كۇنى كەشە «قازاقستان تەمىر جولى» ۇك» اق پرەزيدەنتى اسقار مامين Alstom كومپانياسىنىڭ پرەزيدەنتى انري پۋپار لافارجمەن بىرگە «ەلەكتروۆوز قۇراستىرۋ زاۋىتى» اق-تىڭ جۇمىسىمەن تانىستى. شارا بارىسىندا تاراپتار سەرىكتەستىك اياسىن ءالى دە ۇلعايتۋعا كەلىسىم جاسادى.
ول بويىنشا فرانتسۋزدىڭ Alstom كونتسەرنى قتج-دان 25 پايىز قوسىمشا ۇلەس الىپ, بىرلەسكەن كاسىپورىنداعى جالپى ۇلەسىن 50 پايىزعا جەتكىزدى. ەندى «قتج» ۇك» اق پەن «ترانسماشحولدينگ» جاق-تا 25 پايىز اكتسيادان قالدى.
«قازاقستان الەمدىك الپاۋىت Alstom فرانتسۋز كومپانياسىمەن بىرلەسىپ كولىكتىك ماشينا قۇراستىرۋ سالاسىنا تىكەلەي ينۆەستيتسيا جانە جاڭا تەحنولوگيا تارتۋ ءىسىن جۇزەگە اسىردى. سونىڭ ءناتيجەسىندە سوڭعى تەحنولوگياعا نەگىزدەلگەن جاڭا ءوندىرىس ورنى ومىرگە كەلدى», دەپ اتاپ ءوتتى ا.مامين.
Alstom پرەزيدەنتى انري پۋپار ءلافاردجدىڭ ايتۋىنشا, قازاقستاندا ينۆەستيتسياعا قولايلى جاعدايدىڭ ءبارى جاسالعان. بۇل ءوز كەزەگىندە ۇزاق مەرزىمدى سەرىكتەستىك ورناتۋعا مۇمكىندىك بەرەدى. ەقز ارقىلى جاڭا تەحنولوگيالاردى مەڭگەرۋ قازاقستاندىق ماشينا جاساۋ سالاسىنداعى كوشباسشىلىق ءرولدى اتقارۋعا مۇمكىندىك جاسايدى. قازاقستاندىق لوكوموتيۆتەردى الەم نارىعىنا ەكسپورتقا شىعارۋعا كەپىلدىك ەتەدى. زاۋىتتاعى قازاقستاندىق ۇلەستى كوبەيتۋ 2020 جىلعا قاراي 70 پايىزدى قۇرايتىن بولادى ەكەن.
ەلىمىزدىڭ باس تەمىرجولشىسىنىڭ سوزىنە قاراعاندا, قازىرگى تاڭدا قازاقستاننىڭ تەمىرجولدارىندا ساعاتىنا 120 شاقىرىم جىلدامدىقپەن جۇرەتىن الەمدەگى ەڭ قۋاتتى بولىپ سانالاتىن KZ-8ا سەرياسىنداعى 31 جۇك لوكوموتيۆى جۇيتكىپ ءجۇر. سونداي-اق, ساعاتىنا 200 شاقىرىم جىلدامدىقپەن جۇرەتىن التى دانا KZ-4ات جولاۋشىلار لوكوموتيۆتەرى حالىققا قىزمەت كورسەتۋدە.
بۇلارمەن بىرگە, Alstom جانە ەقز زاۋىتتىڭ وندىرىستىك بازاسىندا ەلەكتروۆوزعا ارنالعان تارتىم ترانسفورماتورلارىن ءوندىرۋ جونىندەگى كەلىسىمگە قول قويدى. وسىنىڭ ارقاسىندا زاۋىت Alstom كونتسەرنىنە اتالعان ترانسفورماتورلاردى شەتەلدەن جەتكىزەتىن ءىرى كاسىپورىنعا اينالاتىن بولادى. ەقز-دا ترانسفورماتورلار شىعارۋ 2016 جىلدىڭ ءبىرىنشى جارتىجىلدىعىندا باستالىپ, 100-دەن استام جۇمىس ورنى قۇرىلادى دەپ كۇتىلۋدە. جوسپارلانعان وندىرىستىك قۋاتتىلىعى جىلىنا 200-گە دەيىن ترانسفورماتوردى قۇراماق.
