مۇگەدەك جاندار مەملەكەت قامقورلىعىندا

 

ءماجىلىس دەپۋتاتى, «نۇر وتان» پارتياسىنىڭ مۇشەسى ولگا كيكولەنكو باسقاراتىن «جۇمىسپەن قامتۋ جانە حالىق تابىسى» باعىتى بويىنشا ساراپشىلار توبىنىڭ وتىرىسى ءوتتى. وعان ءماجىلىس پەن ءماسليحاتتاردىڭ دەپۋتاتتارى, دەنساۋلىق ساقتاۋ جانە الەۋمەتتىك دامۋ, ۇلتتىق ەكونوميكا مينيسترلىكتەرىنىڭ, «اۋىل شارۋاشىلىعىن قارجىلاي قولداۋ قورى» اق-تىڭ, ۇكىمەتتىك ەمەس ۇيىمداردىڭ وكىلدەرى قاتىستى.

اتالعان ساراپشىلار توبىنىڭ وتىرىسىندا «كەدەرگىسىز كەلەشەك» پار­تيا­لىق جوباسى شەڭبەرىندە مۇمكىندىگى شەك­تەۋلى جانداردى جۇمىسقا ورنالاس­تى­رۋدىڭ تيىمدىلىگى, سونىمەن قاتار, «اۋىل شارۋاشىلىعىن قارجىلاي قولداۋ قورى» اق جۇيەسى بويىنشا شاعىن نەسيەلەندىرۋ ماسەلەلەرى تالقىلاندى. جيىندا بەلگىلى بولعانداي, قازىرگى تاڭدا ەلىمىزدە 626,7 مىڭنان استام مۇگەدەك جان بار. ولاردىڭ ىشىندە 64,5 پايىزى ەڭبەك ەتۋگە قابىلەتتى جاستا بولسا, دەنساۋلىق جاعدايى بويىنشا جۇمىسقا جارامدىلارى 16 پايىزدى قۇراپ وتىرعان كورىنەدى. ال 20 پايىزى (82,6 مىڭ ادام) جۇمىسقا ورنالاسقان. دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى سۆەتلانا جاقىپوۆانىڭ سوزىنە قاراعاندا, 2015 جىلدىڭ ءى توقسانىنىڭ قورىتىندىسى بويىنشا, مۇمكىندىگى شەكتەۋلى 2,3 مىڭنان استام جاندى جۇمىسپەن قامتۋ ماقساتىندا كوپتەگەن شارالار جۇزەگە اسىرىلعان. ونىڭ ايتۋىنشا, 967 ازامات قوعامدىق جۇمىستارعا باعىتتالعان, 430 ادام ەڭبەك ەتەر ورنىن مەملەكەتتىك قولداۋ شارالارىنىڭ كومەگىنسىز تاپقان, ال 322-ءسى الەۋمەتتىك جۇمىس ورىندارىنا جىبەرىلگەن. Cونداي-اق, باسقوسۋ بارىسىندا ارنايى جۇمىس ورنىن اشقاندارعا سۋبسيديا بەرۋ, مۇگەدەكتەردى كاسىپورىننىڭ شتاتتىق سانىنا بايلانىستى جۇمىسقا ورنالاستىرۋ باعىتىندا كۆوتا بەرۋ تەتىگىن جەتىلدىرۋ بويىنشا نورمالار قاراستىرىلعان كەيبىر زاڭنامالىق اكتىلەرگە ەنگىزىلگەن تۇزەتۋلەر ماجىلىستە تالقىلانىپ جاتقانى ايتىلدى. بۇدان بولەك, اتالعان نورمالاردى ىسكە اسىرۋ ءۇشىن زاڭعا قوسىمشا ءتيىستى اكتىلەر دايىندالۋ ۇستىندە ەكەنى ءسوز بولدى. ءوز كەزەگىندە دەپۋتات ولگا كيكو­لەنكو: «قازىرگى ەكونوميكالىق شارتتار مەن ەڭبەك نارىعىنداعى جاعداي شەڭ­بەرىندە مۇگەدەكتەردىڭ قۇقىقتارىن قورعاۋ ماقساتىندا بەكىتىلگەن كونۆەن­تسيانىڭ تالاپتارىن ورىنداۋىمىز قاجەت. بۇل تالاپ – مۇگەدەكتەردىڭ جۇ­مىسقا ورنالاسۋىنا جاردەمدەسۋ», دەدى. وتىرىستا حالىقتى جۇمىسپەن قام­تۋدىڭ ءتيىمدى تەتىكتەرىنىڭ ءبىرى – شا­عىن نەسيەلەندىرۋ ەكەنىنە باسا نازار اۋدارىلدى. بۇگىندە «جۇ­مىس­پەن قامتۋ-2020» مەملەكەتتىك باعدار­لا­ماسىنىڭ اياسىندا 28,7 مىڭ جان نەسيە الىپتى. ولاردىڭ ىشىندە 20 مىڭى ءوز ءىسىن اشسا, 8,6 مىڭى بيزنەستەرىنىڭ كولەمىن كەڭەيتكەن. وسى ارادا اتالعان باعدارلاما شەڭبەرىندە 30 مىڭنان استام ازامات كاسىپكەرلىك نەگىزدەرى بو­يىنشا ءبىلىم العاندارىن دا ايتا كەتەيىك. جولدىباي بازار, «ەگەمەن قازاقستان».