استانا. 27 قاڭتار. دۇنيەجۇزىلىك دەنساۋلىق ساقتاۋ ۇيىمى وڭتۇستىك جانە سولتۇستىك امەريكادا زيكا اۋرۋىنىڭ جىلدام تارالۋىنا بايلانىستى دابىل قاقتى. بۇل تۋرالى euronews.com سايتىنا سىلتەمە جاساعان egemen.kz ءتىلشىسى حابارلادى.
وتكەن جىلدىڭ مامىر ايىندا برازيليا ايماعىندا اتالعان ىندەتتى جۇقتىرعاندار انىقتالدى. ماماندار بۇگىندە قاۋىپتى اۋرۋدىڭ 21 مەملەكەتكە تاراپ كەتكەنىن مالىمدەدى. دۇنيەجۇزىلىك دەنساۋلىق ساقتاۋ ۇيىمىنىڭ دارىگەرلەرى كەسەلدىڭ جىلدام تارالىپ كەتۋىنىڭ ەكى سەبەبى بار دەيدى. ونىڭ ءبىرى, امەريكا قۇرلىعىنىڭ حالقىندا بۇل دەرتكە قارسى تۇرارلىق يممۋنيتەتتىڭ جوقتىعىنان بولسا, ەكىنشىسى اۋرۋدى تاراتاتىن سارى ءتۇستى ماسانىڭ كانادا مەن چيلي مەملەكەتتەرىن ەسەپتەمەگەندە, بۇكىل ايماقتا مەكەندەيتىندىگىنەن, حالىق وسىنداي جاعدايعا دۋشار بولدى دەگەن قورىتىندى شىعاردى.
قاۋىپتى سىرقاتتان ەمدەلۋدىڭ باستى جولى اۋرۋ تاراتقىش ماسالاردى جويۋ كەرەك دەگەن شەشىم قابىلداندى. برازيليادا وسىعان بايلانىستى ارنايى اسكەر جاساعى جۇمىلدىرىلدى. سونداي-اق, ماماندار سولتۇستىك جانە وڭتۇستىك امەريكانىڭ حالقىنا جابىق كيىنىپ, ماسالاردان قورعانۋ قاجەتتىگىن العا تارتتى.
ايتا كەتەيىك, اتالعان اۋرۋ ءتۇرى اسىرەسە, جۇكتى ايەلدەر ءۇشىن اسا قاۋىپتى. زيكا بەزگەگىن جۇقتىرعان بولاشاق انادان ميكروتسەفاليامەن اۋىرعان نارەستەلەر دۇنيەگە كەلەدى. ول ءوز كەزەگىندە ءسابيدىڭ باس سۇيەگىن قاجەتتى مولشەردە وسۋىنە كەدەرگى جاساپ, مي قۇرىلىسىنىڭ دامۋىنا زيانىن تيگىزەدى.
ايان ءابدۋالي.
دەرەك: euronews.com.
سۋرەت: aqualab.kz.