استانا. 26 تامىز. كەشە استانانىڭ «بارىسى» قۇرلىقتىق حوككەي ليگاسىنىڭ جاڭا ماۋسىمىنداعى العاشقى كەزدەسۋىن وتكىزدى. ءوز ايدىنىندا ماگنيتوگورسكىنىڭ «مەتاللۋرگ» كومانداسىن قابىلداعان ەلوردالىقتار 1:2 ەسەبىمەن ەسە جىبەردى. بۇل تۋرالى egemen.kz حابارلادى.
ويىننىڭ العاشقى كەزەڭى تەڭ جاعدايدا ءوربىدى. قارسىلاستار الما-كەزەك شابۋىلداپ, بىرنەشە قاۋىپتى سوققىلار جاساپ كوردى. الايدا, شەشۋشى ساتتە ءمۇلت كەتىپ جاتتى. ال 17-مينۋتتا «بارىستىڭ» قارىمتا شابۋىلى ءوز ناتيجەسىن بەرىپ, ايدىن يەلەرى ەسەپتە العا شىقتى. شايبانىڭ اۆتورى – كونستانتين رۋدەنكو. گول سوعىلعان ساتتە ەكى كوماندا دا 4 حوككەيشىمەن ونەر كورسەتىپ جاتقانىن ايتا كەتەيىك. ۇزىلىسكە دەيىن بۇل ەسەپ وزگەرگەن جوق.
ەكىنشى كەزەڭدە قوناقتار باسىم بولدى. ونى وسى كەزەڭدە قاقپاعا باعىتتالعان سوققى سانىنا قاراپ-اق اڭعارۋعا بولادى. اتاپ ايتقاندا, بۇل كەزەڭدە «بارىس» بەس-اق مارتە قارسىلاستار قاقپاسىن نىساناعا السا, «مەتاللۋرگ» ويىنشىلارى 20 سوققىمەن جاۋاپ قايتاردى. ابىروي بولعاندا, ولاردىڭ بىرەۋى دە دىتتەگەن جەردەن تابىلمادى. وعان قاقپاشىمىز يان لاتسونىڭ شەبەرلىگى سەبەپ بولعانىن ايتا كەتۋىمىز كەرەك. ناتيجەسىندە ويىننىڭ ەكىنشى بولىگىندە ەسەپ وزگەرىسسىز قالدى.
ءۇشىنشى كەزەڭدە ماگنيتوگورسكىدەن كەلگەن ويىنشىلار دەگەندەرىنە جەتىپ, ءبىزدىڭ قاقپاعا ەكى بىردەي شايبا ەنگىزدى. الدىمەن, 45-مينۋتتا كريس لي مەرگەندىگىمەن كوزگە تۇسسە, ارادا 9 مينۋت ۋاقىت وتكەندە ۆويتەك ۆولسكي ەسەپتى ەسەلەدى. ويىن سوڭىنا دەيىن تابلوداعى ناتيجە وزگەرمەي, «مەتتاللۋرگ» 2:1 ەسەبىمەن جەڭىسكە جەتتى.
ماتچ بارىسىنداعى كەيبىر ستاتيستيكالىق كورسەتكىشتەرگە نازار اۋدارايىق. قاقپاعا جاسالعان سوققى جونىنەن قوناقتار ەكى ەسە باسىم بولدى. 60 مينۋتتىڭ ىشىندە «بارىس» 22 سوققى جاساسا, «مەتاللۋرگ» 41 مارتە لاتسونىڭ يەلىگىن نىساناعا العان. قوس كوماندانىڭ دا ايىپ ۋاقىتى 4 مينۋتتى قۇرادى.
«بارىس» قۇرلىقتىق حوككەي ليگاسىنداعى كەلەسى كەزدەسۋىن 27 تامىزدا تاعى دا ءوز ايدىنىندا وتكىزەدى. ەرلان ساعىمباەۆ جاتتىقتىراتىن جاساق ول ويىندا ۋفانىڭ «سالاۆات يۋلاەۆ» كومانداسىمەن كۇش سىناسادى.
ەلامان قوڭىر.
دەرەك: egemen.kz.
سۋرەت: hcbarys.kz.