الماتى. 25 ناۋرىز. ۋەفا چەمپيوندار ليگاسىنىڭ رەسمي دەمەۋشىسى «گازپروم» كومپانياسى گەرمانيانىڭ ميۋنحەن قالاسىندا «فۋتبول دوستىق ءۇشىن» اتتى حالىقارالىق بالالارعا ارنالعان الەۋمەتتىك جوباسىنىڭ ءتورتىنشى ماۋسىمى باستالعاندىعىن مالىمدەدى. بۇل تۋرالى كومپانيانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جىل سايىن جوبانىڭ گەوگرافيالىق اۋقىمى كەڭەيۋدە. بيىلعى ماۋسىمعا العاش رەت افريكا جانە وڭتۇستىك امەريكا ەلدەرىنەن جاس فۋتبولشىلار قوسىلدى. سونداي-اق, ازيا ەلدەرىنەن كەلگەن كوماندالاردىڭ سانى ارتۋدا. وتكەن جىلمەن سالىستىرعاندا جارىسقا قاتىسۋشى مەملەكەتتەردىڭ ءتىزىمى 24-تەن 32 دەيىن ارتتى, ال جوبانى ىسكە اسىرا باستاعان ۋاقىتتان باستاپ ول 4 ەسە كوبەيدى.
وسى ماۋسىمدا اۆستريا, ازەربايجان, الجير, ارگەنتينا, ارمەنيا, بەلارۋس, بەلگيا, برازيليا, بولگاريا, ۇلىبريتانيا, ۆەنگريا, ۆەتنام, گەرمانيا, يسپانيا, يتاليا, قازاقستان, قىرعىزستان, قىتاي, نيدەرلاندى, پولشا, رەسەي, سەربيا, سيريا, سلوۆاكيا, سلوۆەنيا, تۇركيا, ۋكراينا, فرانتسيا, حورۆاتيا, چەحيا, شۆەيتساريا, جاپونيا ەلدەرىنىڭ كوماندالارى جەڭىسكە تالاسۋدا.
سونىمەن ماۋسىم اياسىندا بىرنەشە ءداستۇرلى ءىس-شارالار جۇرگىزىلەدى: 25 ساۋىردە جوبانىڭ قاتىسۋشى ەلدەرىندە حالىقارالىق فۋتبول جانە دوستىق كۇنى اتالىپ وتىلەدى, 27 جانە 28 مامىردا ميلاندا كوشە فۋتبولى بويىنشا حالىقارالىق تۋرنير مەن «دوستىق ءۇشىن فۋتبول» حالىقارالىق بالالار فورۋمى ۇيىمداستىرىلادى.
فورۋمنىڭ باستى شاراسى – جوبانىڭ قۇندىلىقتارىنا ەڭ زور شىنايى بەرىلگەندىگى ءۇشىن الەمدىك كاسىبي فۋتبول كلۋبتارىنىڭ بىرىنە «فۋتبول دوستىق ءۇشىن» جوباسىنىڭ ارنايى سىيلىعى – توعىز قۇندىلىقتىڭ كۋبوگىن بەرۋ بولىپ تابىلادى. فورۋم اياقتالعاننان كەيىن ونىڭ قاتىسۋشىلارى ميلانداعى Giuseppe Meazza (San Siro) فۋتبول ستاديونىندا وتەتىن ۋەفا چەمپيوندار ليگاسىنىڭ فينالدىق ويىنىن كورە الادى.
«دوستىق ءۇشىن فۋتبول» جوباسى قاتىسۋشىلارىنىڭ جانە ولاردىڭ وكىلدىك ەتەتىن ەلدەرىنىڭ سانى جىل سايىن ارتىپ كەلەدى. بۇل ماۋسىمدى عالامدىق دەپ تولىق سەنىممەن اتاۋعا بولادى. جوباعا العاش رەت باتىس ەلدەرىنەن كەلگەن فۋتبولشىلار قاتىسادى. «فۋتبول دوستىق ءۇشىن» جوباسى – ءتۇرلى مادەنيەتتە تاربيەلەنگەن جاسوسپىرىمدەردىڭ تابىسۋى مەن ءتۇسىنىسۋى ءۇشىن ۇلكەن مۇمكىندىك», – دەدى «گازپروم» باسقارماسىنىڭ توراعاسى الەكسەي ميللەر.
ماۋسىمنىڭ اشىلۋىنا وراي اتالعان جوبانىڭ عالامدىق ەلشىسى فرانتس بەككەنباۋەر ءسوز سويلەدى.
«فۋتبول دوستىق ءۇشىن» جوباسىنا مەنىڭ جانە مەنىڭ دوستارىمنىڭ مۇمكىندىك العاندىعىنا, ءار ءتۇرلى ەلدەردەن كەلگەن زامانداستارىممەن تانىسۋعا جانە شىنىمەن ماڭىزدى ماسەلەلەر تۋرالى سويلەسە الاتىندىعىما مەن باقىتتىمىن. مەن ءومىردى وزگەرتە الاتىنىمىزعا جانە ونى جاقسارتا الاتىندىعىمىزعا سەنەمىن», – دەدى سيريادان كەلگەن جوبانىڭ قاتىسۋشىسى ماحەر شامبو.
ايناش ەسالي.
دەرەك, سۋرەت: «گازپروم» كومپانياسىنىڭ ءباسپاسوز قىزمەتى.