ وڭتۇستىك بولىگىندە ورنالاسقان ەكەن. ينتەرنەت ماتەريالدارى نەگىزىندە ازىرلەندى.