قاراعاندى وبلىسىنداعى بۇقار جىراۋ اۋدانىنىڭ ورتالىعى بوتاقارا كەنتىندە قازاق مەكتەبىنىڭ قۇرىلىسى تولىعىمەن اياقتالدى. بۇرىن بالالار وقيتىن ەسكى عيماراتتا جالپى ءبىلىم بەرۋ مەكەمەسىمەن بىرگە مۋزىكا مەكتەبى دە قاتار ورنالاسىپ, بۇل, ارينە, كوپتەگەن قيىندىقتار تۋعىزىپ كەلگەن ەدى. عيمارات ءىشى تار بولاتىن, ءتىپتى, مۇندا سپورت زالى دا اتىمەن بولعان ەمەس. ەندى جاڭا مەكتەپ سالىنعان سوڭ ۇزاق جىلداردان بەرى قوردالانىپ كەلگەن بۇل ماسەلە دە وڭ شەشىمىن تاپتى.
بوتاقارالىقتاردىڭ مۇنداي قۋانىشىمەن ورتاقتاسۋ ءۇشىن ارنايى كەلگەن وبلىس اكىمى نۇرمۇحامبەت ابدىبەكوۆ مەكتەپتىڭ سالتاناتتى اشىلۋ جيىنىندا قۇتتىقتاۋ ءسوز سويلەدى. «ساپالى ءبىلىم بەرۋ – الەمدەگى وزىق 30 ەلدىڭ قاتارىنا قوسىلۋدى مۇرات ەتكەن ءبىزدىڭ ەلدىڭ دامۋىنا زور ىقپالىن تيگىزەتىن فاكتورلاردىڭ ءبىرى. ەلدىڭ بولاشاعى بۇگىنگى وقۋشىلاردىڭ قولىندا. سوندىقتان, مەملەكەت باسشىسى جالپى ءبىلىم بەرەتىن جۇيەنىڭ ماتەريالدىق-تەحنيكالىق بازاسىن جاڭارتىپ وتىرۋعا ايرىقشا كوڭىل بولەدى», – دەدى ءوڭىر باسشىسى.
جاڭا مەكتەپ ءبىلىم بەرۋدى دامىتۋ مەملەكەتتىك باعدارلاماسى بويىنشا سالىندى. قۇرىلىسى 2014 جىلى باستالعان ءبىلىم مەكەمەسىنىڭ جالپى اۋماعى 6 400 شارشى مەتردى قۇرايدى. ءۇش قاباتتى عيماراتقا 464 بالا ەركىن سىيىپ, وقي الادى. مۇندا شەبەرحانا, مۋلتيمەديالىق, لينگافون كابينەتتەرى, كاسىپتىك باعدارلىق زەرتحانا, مامانداندىرىلعان حيميا, فيزيكا جانە بيولوگيا كابينەتتەرى بار. سونىمەن قاتار, سپورتتىق, وقۋ جانە اكت زالدارى, كىتاپحانا, اسحانا جانە مەديتسينا كابينەتى قاراستىرىلعان. ءبىلىم ورداسىنىڭ قۇرىلىسىنا وبلىستىق بيۋدجەتتەن 902 ملن. تەڭگە قارجى جۇمسالدى.
مەكتەپتىڭ جايلى دا جارىق سىنىپتارى وتاندىق جيھازبەن جابدىقتالعان. اۋلاسىندا بالالارعا ارنالعان ءتورت جانە ءبىر ۇلكەن سپورت الاڭقايى بار. قاۋىپسىزدىك شارالارىن ساقتاۋ ءۇشىن بارلىق جەرگە بەينە-باقىلاۋ كامەرالارى ورناتىلعان.
جاڭا مەكتەپتە 522 بالاعا ارنالعان ساباقتار ەكىنشى جارتىجىلدىقتان باستاپ جۇرگىزىلەدى. مۇندا 55 مۇعالىم جۇمىس ىستەيتىن بولادى. ولاردىڭ اراسىندا «ديپلوممەن – اۋىلعا!» جوباسى بويىنشا كەلگەن جاس ماماندار دا بار.
قايرات ءابىلدينوۆ,
«ەگەمەن قازاقستان».
قاراعاندى وبلىسى,
بۇقار جىراۋ اۋدانى.