وسى كەلىسىمدەردى جاساسۋدىڭ ارقاسىندا Alstom ەقز زاۋىتىن دامىتۋعا بۇكىل كۇشىن شوعىرلاندىرىپ, ەكسپورتتىق الەۋەتكە يە الەمدىك ساپاداعى جەرگىلىكتى ءونىمدى جاساپ شىعاراتىن بولادى. وسىلايشا ەقز قازاقستان ەكونوميكاسىنىڭ نەگىزگى قوزعالتقىش كۇشىنە اينالىپ, لوكوموتيۆتەردى ءوندىرىپ, ولاردى ەۋرازيالىق ەكونوميكالىق وداق جانە تمد اۋماعىنداعى ازەربايجان مەن وزبەكستان سەكىلدى كورشىلەس ەلدەردەن باستاپ, بۇكىل الەمگە ەكسپورتتايتىن حالىقارالىق ءوندىرىس رەتىندە تانىلماق.
– ەقز زاۋىتىنداعى ۇلەستى ۇلعايتۋ جانە جاڭا ءوندىرىستى باستاۋ Alstom كونتسەرنىنىڭ قازاقستاندا بىرىزدىلىكپەن جۇزەگە اسىرىپ جاتقان ستراتەگياسى اياسىنداعى زاڭدى قادام بولىپ تابىلادى. ءبىزدىڭ ماقساتىمىز – قازاقستان رەسپۋبليكاسىمەن سەنىمدى ءارى ۇزاق مەرزىمدى سەرىكتەستىك قۇرۋ. تەحنولوگيالار مەن ءوندىرىستى جەرگىلىكتەندىرۋ, جاڭا جۇمىس ورىندارىن قۇرۋ جانە جەرگىلىكتى مامانداردى وقىتۋ ارقىلى Alstom قازاقستانداعى ماشينا جاساۋشى باستى كاسىپورىنداردىڭ ءبىرىن جاڭا دەڭگەيگە كوتەرىپ, ونىڭ الدىندا الەمدىك نارىقتىڭ ەسىگىن اشپاق.
ءبىز قازىردىڭ وزىندە ەل اۋماعىندا 400-دەن اسا جۇمىس ورنىن قۇرىپ ۇلگەردىك, ءوندىرىستى جەرگىلىكتەندىرۋدىڭ ۇلەسى 28 پايىزعا جەتىپ وتىر جانە دە تاياۋداعى 2 جىل ىشىندە ول 50 پايىزعا دەيىن ارتپاق. قازاقستان ۇكىمەتىنىڭ ينۆەستيتسيالاۋعا جانە دامىتۋعا ارناپ جاساپ بەرگەن قولايلى جاعدايلارى اياسىندا ءبىزدىڭ ىنتىماقتاستىعىمىز بارلىق مۇددەلى تاراپتارعا ءوز پايداسىن اكەلەتىنىنە مەن نىق سەنىمدىمىن, دەدى Alstom كونتسەرنىنىڭ رەسەي جانە تمد ايماعىنداعى اعا ۆيتسە-پرەزيدەنتى مارتين ۆوجۋر.
سالتاناتتى شارادان كەيىن كاسىپورىننىڭ كوممەرتسيالىق ديرەكتورى الەكسەي ەرشوۆ جۋرناليستەرگە زاۋىت ءىشىن ارالاتتى. ول ءار تسەحتىڭ اتقاراتىن جۇمىستارىمەن تانىستىرىپ, ەلەكتروۆوزداردىڭ بۇرىنعىلاردان ارتىقشىلىقتارىنا توقتالدى. «كورىپ وتىرعان KZ8A جۇك ەلەكتروۆوزى الەمدەگى ەڭ قۋاتتى ءارى ءتيىمدى ماشينا بولىپ سانالادى. مۇنىڭ بۇرىنعىلاردان ارتىقشىلىعى تەك قۋاتىندا عانا ەمەس, ءار تۇستا ۇنەمدەۋگە نەگىزدەلىپ جاسالعان ەلەكتروۆوز بۇعان دەيىنگى تەمىرجول ماشينالارىنان ەلەكتر قۋاتىن 25 پايىزعا دەيىن از جۇمسايدى. سونداي-اق, جىلدامدىعى دا جوعارى. ماشينيستەرگە قولايلى بولۋى ءۇشىن كابينالار ۇزدىك ۇلگىدە جاسالعان. وندا توڭازىتقىشتان باستاپ ميكروتولقىندى پەش جانە شاي قايناتىپ ىشەتىن ەلەكتر شاينەككە دەيىن بار», دەدى ا.ەرشوۆ.
ونىڭ سوزىنە قاراعاندا, قازاقستاندىق ەلەكتروۆوزداردى الۋعا قازىردىڭ وزىندە ازەربايجان ەلى تاپسىرىس بەرىپ قويعان. مۇنىمەن بىرگە, تاياۋدا عانا ۋكراين تەمىرجولىنىڭ باسشىلارىمەن ەۋروپا ەلىندە كەزدەسكەندەرىن ايتتى. بۇگىندە ەلەكتروۆوز پاركتەرىنىڭ توزىعى 90 پايىزعا تاياعان ۋكراين تەمىرجولشىلارى دا قازاقستاندىق ەلەكتروۆوزعا قاتتى قىزىعۋشىلىق تانىتىپ وتىرعان كورىنەدى. «ۋكراينالىق ارىپتەستەرىمىزدىڭ ءبىزدىڭ ەلەكتروۆوزعا تاپسىرىس بەرەتىنىنە كۇمانىمىز جوق. سەبەبى, ەۋرازيا كەڭىستىگىندە ەڭ ءتيىمدى دەپ سانالاتىن وسى زاۋىت بىزدە عانا بار. وعان قوسا, ءبىزدىڭ زاۋىت ولاردىڭ تالابىن ورىنداپ, ساپا بويىنشا قالاۋىن قاناعاتتاندىرۋعا تولىق قابىلەتتى», دەدى كوممەرتسيالىق ديرەكتور.
زاۋىتتىڭ جۇمىسىمەن تانىسقان جۋرناليستەردى ەكسپورتقا شىعارىلاتىن ەلەكتروۆوزداردىڭ باعاسى دا قىزىقتىردى. «جۇك ەلەكتروۆوزدارىنىڭ باعاسى 6 مىڭ ەۋرو بولادى. كەلەشەكتە وتاندىق ءونىمنىڭ ۇلەسى ارتىپ, 70 پايىزعا جۋىقتاعاندا بالكىم باعا شامالى ارزانداۋى دا ىقتيمال. نەگىزى ناقتى تاپسىرىستار كەلىپ تۇرسا, زاۋىت ءبىر اپتادا ءبىر ەلەكتروۆوز قۇراستىرىپ شىعارۋعا قابىلەتتى. بۇعان قوسا, الداعى ۋاقىتتا قازاقستاندىق ۇلەس 50 پايىزدان ارتقان كەزدە قۇراستىرىلعان ەلەكتروۆوزدارعا «قازاقستاندا جاسالعان» دەگەن لوگوتيپتەر جاپسىرىلاتىن بولادى. بۇيىرتسا, بۇل ماقساتقا 2020 جىلى قول جەتكىزەمىز دەگەن ءۇمىتىمىز بار», دەدى ول.
نۇرباي ەلمۇراتوۆ,
«ەگەمەن قازاقستان».